«AMANAT» پارتياسى ايەلدەر قاناتىنىڭ I وتىرىسىنا قاتىسۋشىلار ادىلەتتى قازاقستاندى قۇرۋ ىسىندەگى ايەلدەر ءرولىن تالقىلادى.

«AMANAT» پارتياسى ايەلدەر قاناتىنىڭ I وتىرىسىنا وڭىرلەردەن كەلگەن 100-دەن استام بەلسەندى ايەل قاتىستى. ولار ەكى كۇن بويى ايەلدەردىڭ مەملەكەتتىڭ قوعامدىق-ساياسي ومىرىنە قاتىسۋ اياسىن كەڭەيتۋ، كاسىپكەر ايەلدەردى قولداۋ جانە ينكليۋزيۆتى قوعامدى دامىتۋ ماسەلەلەرىن تالقىلادى.

ءسوز باسىندا ءماجىلىس سپيكەرى، «AMANAT» توراعاسى ەرلان قوشانوۆ گەندەرلىك تەڭدىكتى قامتاماسىز ەتۋ، ايەلدەردىڭ قۇقىعىن قورعاۋ جانە وتباسىلىق قۇندىلىقتاردى نىعايتۋ ماسەلەسى ارقاشان مەملەكەت باسشىسى قاسىم-جومارت توقاەۆتىڭ نازارىندا ەكەنىن اتاپ ءوتتى.

«ايەلدەر قاناتى ءوز جۇمىسىن باستاعاننان كەيىن گەندەرلىك ماسەلەلەر بيىك مىنبەردەن ءجيى ايتىلا باستايدى. ءبىز بەلسەندى ايەلدەردىڭ باسىن قوسىپ قانا قويماي، شەشىم قابىلداۋعا جانە جاۋاپكەرشىلىكتى ءوز موينىنا الۋعا قابىلەتتى كوشباسشى ايەلدەردىڭ جاڭا بۋىنىن قالىپتاستىرۋىمىز كەرەك. قازىردىڭ وزىندە پارتيامىزدىڭ قاتارىندا جاۋاپتى جۇمىسقا، ونىڭ ىشىندە دەپۋتات، اكىم لاۋازىمدارىنا دايىن ايەلدەر وتە كوپ»، – دەدى ول.

دەلەگاتتار پرەزيدەنت جولداۋى مەن ونىڭ سايلاۋالدى باعدارلاماسى، سونداي-اق «AMANAT» پارتياسىنىڭ سايلاۋالدى باعدارلاماسى اياسىندا ەلىمىزدە انا مەن بالا باقىتتى ءومىر ءسۇرۋى ءۇشىن جاعىمدى جاعداي جاسالىپ جاتقانىنا نازار اۋداردى. اتاپ ايتقاندا، بالا كۇتىمىنە بەرىلەتىن تولەم 1,5 جاسقا دەيىن ۇزارتىلدى، كوپبالالى انالارعا تاعايىندالعان جاردەماقى مولشەرى ۇلعايتىلدى، الەۋمەتتىك جاعدايى وسال وتباسىدان شىققان 100 مىڭنان استام بالا بالاباقشالاردا تەگىن تاماقپەن قامتىلدى، ال 2024 جىلى 1 قاڭتاردان باستاپ «ۇلتتىق قور – بالالارعا» دەپ اتالاتىن مۇلدەم جاڭا باعدارلاما ىسكە قوسىلادى.

سونداي-اق، كەزدەسۋگە قاتىسۋشىلار اۋىل تۇرعىندارىنىڭ تابىسىن ارتتىرۋعا ارنالعان «اۋىل اماناتى» جوباسىنا قاتىسۋشىلاردىڭ شامامەن 30%-ى قىز-كەلىنشەكتەر ەكەنىن اتاپ ءوتتى.
ال قارجىلىق ساۋاتتى ارتتىرۋدى كوزدەيتىن «قارىزسىز قوعام» جوباسى تۇلەكتەرىنىڭ 58%-ى – كوپبالالى انالار.
ءوز كەزەگىندە، تارازدان كەلگەن دەلەگات، «جان شۋاق» سىيلىعىنىڭ لاۋرەاتى انار بەكسۇلتانوۆا ايەلدەر مەن الەۋمەتتىك كاسىپكەرلىكتى قولداۋدىڭ ماڭىزىنا توقتالدى.

