وزبەكستان رەسپۋبليكاسى كەدەن كوميتەتى مەن مەملەكەتتىك كۇزەت قىزمەتى «تاشكەنت-اەرو» مامانداندىرىلعان كەدەن كەشەنى «اۆياجۇكتەر» سىرتقى ەكونوميكالىق قىزمەت كەدەن بەكەتىندە شەتەلدەن وزبەكستانعا ۇشاقپەن اكەلىنىپ، كەيىن جۇك كولىگىمەن ترانزيتتىك رەجيمدە تاسىمالدانۋى جوسپارلانعان سالماعى 25 توننا بولاتىن 1 مىڭ قاپ كونديتەرلىك كوكنار تۇقىمى ازىق-تۇلىك تاۋارلارى بەلگىلەنگەن تارتىپپەن كەدەندىك تەكسەرۋدەن ءوتتى، دەپ حابارلايدى halyq-uni.

وزبەكستان كەدەن كوميتەتىنىڭ حابارلاۋىنشا، ولاردىڭ اراسىنان ناعىز ەسىرتكى ساناتىنا جاتاتىن 8,5 توننا كوكنار سابانى بار ەكەنى انىقتالعان.

ادەتتە ءارتۇرلى پىسىرىلگەن ونىمدەرگە قوسىلاتىن نەمەسە ۇستىنە سەبىلەتىن كونديتەرلىك كوكنارعا ۇقساس بولعانمەن، ودان ايتارلىقتاي ەرەكشەلەنەدى. ياعني، بۇل ءونىم – كوكنار تۇقىمداسىنا جاتاتىن ءشوپ وسىمدىكتەرىنىڭ ارنايى دايىندالىپ، وڭدەلگەن تۇقىمى. الايدا كەدەندىك تەكسەرۋ كەزىندە قۇجاتتاردا كونديتەرلىك كوكنار دەپ كورسەتىلگەن 25 توننا تۇقىم مەن ساباننىڭ ىشىندە ناعىز ەسىرتكى بولىپ سانالاتىن 8,5 توننا كوكنار سابانى بار ەكەنى انىقتالعان، – دەلىنگەن حابارلامادا.

وزبەكستان رەسپۋبليكاسى مينيسترلەر كابينەتىنىڭ «ەسىرتكى، پسيحوتروپتىق زاتتار مەن پرەكۋرسورلاردى وزبەكستان رەسپۋبليكاسىنىڭ اۋماعىنا اكەلۋ، اكەتۋ جانە ترانزيتتەۋ ءتارتىبىن، سونداي-اق ولاردىڭ اينالىمىن باقىلاۋدى جەتىلدىرۋ تۋرالى» 2015 جىلعى 12 قاراشاداعى 330 ساندى قاۋلىسىنا سايكەس، كوكنار سابانى رەسپۋبليكا اۋماعىندا تىيىم سالىنعان ەسىرتكى بولىپ سانالادى. قازىر بۇل جاعدايعا بايلانىستى كەدەن ورگاندارى قىلمىستىق ءىس قوزعادى.

بۇل رەتتە وزبەكستان كەدەن قىزمەتىندە سوڭعى 30 جىلدا 8,5 توننا ەسىرتكىنى ءبىر ۋاقىتتا انىقتاپ، تاركىلەۋ جاعدايى العاش رەت بولىپ وتىر.

Abai.kz