قازىر بارشا الەمنىڭ نازارى يتاليانىڭ ميلان قالاسىنا اۋدى. ادەتتەگىدەي، تاماشا فۋتبول كورىنىسىنە ەمەس، بوكسشىلار باسەكەسىنە كۋا بولۋ ءۇشىن. اراعا ەكى جىل سالىپ جالاۋىن كوتەرگەن بوكستان الەم چەمپيوناتىنا جەر شارىنىڭ 133 ەلىنەن 554 سپورتشى قاتىسۋدا. چيكاگوداعى بىرىنشىلىكتەن تەك 3 بوكسشىنىڭ كەمدىگىمەن  ەرەكشەلەنەتىن ميلان تورىندە  قازاق جىگىتتەرى جانكۇيەرلەرىنە جاعىمدى جاڭالىق سىيلاۋعا اسىعاتىن ەمەس. 11 سالماق دارەجەسى بويىنشا سىنعا تۇسكەن قازاق بوكسشىلارىنان 1/8 فينالعا 5 سپورتشى  سۇرىنبەي جەتىپ، ونىڭ ەكەۋى بىرىنشىلىكتى وسى ارادان اياقتادى. ال رەسەي قۇراماسىنىڭ 2 بوكسشىسى ساپتان شىقسا، كورشى وزبەك اعايىننىڭ 8 سپورتشىسى ءۇشىنشى اينالىمعا اپتىقپاي جەتتى. بوكستا باسقالاردان قارا ءۇزىپ كەتەتىن كۋبانىڭ ءجونى ءتىپتى بولەك...

قازىر بارشا الەمنىڭ نازارى يتاليانىڭ ميلان قالاسىنا اۋدى. ادەتتەگىدەي، تاماشا فۋتبول كورىنىسىنە ەمەس، بوكسشىلار باسەكەسىنە كۋا بولۋ ءۇشىن. اراعا ەكى جىل سالىپ جالاۋىن كوتەرگەن بوكستان الەم چەمپيوناتىنا جەر شارىنىڭ 133 ەلىنەن 554 سپورتشى قاتىسۋدا. چيكاگوداعى بىرىنشىلىكتەن تەك 3 بوكسشىنىڭ كەمدىگىمەن  ەرەكشەلەنەتىن ميلان تورىندە  قازاق جىگىتتەرى جانكۇيەرلەرىنە جاعىمدى جاڭالىق سىيلاۋعا اسىعاتىن ەمەس. 11 سالماق دارەجەسى بويىنشا سىنعا تۇسكەن قازاق بوكسشىلارىنان 1/8 فينالعا 5 سپورتشى  سۇرىنبەي جەتىپ، ونىڭ ەكەۋى بىرىنشىلىكتى وسى ارادان اياقتادى. ال رەسەي قۇراماسىنىڭ 2 بوكسشىسى ساپتان شىقسا، كورشى وزبەك اعايىننىڭ 8 سپورتشىسى ءۇشىنشى اينالىمعا اپتىقپاي جەتتى. بوكستا باسقالاردان قارا ءۇزىپ كەتەتىن كۋبانىڭ ءجونى ءتىپتى بولەك...

