مارقا وڭىرىندەگى توسقايىڭ اۋىلىنىڭ تۇرعىندارى اعايىندى ۆولوگوۆتاردى ەرەكشە قۇرمەت تۇتادى. سەبەبى، بۇل اۋىلدا ۆاسيلي مەن سەرگەيگە ءىسى تۇسپەيتىن ادام جوق دەسە دە بولادى. تەمىردەن ءتۇيىن تۇيگەن، اعاشقا جان بىتىرگەن قوس شەبەر الدىنا كەلگەن جاننىڭ كوڭىلىن قالدىرىپ كورگەن ەمەس. اسىرەسە، قازىرگىدەي جۇرتتىڭ ءشوپ شاۋىپ، ەگىن جيناپ جاتقان شاعىندا ۆولوگوۆتاردىڭ قادىرى اسپانداپ-اق تۇر.

ويتكەنى، ولار وزدەرى قۇراستىرعان تەمىر دانەكەرلەيتىن، كەسەتىن، تەسەتىن اپپاراتتارىمەن كۇنىنە الدەنەشە سىنعان بولشەكتى جاماپ-جاسقاپ، كەسىپ-تەسىپ دەگەندەي، قالپىنا كەلتىرىپ وتىرادى. جاز بويى جاۋعان جاڭبىردان كەيىنگى اشىق كۇندەردە اۋىل تۇرعىندارى جانتالاسىپ قولداعى مالىنا ءشوپ شاۋىپ الۋعا كۇش سالاتىنى بەلگىلى. تەحنيكا بولعان سوڭ سىنباي تۇرمايدى. جۇمىستىڭ كۇيىپ تۇرعان ۋاقىتىندا ءبىر بولشەك سىنسا، شالعايداعى اۋىلدان ورتالىققا كەلىپ، ونى تاۋىپ الۋدىڭ وڭايعا تۇسپەيتىنى انىق. ءبىر ساعات ۋاقىتتىڭ ءوزى قات بولىپ تۇرعان كەزەڭدە بولشەك ىزدەپ، سابىلىپ جۇرەتىن جاعداي دا جوق. مىنە، سونداي كەزدە شارۋالار سالىپ ۇرىپ اعايىندى ۆولوگوۆتارعا كەلەدى. ولاردا بۇلدانۋ، سىلتاۋ ايتۋ دەگەن بولمايدى. جانە ۆاسيلي مەن سەرگەيدىڭ قولىنان جوندەلىپ شىققان بولشەكتىڭ زاۋىتتان جاڭا شىققان دۇنيەدەن ولقى تۇسپەيتىنىنە اۋىلداستارى سەنىمدى. جاعدايعا قاراسقاندى ءجون كورەتىن شەبەرلەر مۇمكىندىگى از اۋىلداستارىنا تەگىن دە كومەكتەسە بەرەدى.

مارقا وڭىرىندەگى توسقايىڭ اۋىلىنىڭ تۇرعىندارى اعايىندى ۆولوگوۆتاردى ەرەكشە قۇرمەت تۇتادى. سەبەبى، بۇل اۋىلدا ۆاسيلي مەن سەرگەيگە ءىسى تۇسپەيتىن ادام جوق دەسە دە بولادى. تەمىردەن ءتۇيىن تۇيگەن، اعاشقا جان بىتىرگەن قوس شەبەر الدىنا كەلگەن جاننىڭ كوڭىلىن قالدىرىپ كورگەن ەمەس. اسىرەسە، قازىرگىدەي جۇرتتىڭ ءشوپ شاۋىپ، ەگىن جيناپ جاتقان شاعىندا ۆولوگوۆتاردىڭ قادىرى اسپانداپ-اق تۇر.

ويتكەنى، ولار وزدەرى قۇراستىرعان تەمىر دانەكەرلەيتىن، كەسەتىن، تەسەتىن اپپاراتتارىمەن كۇنىنە الدەنەشە سىنعان بولشەكتى جاماپ-جاسقاپ، كەسىپ-تەسىپ دەگەندەي، قالپىنا كەلتىرىپ وتىرادى. جاز بويى جاۋعان جاڭبىردان كەيىنگى اشىق كۇندەردە اۋىل تۇرعىندارى جانتالاسىپ قولداعى مالىنا ءشوپ شاۋىپ الۋعا كۇش سالاتىنى بەلگىلى. تەحنيكا بولعان سوڭ سىنباي تۇرمايدى. جۇمىستىڭ كۇيىپ تۇرعان ۋاقىتىندا ءبىر بولشەك سىنسا، شالعايداعى اۋىلدان ورتالىققا كەلىپ، ونى تاۋىپ الۋدىڭ وڭايعا تۇسپەيتىنى انىق. ءبىر ساعات ۋاقىتتىڭ ءوزى قات بولىپ تۇرعان كەزەڭدە بولشەك ىزدەپ، سابىلىپ جۇرەتىن جاعداي دا جوق. مىنە، سونداي كەزدە شارۋالار سالىپ ۇرىپ اعايىندى ۆولوگوۆتارعا كەلەدى. ولاردا بۇلدانۋ، سىلتاۋ ايتۋ دەگەن بولمايدى. جانە ۆاسيلي مەن سەرگەيدىڭ قولىنان جوندەلىپ شىققان بولشەكتىڭ زاۋىتتان جاڭا شىققان دۇنيەدەن ولقى تۇسپەيتىنىنە اۋىلداستارى سەنىمدى. جاعدايعا قاراسقاندى ءجون كورەتىن شەبەرلەر مۇمكىندىگى از اۋىلداستارىنا تەگىن دە كومەكتەسە بەرەدى.

