قازاقستاندا اقبوكەندەردى اتۋ توقتاتىلدى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانباەۆ باياندادى، دەپ حابارلايدى Abai.kz.

ءمينيستردىڭ ايتۋىنشا، كيىكتى اتۋ وتاندىق عالىمدارمەن جانە حالىقارالىق ساراپشىلارمەن كونسۋلتاتسيالار مەن تالقىلاۋلاردان كەيىن توقتاتىلعان.

– قىستا قوزعالىس قيىن. سوندىقتان 10 اقپاننان باستاپ ءبىز اقبوكەندەردىڭ سانىن رەتتەۋ پروتسەسىن توقتاتتىق. بىلتىرعى جىلدى ەسكەرە وتىرىپ، بيىل مامىر ايىندا ەگجەي-تەگجەيلى ەسەپ جۇرگىزىلەدى", - دەدى ەكولوگيا مينيسترلىگىنىڭ باسشىسى ءماجىلىس كۋلۋارىندا.

بۇل شەشىم 10 اقپاننان باستاپ كۇشىنە ەندى. بولجام بويىنشا اتالمىش اڭداردى اتۋ توقتاتىلسا، كوكتەمدە اقبوكەن سانىنىڭ 40% ارتۋى بولجانىپ وتىر. ال بىلتىرعى پوپۋلياتسيانى ەسكەرگەندە ولاردىڭ سانى شامامەن 2,5–2,6 ملن باستى قۇرايدى.

ال تاياۋدا ەكولوگيا جانە تابيعي رەسۋرستار مينيسترلىگى 2024 جىلى كيىكتى اتۋعا اۋەسقويلارعا دا رۇقسات بەرۋ ماسەلەسىن پىسىقتاپ جاتقانى حابارلانعان ەدى.

Abai.kz