قازاقستان قۇراماسىنىڭ باس باپكەرى دامير بۋدانبەكوۆ ميلانعا اتتانار الدىندا «ايتەۋىر التىن الساق بولدى» دەپ ءسوزىن قىسقا قايىرعان. بۇعان سەبەپ تە جوق ەمەس، اۋىز تولتىرىپ ايتايىن دەسە، جاستاردان جاساقتالعان قۇرامانىڭ قانشالىقتى الىسقا شاباتىنىنا ءوزى دە كۇماندى. «كونەكوزدەردەن» تەك قانات ءابۋتالىپوۆ پەن سەرىك ساپيەۆتى ساپقا قوسىپ، ازيا التىنىن ولجالاعان ۆاسيلي لەۆيتكە ارقا سۇيەگەن باس باپكەر باسقا سالماقتاعى ءبىراز تاجىريبەلى، ەل تانىپ قالعان بوكسشىلارعا «قىرعيداي ءتيدى». الەم بىرىنشىلىگىنىڭ قولا جۇلدەگەرى، 48 كەلى سالماقتا سەنىمدى اقتايدى دەگەن ءبىرجان جاقىپوۆ سوڭعى كەزدەگى ساتسىزدىكتەرىنە وراي ادىلەت قاپەزوۆكە ورنىن بوساتىپ بەرگەن. الايدا، رينگتە تولىعىمەن شىڭدالىپ بىتپەگەن ادىلەت العاشقى اينالىمدا-اق تايلاندتىق قارسىلاسىنا جەڭىس سىيلادى. 57 كەلىدەگى جاڭا ەسىم ەرجان مۇسافيروۆ ءبىرىنشى بەلەسىن باعىندىرعانىمەن، كەلەسى كەزدەسۋىندە قارىق قىلمادى. كەزىندە بەكزات ساتتارحانوۆ پەن گاليب جافاروۆ اتوي سالعان بۇل سالماقتاعى «ساپارىمىزدى» تىم ەرتە اياقتاۋعا ءماجبۇر ەتكەن رەسەيلىك سەرگەي ۆودوپيانوۆ ەدى. وسى جىلدىڭ جازىندا وتكەن قۇرلىق بىرىنشىلىگىندە قولا مەدالدى جەڭىپ العان 51 كەلىدەگى ولجاس ساتتىباەۆ سوڭعى وليمپيادا ويىندارىنىڭ كۇمىس جۇلدەگەرى وبالي ءنورديندى باس كوتەرتپەي جەڭگەندەگى، «الىسقا بارادى-اۋ» دەگەن ويىمىز دا تەرىس بوپ شىقتى. 60 كەلىدەگى عاني جايلاۋوۆتىڭ جەڭىلىسىنە كيكبوكستان بوكسقا «قونىس اۋدارعان» 75 كەلى سالماقتاعى ازامات بەلگىباەۆتىڭ، ازيا چەمپيونى دەگەن دارداي اتاعى بار ۆاسيلي لەۆيتتتىڭ ءساتسىز قادامدارىن قوسىڭىز. كوڭىلگە مەدەت تۇك تە جوق! اسا اۋىر سالماقتاعى يۆان دىچكونىڭ شيرەك فينالعا شىعۋىنا رەسەيلىك قارسىلاسى دەنيس سەرگەەۆ مۇمكىندىك بەرمەدى. 1/8 فينالدا ۆەنگەر بوكسشىسىنان ايلاسىن اسىرعان قانات ءابۋتالىپوۆ بەيجىڭدەگى ويىندا جولىن بايلاعان كۋبالىق  الاركوننان اقىرى ەسەسىن الا الماي، الەم چەمپيوناتىن «مەرزىمىنەن بۇرىن» ءبىتىردى. ەندى تەك ەكى دۇركىن الەم چەمپيونى سەرىك ساپيەۆ پەن قىزىلوردالىق جاس تالانت رۋستام سىۆاەۆتىڭ جولىنا ۇمىتپەن قاراۋ قالدى قازاق جانكۇيەرىنە. الەم بىرىنشىلىگىندەگى بوكسشىلارىمىزدىڭ بىرىڭعاي جەڭىلىسكە ۇشىراۋىنا باستى سەبەپ نە سوندا؟ قۇراماداعى بەتكەۇستار بىلعارى قولعاپ شەبەرلەرى باقتيار ارتاەۆ، ەركەبۇلان شىناليەۆ، باقىت سارسەكباەۆتاردىڭ بوكستان ۋاقىتشا قول ۇزگەنى مە؟! راس، ءبىزدىڭ قۇرامادا بۋىن اۋىستىرۋ پروتسەسى ءجۇرىپ جاتىر، بىراق مۇنداي وقيعا كۋبالىقتاردىڭ دا باسىنان وتۋدە. الايدا،ولاردىڭ ءبىر-ەكى بوكسشىسى عانا جارىستى اياقتادى،  قالعاندارى قاتاردان شىعۋعا اسىعار ەمەس. ال ءبىر كەزدەرى ماريو كيندەلاننىڭ ءوزىن قايمىقتىرىپ، بوستاندىق ارالى وكىلدەرىمەن تەرەزەسى تەڭ ونەر كورسەتكەن قازاق بوكسى ءۇشىن بۇل ۇلكەن تراگەديا. «ءالى جاس قوي، الار اسۋى الدا» دەپ اقتاپ العانمەن، 20 جاسىندا وليمپ شىڭىن باعىندىرعان بەكزات ساتتارحانوۆتىڭ ەرلىگىن قايدا قوياسىز؟! مۇنداعى ەڭ باستى كىنارات - تالانتتاردىڭ دۇرىس تاڭدالماۋىندا. تاجىريبە جيناقتاعان دۇرىس شىعار، ايتكەنمەن الەم چەمپيوناتىنا جۇرت مەدال الىپ، ەل مارتەبەسىن كوتەرۋ ءۇشىن بارادى.  كيكبوكس پەن بوكس قانشا جەردەن ۇقساس بولعانىمەن، حالىقارالىق سايىستاردا باق سىناپ كورمەگەن بۇرىنعى «كيكبوكسشى» ازامات بەلگىباەۆتى بىردەن الەم بىرىنشىلىگىنىڭ «مايدانىنا» سالىپ جىبەرۋ بۋدانبەكوۆتىڭ باسىنا قايدان كەلگەن وي ەكەنى بەلگىسىز. ازيادا ابدىراپ قالعانمەن، بۇل سالماقتا ادىلبەك نيازىمبەتوۆتىڭ ميلانعا بارعانى دۇرىس شەشىم بولار ما ەدى؟! ەل بىرىنشىلىگىندە جارىتىپ ونەر كورسەتپەگەنمەن، وليمپيادا ويىندارىندا جيناعان تاجىريبەسى مەرەي اقشالوۆتىڭ الىسقا شابۋىنا سەپتىگىن تيگىزۋى مۇمكىن ەدى عوي؟! ءبىرجان جاقىپوۆ كوزى قاراقتى جانكۇيەر ءۇشىن ءبارىبىر ءوز سالماعىندا ءنومىرى ءبىرىنشى! ميلانداعى بوكس مەرەكەسىنىڭ مارەگە جەتۋگە از-اق قالدى. الدا ەڭ اۋىر ايقاستار مەن شەشۋشى كەزەڭدەر. بوكستى ۇلتتىق ويىنىنان كەم كورمەيتىن قازاق ءۇشىنشى چەمپيوندىعىنا قول سوزعان سەرىك ساپيەۆ پەن سىر ەلىنىڭ ساڭلاعى رۋستام سىۆاەۆقا ۇلكەن سەنىم ارتۋدا. ال الەم چەمپيوناتىن تاجىريبە الاڭىنا اينالدىرعان باس باپكەر دامير بۋدانبەكوۆ «جاۋىنگەرلەرىنىڭ» جەڭىلىسىن نەمەن تۇسىندىرەدى ەكەن؟!

فوتو: golpas.com, centrasia.ru, yvision.kz

اقىرىس سەيتقازى