ۇكىمەت بيىل شەگىرتكەنىڭ جاپپاي تارالىپ كەتۋىنىڭ الدىن الۋ ءۇشىن ءتيىستى شارالار قابىلداپ جاتىر. وسىعان وراي قوسىمشا 4 ملرد تەڭگەگە جۋىق قاراجات ءبولىندى. پرەمەر-مينيستر ءاليحان سمايىلوۆ ءتيىستى قاۋلىعا قول قويدى. بۇل تۋرالى primeminister.kz جازدى. 

ەلىمىزدە سوڭعى جىلدارى ءۇيىرلى شەگىرتكەلەردىڭ تارالۋ الاڭىنىڭ ۇلعايعانى بايقالادى:

2020 جىلى – 514 مىڭ گا;

2021 جىلى – 626 مىڭ گا;

2022 جىلى – 975 مىڭ گا;

2023 جىلى تارالۋ الاڭى 1 585 مىڭ گا بولادى دەپ بولجانعانىمەن، ءىس جۇزىندە 1 616 مىڭ گا وڭدەلدى.

2023-2024 جىلدارعا شەگىرتكەنىڭ جاپپاي تارالۋىنىڭ 11 جىلدىق تسيكلىنىڭ ۇدەمەلى كەزى سايكەس كەلەدى.

بيىل رەسپۋبليكالىق بيۋدجەتتەن 1 270,6 مىڭ گا الاڭدى وڭدەۋگە 4,2 ملرد تەڭگە بولىنگەن ەدى. الايدا، 2024 جىلى ناقتىلانعان جالپى بولجام بويىنشا ءۇيىرلى شەگىرتكەنىڭ تارالۋ الاڭى ۇلعايىپ، 2,5 ملن گا قۇرادى. بۇل وتكەن جىلمەن سالىستىرعاندا، شامامەن 1 ملن گەكتارعا ارتىق.

بولىنگەن قوسىمشا قاراجات 1,3 ملن گا الاڭدا زيانكەس ءۇيىرلى شەگىرتكەگە قارسى حيميالىق وڭدەۋ جۇمىستارىن جۇرگىزۋگە باعىتتالادى.

فوتو: egemen.kz

Abai.kz