سەنات توراعاسى ماۋلەن اشىمباەۆ پرەزيدەنت قاسىم-جومارت توقاەۆتىڭ «ەگەمەن قازاقستان» گازەتىندەگى سۇحباتىنا وراي پىكىرىن جاريالادى. وندا بىلاي دەلىنگەن:

«ەگەمەن قازاقستان» گازەتىنە پرەزيدەنتىمىز قاسىم-جومارت كەمەلۇلى توقاەۆتىڭ كەڭ كولەمدى سۇحباتى جاريالاندى.

مەملەكەت باسشىسى سۇحباتتا بىرقاتار وزەكتى سۇراققا ەگجەي-تەگجەيلى جاۋاپ بەرىپ، ەل دامۋىنىڭ الداعى جىلدارداعى ستراتەگيالىق باعدارىن بايانداعان.

قاسىم-جومارت كەمەلۇلى اتاپ وتكەندەي، سوڭعى جىلداردا قازاقستاندا اسا ماڭىزدى ساياسي رەفورمالار جۇرگىزىلدى. سونىڭ ناتيجەسىندە بيلىك تارماقتارى اراسىندا تەجەمەلىك پەن تەپە-تەڭدىكتىڭ ءتيىمدى جۇيەسى قۇرىلدى. ساياسي ينستيتۋتتار نىعايتىلىپ، پارلامەنتتە كەڭ وكىلدىك قامتاماسىز ەتىلدى جانە ازاماتتاردىڭ قۇقىقتارىن قورعاۋدىڭ پارمەندى ينستيتۋتى رەتىندە كونستيتۋتسيالىق سوت قۇرىلدى.

مەملەكەت باسشىسى ايتقانداي، قازاقستانداعى ساياسي رەفورمالار جۇيەلى عانا ەمەس، ەشقاشان كەرى قايتپايتىن سيپاتقا يە بولدى. سەبەبى ۇلتتىڭ ساياسي سانا-سەزىمى تۇبەگەيلى وزگەردى. ازاماتتاردىڭ قۇقىقتىق ساۋاتتىلىعى مەن بەلسەندىلىگى دەموكراتيالىق جاڭعىرۋدىڭ باستى كەپىلىنە اينالدى. سوندىقتان كەرى كەتۋگە حالىقتىڭ ءوزى جول بەرمەيدى جانە ەلگە جاڭا لەپ اكەلگەن وسى وزگەرىستەردى تاباندىلىقپەن قورعايتىنى انىق.

جۇرتشىلىقتىڭ العاشقى اسەرىنە قاراپ-اق، قازاقستاندىقتار سۇحباتتا ايتىلعان ويلاردى تولىعىمەن قولدايدى دەۋگە تولىق نەگىز بار.

سونىمەن قاتار پرەزيدەنتىمىز قاسىرەتتى قاڭتار وقيعاسىنىڭ سەبەبى مەن وعان نە تۇرتكى بولعانىنا نازار اۋداردى. تەرگەۋ ناتيجەلەرى مەن وسى وقيعادان ءبارىمىز قانداي ساباق الۋىمىز قاجەت ەكەنىنە دە جان-جاقتى توقتالعان.

شىن مانىندە، ءبىز مەملەكەت باسشىسىنىڭ ەلىمىزدىڭ زاڭدارىنا، ۇلتتىق مۇددەلەرىنە جانە حالقىمىزدىڭ بىرلىگىنە نەگىزدەلگەن بەرىك ۇستانىمىنىڭ ارقاسىندا قازاقستاننىڭ جاڭا تاريحىنداعى ەڭ شيەلەنىستى كەزەڭدى ەڭسەرە الدىق.

ەندى ەلدى توقىراۋعا اكەلەتىن مۇنداي وقيعالار ەشقاشان قايتالانباۋى كەرەك. قازىرگى تاڭدا قوعامدا بۇل ماسەلە بويىنشا ناقتى كونسەنسۋس بار. وعان ەلىمىزدە پرەزيدەنتىمىزدىڭ باسشىلىعىمەن ىسكە اسىرىلىپ جاتقان دەموكراتيالىق وزگەرىستەر باستى كەپىل بولىپ وتىر.

