ارىستا گاز باللونى جارىلىپ، ەكى ادام اۋرۋحاناعا ءتۇستى. دەنەسىن كۇيىك شالعان ەكى ادامنىڭ دا جاعدايى اۋىر. 

ارىس قالاسىنداعى قازىبەك بي كوشەسىندە ورنالاسقان ءۇش بىردەي كوممەرتسيالىق نىسان ورتكە وراندى.

سالدارىنان 50 ليتر گاز بالونى جارىلىپ، ەكى ادامنىڭ دەنەسىن كۇيىك شالدى. ءورت ءسوندىرۋ قىزمەتى وقيعا ورنىنا جەتكەن سوڭ، ناۋبايحانا ىشىنەن تاعى 2 دانا 50 ليتر جانە 2 دانا 25 ليتر گاز باللونىن قاۋىپسىز جەرگە شىعاردى.

«ءبىر قاباتتى شاتىر استىندا ورنالاسقان تەحنيكالىق قىزمەت كورسەتۋ ورتالىعى، ناۋبايحانا جانە دۇكەندى ءورت شالدى. 40 جاستاعى ەر ادام دەنەسىنىڭ 65-70 پايىزىن كۇيىك شالسا، 36 جاستاعى ەكىنشى ادام 25-30 پايىز كۇيىپ قالعان. قازىر ەكى زارداپ شەگۋشى دە ورتالىق اۋرۋحاناعا جاتقىزىلدى» دەلىنگەن تۇركىستان وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى تاراتقان اقپاراتتا.

فوتو: تۇركىستان وبلىسى تجد

Abai.kz