شىمكەنت قالاسىندا ورتالىق «Aq meshit» مەشىتى اۋلاسىندا ورنالاسقان ستۋدەنتتەر ءۇيىنىڭ اشىلۋ سالتاناتى ءوتتى. يگى ءىس-شاراعا قازاقستان مۇسىلماندارى ءدىني باسقارماسىنىڭ توراعاسى ناۋرىزباي قاجى تاعانۇلى ارنايى قاتىستى.

«بۇگىن ءبىز ءدىني سالاداعى ەرەكشە وقيعانىڭ كۋاگەرى بولىپ وتىرمىز. وسىنداي ساتكە جەتكىزگەن اللاعا شۇكىر ايتامىز. مەن جىل باسىندا ءوزىمنىڭ ەلىمىزدەگى بارشا ءدىن قىزمەتكەرلەرىنە جولداعان باعدارلىق باياندامامدا رەسپۋبليكالىق ماڭىزى بار 3 قالادان، سونىمەن قاتار وبلىس ورتالىقتارىنان الەۋمەتتىك از قامتىلعان وتباسىلاردان شىققان ستۋدەنتتەرگە ارنالعان قايىرىمدىلىق نەگىزىندە ءمۇفتيات جاتاقحانالارىن اشۋدى تاپسىرعان بولاتىنمىن. اللاعا شۇكىر، بۇگىن باستاعان ءىسىمىزدىڭ ناتيجەسىن كورىپ وتىرمىز.

بۇگىندە جاتاقحانا تاپشىلىعى قوعامداعى كۇردەلى ماسەلەلەردىڭ بىرىنە اينالعانى بەلگىلى. قالاعا وقۋ ىزدەپ كەلگەن جەتكىنشەكتەر ءۇشىن جاتاقحانا اۋاداي قاجەت. اسىرەسە الەۋمەتتىك جاعدايى تومەن وتباسىلاردان شىققان ستۋدەنتتەر ءۇشىن پاتەر جالداۋ – قيىننىڭ-قيىنى. وسى ءبىر كەلەڭسىز جاعدايدىڭ وڭ شەشىمىن تابۋ ءۇشىن جاتاقحانا اشۋدى ءجون كوردىك. بۇل جاتاقحاناعا كوپبالالى وتباسىدان شىققان، اتا-اناسىنان ايىرىلعان ستۋدەنتتەر قابىلدانادى. جاتاقحانادا شاكىرتتەردىڭ الاڭسىز ءبىلىم الۋىنا جاعداي جاسالعان.

اللا قالاسا، مۇنداي عيماراتتار ەلىمىزدىڭ ءار وڭىرىنەن اشىلىپ، ەلىمىزدەگى جاتاقحانا تاپشىلىعىن ازايتادى دەپ سەنەمىن. ءبىلىم، ءدىني ءىلىم جولىنداعى جاستارعا كومەكتەسۋ – ۇلكەن ساۋاپتى ىستەردىڭ ءبىرى. دىنىمىزدەگى ۇلكەن عۇلامانىڭ ءبىرى يبن مۋباراك ءبىر سوزىندە: «مەن پايعامبارلىق مارتەبەدەن كەيىنگى ءبىلىمدى جايۋ مەن ءبىلىم ىزدەنۋشىلەرگە كومەك بەرۋ، ولاردىڭ كۇنكورىس قامىن ۋايىمداماي، ەش الاڭداۋسىز بىلىمدەرىنە دەن قويۋلارىنا جاردەمدەسۋدەن ابزال مارتەبەنى بىلمەيمىن» دەگەن ەكەن. عالىم بۇل ءسوزى ارقىلى ءبىلىم جولىنداعى جاستارعا كومەكتەسۋدى پايعامبارلىق مارتەبەدەن كەيىنگى ورىنعا قويىپ تۇر.

ءبىلىم الۋشىعا كومەكتەسۋ دەگەنىمىز – ءىلىم ۇيرەنۋشى ادامنىڭ ساۋابىنداي ساۋاپقا كەنەلۋ دەگەن ءسوز. اللا تاعالا يگى ىسكە ۇلەس قوسقان بارشا ازاماتقا مول ساۋاپتان جازسىن» دەدى باس ءمۇفتي ناۋرىزباي قاجى تاعانۇلى.

ستۋدەنتتەر ۇيىنە جەرگىلىكتى جوعارى وقۋ ورىندارىندا وقيتىن 10 ستۋدەنت قابىلداندى.

Abai.kz