قر ۇلتتىق اكادەميالىق كىتاپحاناسىندا 2023 جىلدىڭ 2 جەلتوقسانى كۇنى، ساعات 15.00-دە اقىن، جازۋشى ۇلاربەك دالەيۇلىنىڭ «قارعىباۋلى قاسقىر» اتتى حيكايالار جيناعىنىڭ ادەبي تانىستىرىلىمى وتەدى.

كىتاپ جۋىردا «وتباسى حرەستوماتياسى» باسپاسىنان جارىق كورگەن.

«قارعىباۋلى قاسقىر» كىتابىنىڭ نەگىزگى وزەگى – كوشپەندىلەر رۋحى مەن تاريحي شايقاستار. تامىرى – ۇلى عۇن مەن كوك تۇرىكتەر داۋىرىنەن باستاۋ الاتىن جاۋىنگەرلىك حيكايالار. التاي بەتىن جايلاعان قازاقتاردىڭ اتامەكەنى ءۇشىن وتكەرگەن قيان-كەسكى سوعىسى، وعان باس بولعان قازاق مەرگەندەرىنىڭ ەرلىگى دەرەكتەر نەگىزىندە ورنەكتى تىلمەن باياندالادى.

نەگىزگى تامىرى كوشپەندى جۇرتتىڭ ەرلىك داڭقىنان قۋاتتانعان ەرەكشە جازۋ ءستيلى وقىرمان جۇرەگىنە جىگەر مەن نامىس وتىن قۇيادى. سونىمەن قاتار، اراسىن شەكارا تورى ءبولىپ جاتقان سوناۋ التايدا وتكەن بالالىق شاق، اۋىل تىرشىلىگىن ايتا وتىرىپ، بۇگىنگى كۇنى كوزدەن تاسا بولا باستاعان ۇلتتىق قۇندىلىقتار نەگىزىن تىلگە تيەك ەتەدى. كىتاپتىڭ ءونبويىنان جالاڭ قولمەن جاۋعا شابار اسقاق رۋح، قازاقتىڭ ەڭسەسىن كوتەرەر ەرەن ورلىك ەسىپ تۇر، تۋعان مەكەنگە، اتاجۇرت – التايعا  دەگەن سارىتاپ ساعىنىش اڭقىپ تۇر.

وسى ۋاقىتقا دەيىن ۇلاربەك دالەيۇلىنىڭ «قانىمداعى قاسقىر ءيىسى»، «كۇز جاۋعان سوقپاق» جىر جيناعى مەن «حات بارمايتىن قىستاق» اتتى اڭگىمەلەر جيناعى جارىق كورگەن ەدى.

جاڭا كىتاپتىڭ تانىستىرىلىمىنا زيالى قاۋىم وكىلدەرى، ەلىمىزگە بەلگىلى اقىن، جازۋشىلار، ادەبيەتسۇيەر قاۋىم، باق وكىلدەرى، جۋرناليستەر، وقىرماندار قاتىسادى دەپ كۇتىلۋدە.

قازاقستان رەسپۋبليكاسىنىڭ ۇلتتىق اكادەميالىق كىتاپحاناسى

بايلانىس اقپاراتتارى: استانا قالاسى،  دوستىق كوشەسى، 11.

e-mail: uak_2022@mail.ru

اككرەديتاتسيا ءۇشىن:  87027639151

Abai.kz