بۇگىن ءماجىلىستىڭ جالپى وتىرىسىندا دەپۋتاتتار ەكسپورتتىق-كرەديتتىك اگەنتتىك جانە شيكىزاتتىق ەمەس تاۋارلاردىڭ (جۇمىستاردىڭ، كورسەتىلەتىن قىزمەتتەردىڭ) ەكسپورتىن ىلگەرىلەتۋ ماسەلەلەرى تۋرالى زاڭدى ەكىنشى وقىلىمدا قابىلدادى.

اتالعان تاقىرىپ بويىنشا ءماجىلىس دەپۋتاتى رۋسلان قوجاسباەۆ بايانداما جاسادى.

زاڭ جوباسى مەملەكەت باسشىسىنىڭ جولداۋدا ايتقان تاپسىرماسىن ورىنداۋ ءۇشىن ازىرلەنىپ وتىر. بۇل قادام ەكسپورتتىق-كرەديتتىك اگەنتتىك قۇرۋعا باعىتتالعان. وعان ۇلتتىق ينستيتۋت مارتەبەسى بەرىلەتىن بولاتىن، – دەدى دەپۋتات.

رۋسلان قوجاسباەۆتىڭ ايتۋىنشا، زاڭ جوباسى شيكىزاتتىق ەمەس سەكتورعا باعىتتالعان. بۇل ءبىر تەرەزە قاعيداتى بويىنشا جۇمىس ىستەيدى.

بۇدان بيزنەس سالاسىنىڭ وكىلدەرى ۋاقىتتى ۇنەمدەيدى، سونىمەن قاتار مەملەكەتتىك قولداۋ شارالارى كەڭەيەتىن بولادى. قازىر ەكسپورتتاۋشى تاۋاردى شەتەلگە شىعارعىسى كەلسە، ءارتۇرلى قۇرىلىمدارعا جۇگىنۋى كەرەك. وسى زاڭ ارقىلى بارلىعىن ەكسپورتتىق-كرەديتتىك اگەنتتىك بازاسىندا جيناعىمىز كەلىپ وتىر، – دەدى دەپۋتات.

سونداي-اق، ول اگەنتتىك بيزنەس وكىلدەرىنە كەپىلدىك بەرەتىنىن، قولايلى پايىزبەن قارجىلاندىراتىنىن اتاپ ءوتتى. بۇل زاڭ جوباسى ارقىلى بيزنەس وكىلدەرىن ساقتاندىرۋ جانە قايتا ساقتاندىرۋمەن قاتار پايىزدىق مولشەرلەمەلەردى سۋبسيديالاۋ سياقتى قۇرالدار پايدا بولادى. ەكسپورتتىق وپەراتسيالارعا كەپىلدىك بەرىلىپ،  ەكسپورتتىق-كرەديتتىك اگەنتتىك قازاقستاننان تىس جەرلەردە كەپىل بولادى.

Abai.kz