– بۇگىندە حالقى ازايىپ، ءۇي باسى شاعىندا-لىپ قالعان اۋىل ءۇشىن وسى ەكى ازاماتتىڭ شىن سۇيەنىشكە اينالعانى جالعان ەمەس، – دەيدى توسقايىڭ اۋىلدىق وكرۋگىنىڭ اكىمى ءاليجان بەتكەنباەۆ. – مەنىڭ ريزا بولاتىنىم – اعايىندى شەبەرلەردىڭ ەشقايدا كوشپەي، تۋعان جەردە حالقىنىڭ كادەسىنە جاراپ وتىرعانى. تۋمىسىنان قاراپايىم، كىشىپەيىل جاندار كىم كەلسە دە ويلانباستان قولۇشىن بەرۋگە ءازىر تۇرادى. سوندىقتان دا اۋىل جۇرتى ولاردى ەرەكشە سىيلاپ، ءاردايىم قۇرمەتتەپ جاتادى.

ۆولوگوۆتاردا دانەكەرلەۋ اپپاراتى، توكار ستانوگى، لەنتالى پيلوراما، كومپرەسسور، ەلەكتر بۇرعى، كورىگى دۇرىلدەپ تۇرعان ۇستاحانا سياقتى شارۋاشىلىققا قاجەتتى بارلىق قۇرال-سايماندار بار. جانە ولاردىڭ بارلىعى جۇمىس ىستەپ، جۇرت سۇرانىسىن قاناعاتتاندىرۋدا.

«قابا» سوۆحوزىندا كوپ جىلدار بويى دانەكەرلەۋشى بولىپ جۇمىس ىستەگەن سەرگەيدىڭ ءوز ءىسىنىڭ اسقان شەبەرى ەكەنىن توسقايىڭدىقتار جارىسا ايتىپ جاتادى.

اعايىندى ەكەۋى تۇرمىسقا قاجەتتى تەحنيكانى قولدان دا قۇراستىرىپ الا بەرەدى ەكەن. ماسەلەن، ولار جاقىندا كارتوپتى ءوزى ەگىپ، ءوزى قازاتىن ماشينە جاساپ شىعارىپتى. قىتاي ءوندىرىسىنىڭ كىشكەنتاي تراكتورىنا تىركەلگەن وسى ماشينە ۇلكەن باقشالىقتىڭ كارتوبىن از ۋاقىتتىڭ ىشىندە جيناپ الۋعا مۇمكىندىك بەرەدى.

ال سەرگەيدىڭ ءوزى قۇراستىرعان شوركە جاراتىن ماشينەسى وتىنعا ۇنەمى قاراعاي جاعاتىن قابالىقتار ءۇشىن وتە قاجەتتى قۇرال بولىپ وتىرعانى راس.

– قان قىسىمىم كوتەرىلىپ، اياقاستىنان سىرقاتتانىپ قالدىم، – دەيدى سەرگەي ءبىزدىڭ ساۋالىمىزعا قىسىلا جاۋاپ بەرىپ. – مەديتسينا تىلىمەن ايتقاندا، ينسۋلت الدىم. ەم-دومنىڭ ارقاسىندا دەنساۋلىعىم ءبىراز تۇزەلگەنىمەن، بۇرىنعىداي جۋان شوركەنى قۇلاشتاي ۇرىپ، جاراتىن جاعدايدىڭ ەندى بولمايتىنىن ۇعىندىم. ءسويتىپ، وسى اۋىر جۇمىستى جەڭىلدەتۋدىڭ امالىن قاراستىرا باستاعان بولاتىنمىن. اقىرىندا مىناداي تەحنيكا دۇنيەگە كەلدى.
وسىلاي دەپ ول بىزگە ءوز قيالىنان تۋعان تۋىندىنى كورسەتتى. ەندى وتىندى قارا تەر بولماي-اق ەلەكتر توگىنىڭ كۇشىمەن ۇساقتاپ، دايارلاۋعا بولادى ەكەن.

– مەن وسى جەردە تۋىپ-ءوستىم، – دەيدى سەرگەي ۆيتالەۆيچ، – ەشقايدا كوشەتىن ويىم جوق. توسقايىڭنىڭ بارشا تۇرعىنى تۋىسىم سەكىلدى، ءبىر-بىرىمىزگە دەگەن سىيلاستىعىمىز كۇشتى، ولاردى تاستاپ قايدا بارامىن؟ ال تانىس ادام الدەنەگە مۇقتاج بولىپ، جاردەم سۇراپ كەلىپ تۇرسا، قالاي باس تارتاسىڭ؟ شارۋا ەڭبەگىن جەڭىلدەتۋدىڭ جولىن ىزدەگەنىم – ەرىككەندىك ەمەس، تابيعاتى قاتال وڭىردە تاۋقىمەتتىڭ ءتۇر-ءتۇرىن كورىپ جۇرگەن اۋىلداستارىمنىڭ اۋىر ەڭبەگىن ءسال دە بولسا جەڭىلدەتۋگە تىرىسقانىم دەپ ءبىلىڭىز.

ءبىز سەرگەيدىڭ اعىنان جارىلىپ، اقيقاتىن ايتىپ تۇرعانىنا سەندىك. ادال دا ەڭبەكقور، ەلگەزەك، ءاردايىم ىزدەنىس ۇستىندە جۇرەتىن ازاماتتاردىڭ ورنى بولەك ەكەندىگىن دە مويىندادىق.

حاسەن زاكاريا

كۇرشىم اۋدانى.

Abai.kz