قازىرگى ۋاقىتتا مەملەكەت باسشىسى باستاعان اۋقىمدى وزگەرىستەر ورىن الۋدا. بۇل جاڭا بەلەستى باعىندىرعان تاريحي ۋاقىت بولدى. سونىڭ ىشىندە، مادەنيەت پەن يدەولوگيا سالاسىندا ۇلكەن باستامالار قولعا الىنىپ، «ادىلەتتى قازاقستان» كونتسەپتسياسىنىڭ ءىس جۇزىندەگى تۇعىرى ايقىندالا باستادى. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن بريفينگتە مادەنيەت جانە اقپارات ءمينيسترى ايدا بالاەۆا مالىمدەدى.

ۆەدومستۆو باسشىسى بۇل ەڭ الدىمەن ەل پرەزيدەنتىنىڭ ناقتى ءارى ءتيىمدى شەشىمدەرىنىڭ ارقاسىندا مۇمكىن بولعانىن اتاپ ءوتتى.

«قاسىم-جومارت كەمەلۇلىنىڭ جىل باسىنان بەرى ءارتۇرلى حالىقارالىق جانە رەسپۋبليكالىق شارالاردان بولەك، قوعام ماسەلەلەرىن ەرەكشە قوردالاعان ۇلتتىق قۇرىلتاي مەن ءداستۇرلى جولداۋىندا كوتەرگەن باستامالارى سالامىزعا تىڭ سەرپىلىس بەردى. قالىپتاسقان رۋحاني، اقپاراتتىق جاعدايعا تىكەلەي اسەر ەتەتىن بىرقاتار ماڭىزدى ءارى قاجەتتى زاڭدار مەن نومارتيۆتىك اكتىلەر قابىلداندى. قوعامنىڭ ينتەللەكتۋالدىق، شىعارماشىلىق، زايىرلى ورتاسىن كوتەرمەلەۋ ماقساتىندا پرەزيدەنت تاراپىنان ناقتى قادامدار جاسالىپ، ۇلكەن موتيۆاتسيالىق قولداۋ كورسەتىلدى»، - دەدى مينيستر.

ونىڭ ايتۋىنشا، بۇل باعىتتاعى بارلىق ماسەلەنى جۇيەلى ءارى ءتيىمدى شەشىپ وتىرۋ ءۇشىن مەملەكەت باسشىسى وسى جىلدىڭ قىركۇيەك ايىندا مادەنيەت جانە اقپارات مينيسترلىگىن قايتا قۇرۋ تۋرالى ساياسي شەشىم قابىلدادى.

«جالپى مينيسترلىكتىڭ قىزمەتى مەملەكەت پەن قوعام ءۇشىن اۋقىمدى، ماڭىزدى اقپارات، مادەنيەت، ازاماتتىق قوعام، ۇلتارالىق قاتىناس، ءدىن جانە جاستارمەن جۇمىس سياقتى سالالاردى قامتيدى»، - دەدى ا.بالاەۆا.

Abai.kz