«ءبىز بىرلەسىپ بيزنەستى عانا ەمەس، سونىمەن قاتار، كەز-كەلگەن قيىندىقتى جەڭىپ شىعۋعا دايىن كۇشتى، شەشىمدى ايەلدەر قاۋىمداستىعىن قۇرامىز. مەنىڭ تىگىن شەبەرحانامداعى ءار تىگىس ينكليۋزيۆتى بولاشاققا جاسالعان قادام سانالادى. وندا ءاربىر ادام فيزيكالىق ەرەكشەلىگىنە قاراماستان، قوعامعا ءوز ۇلەسىن قوسىپ، شىعارماشىلىعىن شىڭداي الادى»، – دەدى ول.

كوكشەتاۋدان كەلگەن دەلەگات ايناگۇل بالتاشەۆانىڭ ايتۋىنشا، ەرەكشە بالالاردى تاربيەلەپ وتىرعان انالارعا قولداۋ كورسەتۋ قاجەت.

«قابىلدانعان وزگەرىستەردىڭ ناتيجەسىندە، قۇرداستارىمەن تەڭ جاعدايدا ءبىلىم الىپ جاتقان ەرەكشە بالالارعا ارنايى پسيحولوگيالىق-پەداگوگيكالىق قولداۋ كورسەتۋ ءۇشىن مەملەكەتتىك ءبىلىم بەرۋ تاپسىرىسى ەنگىزىلدى. الايدا، ايماقتاردا مۇنداي مەكەمەلەر ءالى دە جەتكىلىكسىز.

سوندىقتان مەملەكەتتىك تاپسىرىستى ورنالاستىرا وتىرىپ، مۇمكىندىگى شەكتەۋلى بالالارعا ارنالعان ارنايى وڭالتۋ ورتالىقتارىن بارىنشا كوپ اشۋ قاجەت»، – دەدى ول.

«AMANAT» پارتياسىنىڭ حاتشىسى شولپان كارينوۆا ءىس-شارا مودەراتورى بولدى. جيىنعا قاتىسۋشىلار بىرقاتار باستاما كوتەردى. اتاپ ايتقاندا، وسكەلەڭ ۇرپاقتى تاربيەلەۋ جانە اسوتسيالدىق قۇبىلىستاردىڭ الدىن الۋ ماسەلەلەرى بويىنشا وبلىس اكىمدەرىنىڭ تۇراقتى تىڭداۋىن وتكىزۋ، ايەلدەردى سكرينينگتەن وتكىزۋ جانە ولاردىڭ دەنساۋلىعىن قاداعالاۋ ماقساتىندا «ايەل ساۋلىعى دەنى ساۋ ۇرپاق كەپىلى» جاڭا جوباسىن ىسكە قوسۋ سىندى ۇسىنىستار ايتىلدى.

سونىمەن قاتار، ۇلتتىق عىلىم اكادەمياسىنىڭ پرەزيدەنتى كۇنسۇلۋ زاكاريا «QazScience – AMANAT fest» حالىقارالىق عىلىم فەستيۆالىن وتكىزۋدى ۇسىندى. ايەلدەر قاناتىنىڭ تەڭ توراعاسى زارەما شاۋكەنوۆا جاڭا ەتيكالىق كودەكس پەن «پسيحولوگيالىق قىزمەت تۋرالى» زاڭدى ازىرلەۋ جونىندە باستاما كوتەردى. ءماجىلىس دەپۋتاتى جۇلدىز سۇلەيمەنوۆا ءوز ءسوزىن ايەل كوشباسشىلاردى دايارلاۋ ادىسىنە ارنادى، ال ونىڭ ارىپتەسى يۋليا كۋچينسكايا – حاراسسمەنت، گەندەرلىك بيۋدجەت جانە گەندەرلىك ساراپتاما ماسەلەلەرى بويىنشا زاڭدارعا تۇزەتۋلەر ەنگىزۋدى ۇسىندى.

Abai.kz