قازاقستان «تاليباندى» تىيىم سالىنعان ۇيىمدار قاتارىنان الىپ تاستايدى
قازاقستان «تاليباندى» ەلدە تىيىم سالىنعان ۇيىمدار تىزىمىنەن شىعارادى. بۇل تۋرالى قر ءسىم رەسمي وكىلى ايبەك سمادياروۆ Kazinform تىلشىسىنە بەرگەن سۇحباتىندا ايتتى.
— اۋعانستان بيلىگىن قولعا العان «تاليبان» قوزعالىسى ءبىزدىڭ ەلدە تىيىم سالىنعان ۇيىمداردىڭ تىزىمىندە بولعانىن بىلەمىز. قازىر دە بۇل ۇيىم سول تىزىمدە مە؟
— قازاقستاندا تىيىم سالىنعان اۋماقتىق ۇيىمداردىڭ ۇلتتىق تىزىمىنە ونى وزەكتەندىرۋ ماقساتىندا تۇراقتى تۇردە رەۆيزيا جۇرگىزىلىپ تۇرادى.
اتالعان پروتسەسس اياسىندا، بۇۇ تاجىريبەسىنە سايكەس، «تاليبان قوزعالىسىن» ودان شىعارۋ تۋرالى شەشىم قابىلداندى.
— ياعني، بۇگىنگى تاڭدا بۇۇ دا «تاليبان» قوزعالىسىن تەرروريستىك دەپ تانىعان ۇيىمدار قاتارىنان شىعارعان بولىپ تۇر عوي؟
— بۇۇ قاۋىپسىزدىك كەڭەسىنىڭ ورىنداۋعا مىندەتتى قارارلارىنا سايكەس، «تاليبان قوزعالىسى» بۇۇ قاۋىپسىزدىك كەڭەسى تەرروريستىك دەپ تانىعان ۇيىمدار تىزىمىنە كىرمەيدى.
— ەندىگى جەردە قازاقستان مەن «تاليبان» اراسىنداعى ديپلوماتيالىق قارىم-قاتىناستار قالاي جۇرگىزىلەتىن بولادى؟
ساياسي بايلانىستارعا كەلەر بولساق، قازاقستان بۇدان ءارى دە قاۋىپسىزدىك كەڭەسى مەن بۇۇ باس اسسامبلەياسى قابىلدايتىن شەشىمدەر مەن قارارلاردى قاتاڭ ۇستاناتىنىن اتاپ وتكىم كەلەدى.
ەسكە سالا كەتەيىك، بۇگىندە تالىپتەر ءارتۇرلى ەلدەرمەن، سونىڭ ىشىندە قازاقستانمەن ديپلوماتيالىق قارىم-قاتىناس ورناتىپ، الەمدىك قاۋىمداستىق الدىندا ءوز بەدەلىن قالىپتاستىرۋعا تىرىسىپ جاتىر. ەڭ جاقىن كورشىلەرىمەن بەلسەندى ساۋدا بايلانىسىن قۇرۋعا كۇش سالۋدا.
فوتو: عالامتوردان
Abai.kz
