"ادام ازاپتادى" دەپ ايىپتالعان شىڭعىسحان ايتباەۆ، مارات جونباي، تيمۋر ماجيتوۆ ءتورت جىلعا سوتتالسا، اسلانبەك تولەۋىشوۆ پەن ەربول سيعۋاتوۆ "ادام ازاپتاۋعا كومەكتەستى" دەگەن ايىپپەن ءۇش جىل تۇرمەگە كەسىلدى.

ۇكىم وقىلار كەزدە جابىرلەنۋشى دە، ادۆوكاتى دا قاتىسپادى. شاعىن سوت زالىندا سوتتالۋشىلاردىڭ تۋىستارى مەن جاقتاستارى كوپ جينالدى. ۇكىمنەن سوڭ سۋديا زاۋرە قازاقباي ايىپتالۋشىلاردى تۋىستارىمەن قوشتاسۋعا مۇمكىندىك بەردى.

سوتتالعان ەكس-پوليتسەيلەر اتىراۋ قالالىق پوليتسيا باسقارماسىندا جۇمىس ىستەگەن. تورتەۋى بۇيرىقپەن جۇمىستان بوساتىلعان، بىرەۋى ءوز ەركىمەن جۇمىستان كەتكەن. سوت ۇكىمىمەن ايىپتالعانداردىڭ ءبارى دە شەندەرىنەن جانە ورگانداردا قىزمەت ەتۋ قۇقىعىنان ءۇش جىل مەرزىمگە ايىرىلدى. سوتتالعاندار جازاسىن قاتاڭدىعى ورتاشا تۇرمەدە وتەۋى ءتيىس.

سونداي-اق، ۇكىمگە ساي، ارقايسىنان جابىرلەنۋشىگە 500 مىڭ تەڭگە مورالدىق وتەماقى وندىرىلەدى.

سوت ۇكىمى ءالى كۇشىنە ەنگەن جوق، تاراپتاردىڭ اپەللياتسيالىق شاعىم تۇسىرۋگە قۇقىعى بار.

سۋديا زاۋرە قازاقباي ايىپتالۋشىلاردىڭ كىناسى بەينەجازبالار سىندى ايعاقتارمەن دالەلدەنگەنىن ايتتى. الايدا سوتتالعانداردىڭ ادۆوكاتتارى رۋسلان جاكۋپوۆ پەن اسلان جولبولوۆ سوت ۇكىمىمەن كەلىسپەيتىنىن، اپەللياتسيالىق شاعىم تۇسىرەتىنىن جەتكىزدى. جاكۋپوۆ جابىرلەنۋشىنىڭ جاراقاتىنا قاتىستى جۇرگىزىلگەن سوت-مەديتسينالىق ساراپتامالار قورىتىندىلارىمەن كەلىسپەيدى.

سوت-مەديتسينالىق ساراپتاما ازاپتاۋ كەزىندە جابىرلەنۋشى رۋسلان قۋانىشقاليەۆكە "جەڭىل دەنە جاراقاتى كەلتىرىلگەنىن" دەگەن قورىتىندى شىعارعان. ونىڭ سول جاق قۇلاعىنىڭ دابىل جارعاعى زاقىمدانعان، سول كوزى جاراقاتتانعان. بىراق تەرگەۋ بۇل ساراپتامامەن كەلىسپەي ورالدا ەكىنشى ساراپتاما جۇرگىزەدى. قورعاۋ تارابى ەكىنشى ساراپتاماعا كۇدىك كەلتىرەدى. جاكۋپوۆتىڭ سوزىنشە، ساراپتاما 11 اقپاندا جۇرگىزىلگەن، بىراق ساراپتاما جۇرگىزۋ تۋرالى بۇيرىق ەكى كۇننەن كەيىن، 13 اقپاندا شىققان.

قۋانىشقاليەۆ بيىل اقپاندا ءوزىن پوليتسەيلەردىڭ ازاپتاعانى جونىندە ارىزدانعان. اقپاننىڭ باسىندا پوليتسيا قۋانىشقاليەۆكە ء"بىر ادامدى ۇرىپ-سوقتى" دەگەن ايىپ تاققان. قۋانىشقاليەۆ ايىپتى مويىنداماعان.

ايىپتاۋ اكتىسىندە ەكس-پوليتسەيلەر ء"وزارا ءسوز بايلاسىپ، قۋانىشقاليەۆتى قورقىتىپ مويىنداتۋ ماقساتىندا قاساقانا پسيحولوگيالىق قىسىم كورسەتىپ، قاتىگەزدىكپەن ازاپتاعانى" ايتىلادى.

تەرگەۋ قۇجاتتارىندا "قۋانىشقاليەۆ ايىپتى مويىنداماعان سوڭ ونىڭ اياقتارىن باسىپ تۇرىپ، باسىنا بىرنەشە رەت پاكەت كيگىزىپ، تۇنشىقتىرىپ، تىنىس الۋىن جانە قوزعالۋىن شەكتەگەنى، پسيحولوگيالىق-مورالدىق قىسىم كورسەتىپ، سوققىعا جىققانى" جازىلعان.

جابىرلەنۋشى سوتتا ايىپتالۋشىنىڭ ارقايسىسىنان 2 ملن تەڭگەدەن ءوندىرۋدى تالاپ ەتتى. ايىپتالۋشىلار بۇل تالاپپەن كەلىسپەگەن ەدى.

حالىقارالىق قۇقىق قورعاۋ ۇيىمدارى قازاقستان تۇرمەلەرى مەن قاماۋ ورىنداردا كۇدىكتىلەردەن تەرگەۋگە قاجەتى اقپاراتتى ازاپتاپ الاتىنى جايلى ءجيى ايتىلادى. قازاقستان بيلىگى تۇرمەدەگى ازاپتاۋ فاكتىلەرىن ءىشىنارا مويىنداپ، بۇل ماسەلەمەن كۇرەسەتىنىن مالىمدەگەن.

دەرەككوز:centralasian

Abai.kz