ەندى قىرعىزستاندا كرەماتسيالاۋعا جول بەرىلمەك. ەلدە قازىرگى تاڭدا كرەماتوريلەر سالىنۋ جوسپارلانۋدا. ولار تەك قالالاردا جۇمىس ىستەيدى جانە بۇل ءتاسىلدى مەملەكەتتىك ورگاندار ارقىلى عانا قولدانۋعا بولادى، دەپ حابارلايدى Abai.kz.

قىرعىزستان پارلامەنتىنىڭ دەپۋتاتى مارلەن ماماتاليەۆ ەلدە مەملەكەتتىك كرەماتوريلەر سالىناتىنىن ايتقان بولاتىن. دەپۋتاتتىڭ پىكىرىن ەلەپ، مارقۇمدى ورتەۋ كەرەك دەگەن پىكىردى قولدايتىندار از بولمادى.

- قازىر بۇل زاڭدا بەلگىلى ءبىر ءدىن وكىلدەرىن كرەماتسيالاۋ مۇمكىندىگى قاراستىرىلعان. كرەماتوريلەر ءتۇرلى اۋرۋدان ولگەن جانۋارلارعا دا ارنالعان. قازىر ولاردىڭ مايىتتەرى قاراپايىم قوقىسقا لاقتىرىلىپ جاتىر، - دەدى مارلەن ماماتاليەۆ.

دەپۋتات كرەماتوريلەر ۇكىمەت قارجىسىنا قىرعىزستان قالالارىندا عانا سالىناتىنىن ايتتى.

- كرەماتسيالاۋ جۇمىستارىن قاتاڭ تۇردە ءتيىستى ورگاندار جۇزەگە اسىرادى. تۋىستارى راستاۋ قۇجاتتارىن كورسەتۋى كەرەك. كىم قالاسا، سول جاساي سالاتىنداي وڭاي نارسە بولمايدى، - دەدى ماماتاليەۆ.

Abai.kz