17-18 قازان كۇندەرى قازاقستان پرەزيدەنتى قىتاي حالىق رەسپۋبليكاسىنا رەسمي ساپارمەن بارادى. بۇل تۋرالى اقوردانىڭ ءباسپاسوز قىزمەتى حابارلادى.

«بەيجىڭدە قاسىم-جومارت توقاەۆ قحر توراعاسى سي تسزينپينمەن، قحر مەملەكەتتىك كەڭەسىنىڭ پرەمەرى لي تسيانمەن جانە بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى چجاو لەتسزيمەن كەلىسسوز جۇرگىزەدى»، - دەلىنگەن رەسمي اقپاراتتا.

سونداي-اق پرەزيدەنت توقاەۆ جوعارى دەڭگەيدەگى «ءبىر بەلدەۋ، ءبىر جول» باستاماسىنىڭ III فورۋمىنا قاتىسادى. سونىمەن قاتار ساپار اياسىندا قىتايدىڭ ءىرى كومپانيالارى باسشىلارىمەن بىرقاتار كەزدەسۋ وتكىزۋ جوسپارلانىپ وتىر.

وسىعان دەيىن قازاقستان پرەزيدەنتى قىتايعا رەسمي ءىس-ساپارمەن بەس اي بۇرىن بارىپ-قايتقان ەدى. قىتاي توراعاسى سي 2023 جىلدىڭ مامىرىندا سيان قالاسىندا ورتالىق ازيا باسشىلارىن جيناپ، ۇلكەن سامميت وتكىزدى.

قىتاي ايماق ەلدەرىنە ۇلكەن قارجىلىق جوبالارىن ۇسىندى. وا-عا كوڭىل بۇرىپ، بەس ەلدىڭ ارقايسىمەن جەكەلەگەن كەلىسىمشارتتار ءتۇزىستى. مۇناي، گاز، ەنەرگەتيكا، ساۋدا-ساتتىق، لوگيستيكا، مەديتسينا، گۋمانيتارلىق سەكتورلاردا ت.ب. كەلىسىمدەر جاساستى. «ءبىر جول، ءبىر بەلدەۋ»، «جاڭارعان جىبەك جولى» ت.ب. پروەكتىلەر اۋقىمدانا ءتۇستى.

وسى جولى پرەزيدەنت توقاەۆ تاعى قىتاي جەرىنە ساپارلاپ باراتىنى بەلگىلى بولىپ وتىر.

ال «ءبىر بەلدەۋ، ءبىر جول» - قىتايدىڭ ءىرى حالىقارالىق جوباسى. ورتالىق ازيا، ەۋروپا مەن افريكانىڭ 60-قا تارتا مەملەكەتىن قامتيدى. قازىرگى قولدانىستا بار ساۋدا-ترانسپورتتىق دالىزدەردى دامىتىپ، جاڭا دالىزدەر اشۋدى ماقسات ەتەدى.

وسىعان دەيىن قىتاي باسشىسى سي «ءبىر بەلدەۋ، ءبىر جول» جوباسىن ەاەو ەلدەرى ارقىلى دامىتۋدى كوزدەيتىنىن ايتقان.

Abai.kz