قازاقستان پارلامەنتىندە قارالىپ جاتقان "ماسس-مەديا جونىندە" زاڭ جوباسى ەلدەگى ءسوز ەركىندىگىنىڭ جاعدايىنا كەرى اسەرىن تيگىزۋى مۇمكىن. بۇل جونىندە International Press Institute (IPI) ۇيىمىنىڭ مالىمدەمەسىندە جازىلعان.

باس كەڭسەسى ۆەنادا ورنالاسقان حالىقارالىق ۇيىم قۇجات قازىرگى قالپىندا قابىلدانسا، شەتەلدىك باق-تىڭ قازاقستانداعى جۇمىسى شەكتەلىپ، ونلاين-باسىلىمدارعا دا ۇكىمەت تىركەۋىنە تۇرۋعا مىندەتتەيتىنى اتاپ وتىلگەن. ۇيىم مالىمدەمەسىندە استانانى داۋلى وزگەرىستەردى ەنگىزۋدەن باس تارتۋعا شاقىردى.

وتكەن اپتادا پارلامەنتكە "ماسس-مەديا جونىندەگى" زاڭ جوباسى ەنگىزىلگەن. وندا سىرتقى ىستەر مينيسترلىگىنىڭ اككرەديتاتسياسىن الماعان شەتەلدىك باق پەن جۋرناليستەرىنە جۇمىس ىستەۋگە تىيىم سالىنادى.

زاڭ جوباسىنا سايكەس، ءسىم "ۇلتتىق قاۋىپسىزدىككە قاۋىپ اكەلەدى" دەپ ەسەپتەيتىن شەتەلدىك باسىلىمدارعا دا اككرەديتاتسيا بەرمەۋ قۇقىعىنا يە بولادى.

قازىر قازاقستان سىرتقى ىستەر مينيسترلىگى ازاتتىقتىڭ 36 تىلشىسىنە اككرەديتاتسيا بەرمەي كەلەدى نەمەسە اككرەديتاتسيا مەرزىمىن ۇزارتپاي جاتىر. ولاردىڭ اراسىندا 2022 جىلدان بەرى اككرەديتاتسياسى ۇزارماعان جۋرناليستەر بار. رەداكتسيا بارلىق قۇجاتتاردى بىرنەشە رەت جانە ۋاقىتىلى تاپسىرعان. تاعى بىرنەشە ءجۋرناليستىڭ اككرەديتاتسيا مەرزىمى بيىل اياقتالادى. ەرەجەگە سايكەس، سىرتقى ىستەر مينيسترلىگى شەتەل اقپارات قۇرالىنىڭ تىلشىسىنە اككرەديتاتسيا بەرۋ نەمەسە بەرمەۋ تۋرالى شەشىمدى ءوتىنىش تۇسكەن كۇننەن باستاپ ەكى اي ىشىندە قابىلداۋى كەرەك. اككرەديتاتسيا بەرىلمەگەن جاعدايدا مينيسترلىك شەشىمىن نەگىزدەۋى ءتيىس. ال ۋاكىلەتتى ورگان مۇنى زاڭمەن قاراستىرىلعان مەرزىمدە ورىنداعان جوق.

2023 جىلى قىركۇيەك پەن قازاندا ازاتتىق 30-دان استام قىزمەتكەرىنە اككرەديتاتسيا بەرۋ جانە مەرزىمىن ۇزارتۋ تۋرالى تاعى ءوتىنىش تۇسىرگەن، بىراق ناقتى جاۋاپ الماعان.

قازان ايىندا استانا قالاسىنىڭ مامانداندىرىلعان اۋدانارالىق اكىمشىلىك سوتى داۋدى مەدياتسيا تارتىبىمەن شەشۋ تۋرالى كەلىسىمدى بەكىتكەن. وعان سايكەس، مينيسترلىك جاۋاپتى 2023 جىلدىڭ 30 جەلتوقسانىنا دەيىن بەرۋگە ءتيىس بولعان. جاۋاپ 2024 جىلى 3 قاڭتاردا كەلىپ ءتۇستى. وندا قازاقستان ءسىم ازاتتىققا تىلشىلەرىنە اككرەديتاتسيا بەرمەيتىنىن حابارلادى.

30 قاڭتاردا ازات ەۋروپا/ازاتتىق راديوسى - قازاقستان وكىلدىگى (RFE/RL-قازاقستان) استانا قالاسىنىڭ مامانداندىرىلعان اۋدانارالىق اكىمشىلىك سوتىنا ارىز ءتۇسىردى.

ارىزدا وكىلدىك ازاتتىق تىلشىلەرىنە اككرەديتاتسيا بەرمەگەن نەمەسە اككرەديتاتسيا مەرزىمىن ۇزارتپاعان قازاقستان ءسىم-ءنىڭ شەشىمىن زاڭسىز دەپ تانىپ، كۇشىن جويۋدى سۇراعان.

مينيسترلىككە قارسى شاعىم 2024 جىلدىڭ 3 قاڭتارىندا ازات ەۋروپا/ازاتتىق راديوسىنا قازاقستان سىرتقى ىستەر مينيسترلىگىنەن "وكىلدىكتىڭ 36 قىزمەتكەرىن اككرەديتتەۋدەن نەمەسە اككرەديتاتسيا مەرزىمىن ۇزارتۋدان باس تارتۋ تۋرالى شەشىم قابىلدانعانى جونىندە" حات كەلگەننەن كەيىن تۇسىرىلگەن.

فوتو: IPI facebook پاراقشاسى

Abai.kz