مەملەكەت باسشىسى سۇحباتتا ەكونوميكالىق دامۋدىڭ نەگىزگى باسىمدىقتارىن دا ناقتى اتاپ ءوتتى. الداعى ۋاقىتتا وڭدەۋ ونەركاسىبى، ينفراقۇرىلىمدىق جوبالاردى ىسكە اسىرۋ، ەكونوميكانىڭ جاڭا سالالارىن دامىتۋ ساپالى ەكونوميكالىق وزگەرىستەردىڭ نەگىزگى درايۆەرلەرى بولماق. ەلىمىزدىڭ الدىندا 2029 جىلعا قاراي ەكونوميكا كولەمىن ەكى ەسەگە ارتتىرىپ، 450 ملرد اقش دوللارىنا جەتكىزۋ مىندەتى تۇر.

وسىعان بايلانىستى پارلامەنت بيىل بيۋدجەت، سالىق كودەكستەرىن جانە باسقا دا قاجەتتى زاڭداردى قابىلدايدى.

پرەزيدەنتىمىز ۇلت مۇددەسىن قورعاۋ، ونى ىلگەرىلەتۋ، سونداي-اق، ورنىقتى دامۋعا قولايلى جاعداي قالىپتاستىرۋ ءۇشىن قازاقستان ساليقالى جانە پراگماتيكالىق سىرتقى ساياساتتى جالعاستىراتىنىن ايتتى.

2024 جىلى ەلىمىز وڭىرلىك جانە حالىقارالىق دەڭگەيدەگى بىرقاتار ىقپالدى ۇيىمدارعا توراعالىق ەتەدى. بۇل – قازاقستاننىڭ حالىقارالىق قوعامداستىقتاعى جاۋاپتى جانە سەنىمدى سەرىكتەس رەتىندە مويىندالۋىنىڭ جارقىن كورىنىسى. ەلىمىز شەتەلدىك ينۆەستيتسيا ءۇشىن قولايلى جاعداي قالىپتاستىرادى. سونداي-اق ءوزىنىڭ بارلىق حالىقارالىق مىندەتتەمەلەرىن ورىنداپ، جاھاندىق جانە وڭىرلىك پروبلەمالاردى شەشۋگە ىقپال ەتەدى.

شەتەلدىك سەرىكتەستەر قازاقستانداعى تۇراقتىلىقتى، سىندارلى ديالوگ پەن جاسامپاز ىنتىماقتاستىقتى كوزدەيتىن باعداردى جوعارى باعالايدى.

مەملەكەت باسشىسىنىڭ سۇحباتىندا وسى جانە باسقا دا ماڭىزدى ماسەلەلەر جان-جاقتى تالقىلانعان. وندا قوعامدى الاڭداتقان كوپتەگەن ساۋالعا ناقتى جاۋاپ بەرىلگەن. سونداي-اق پرەزيدەنتىمىز سۇحباتتا دامۋدىڭ قازىرگى كەزەڭىندە مەملەكەتىمىزدىڭ الدىندا تۇرعان نەگىزگى مىندەتتەردى بەلگىلەپ بەردى.

وسىعان بايلانىستى ەل ەرتەڭىنە بەيجاي قارامايتىن بارشا ازاماتتاردىڭ، ساياسي جانە قوعامدىق ۇيىمداردىڭ پرەزيدەنتىمىز قاسىم-جومارت كەمەلۇلى توقاەۆتىڭ ساياسي، ەكونوميكالىق باعدارىنا قولداۋ ءبىلدىرىپ، مەملەكەت باسشىسىنىڭ ساياساتى توڭىرەگىنە توپتاسۋى، ادىلەتتى، دەموكراتيالىق جانە ينكليۋزيۆتى قازاقستان قۇرۋ جولىنداعى رەفورمالاردى ىسكە اسىرۋ ءۇشىن ءوز ۇلەسىن قوسۋى اسا ماڭىزدى.

بۇل – تاۋەلسىزدىگىمىزدىڭ تۇعىرىن نىعايتىپ، مەملەكەتىمىزدىڭ بولاشاعىن جارقىن ەتۋ ءۇشىن قاجەتتى شارت. وسى ماقساتتا ءبارىمىز بىرلەسىپ، ەلىمىزدىڭ دامۋى جولىندا ايانباي ەڭبەك ەتەمىز دەپ سەنەمىن.

ماۋلەن اشىمباەۆ

Abai.kz