جاس بالانى ولتىرگەنى نەمەسە پەدوفيليا ءۇشىن ءومىر بويى باس بوستاندىعىنان ايىرۋ جازاسى بەرىلەدى. بۇل تۋرالى ءماجىلىس ءباسپاسوزى حابارلادى.

ءماجىلىس ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋگە باعىتتالعان زاڭ جوبالارىن ءبىرىنشى وقىلىمدا ماقۇلدادى. قۇجات مەملەكەت باسشىسىنىڭ جولداۋىنداعى تاپسىرمالارىن ىسكە اسىرۋ ءۇشىن دەپۋتاتتاردىڭ باستاماسىمەن ازىرلەندى.

زاڭ جوبالارىنا زورلىق-زومبىلىققا، باسقا دا قاتىگەزدىككە نەمەسە ادامنىڭ ار-نامىسىن قورلاۋعا جول بەرمەۋ ءۇشىن بىرقاتار نورما ەنگىزىلەدى.

بىرىنشىدەن، دەنساۋلىققا جەڭىل زيان كەلتىرگەنى ءۇشىن 200 اەك دەيىن ايىپپۇل تۇرىندەگى جازا نە 200 ساعاتقا دەيىن قوعامدىق جۇمىستارعا تارتۋ نەمەسە 50 تاۋلىككە دەيىن قاماۋعا الۋ;

ۇرىپ-سوققانى ءۇشىن 80 اەك-كە دەيىن ايىپپۇل نە 80 ساعاتقا دەيىن قوعامدىق جۇمىستارعا تارتۋ نەمەسە 25 تاۋلىككە دەيىن قاماۋعا الۋ.

ەكىنشىدەن، كامەلەتكە تولماعان نە دارمەنسىز كۇيدەگى ادامدى ازاپتاۋ، دەنساۋلىعىنا اۋىر جانە ورتاشا زيان كەلتىرگەنى ءۇشىن جازانىڭ «باس بوستاندىعىن شەكتەۋ» بالاما ءتۇرى الىنىپ تاستالىپ، تەك باس بوستاندىعىنان ايىرۋ;

جاس بالانى ولتىرگەنى نەمەسە پەدوفيليا ءۇشىن «ءومىر بويى باس بوستاندىعىنان ايىرۋ» جازاسى قولدانىلادى.

ۇشىنشىدەن، كامەلەتكە تولماعاندارعا قاتىستى نەمەسە وتباسىندا اكىمشىلىك، قىلمىستىق قۇقىق بۇزۋشىلىق جاساعان ادامداردىڭ مىنەز-قۇلقىنا ەرەكشە تالاپتار قولدانىلادى. اتاپ ايتقاندا، سوت شەشىمى بويىنشا ولاردان مەديتسينالىق ۇيىمداردان پسيحولوگيالىق كومەك تالاپ ەتىلۋى مۇمكىن. سونداي-اق زورلىق-زومبىلىق دەرەكتەرىن ۋاقىتىلى انىقتاۋ ءۇشىن ۋاكىلەتتى ورگانداردىڭ بۇقارالىق اقپارات قۇرالدارىنداعى حابارلامالارعا دەن قويۋ مۇمكىندىگى قاراستىرىلعان.

Abai.kz