«AMANAT» پارتياسى «قارىزسىز قوعام» جوباسىنىڭ ارالىق قورىتىندىسىن شىعاردى. بيىل قاڭتار-اقپان ايلارىندا ەل اۋماعىنداعى 15 مىڭ وتانداسىمىز قارجىلىق ساۋاتىن ارتتىرىپ، وقىتۋ كۋرسىنان ءوتتى.

فوتو: ءالي عالىم

«قارىزسىز قوعام» جوباسىنا قاتىسقان 100-دەن استام ايەل بۇگىن العىس ايتۋ كۇنى جانە الداعى 8 ناۋرىز مەرەكەسى قارساڭىندا استانادا ارنايى باس قوسىپ، قارىزدان قۇتىلۋدىڭ، وتباسى تابىسىن ارتتىرۋدىڭ تاجىريبەسىمەن ءبولىستى.

فوتو: ءالي عالىم

ءماجىلىس سپيكەرى، «AMANAT» توراعاسى ەرلان قوشانوۆ پرەزيدەنت ەل ازاماتتارىنىڭ شامادان تىس نەسيە الۋى ماسەلەسىنە بىرنەشە رەت نازار اۋدارعانىن اتاپ ءوتتى. مەملەكەت باسشىسىنىڭ تاپسىرماسى بويىنشا قيىن جاعدايعا تاپ بولعان وتباسىلاردىڭ نەسيەسى كەشىرىلىپ، جەكە تۇلعالاردىڭ بانكروتتىعى تۋرالى زاڭ قابىلداندى، حالىقتىڭ نەسيەگە تاۋەلدىلىگىن تومەندەتۋ بويىنشا جاڭا زاڭنامالىق تۇزەتۋلەر ازىرلەنۋدە. بىراق تاجىريبە كورسەتكەندەي، بۇل كۇردەلى الەۋمەتتىك ماسەلەنى شەشۋ ءۇشىن قوعامدا جاڭا «قارجىلىق مادەنيەت» قالىپتاستىرۋ قاجەت.

«وزدەرىڭىز بىلەتىندەي، پارتيا «قارىزسىز قوعام» جوباسىن جۇزەگە اسىرۋ جونىندە تىڭ باستاما كوتەردى. پرەزيدەنت قاسىم-جومارت توقاەۆ ونى قولداپ، ونىڭ اۋقىمىن جالپىحالىقتىق دەڭگەيگە شىعارۋدى تاپسىردى. بۇل جۇمىسقا ۇكىمەت پەن ۇلتتىق بانك قوسىلدى. «قارىزسىز قوعام» جوباسى قارىزعا بەلشەدەن باتىپ، ءۇمىتىن ۇزگەندەرگە ناقتى قولداۋ كورسەتەدى. جوبا قولدا بار قاراجاتقا ءومىر سۇرۋگە، قاجەتسىز نەسيەدەن باس تارتۋعا ۇيرەتەدى. بارلىق ايماقتاعى ازاماتتار بۇل جوباعا قولداۋ ءبىلدىرىپ، ونى جالعاستىرۋدى سۇراپ وتىر»، – دەدى ول.

فوتو: ءالي عالىم

2024 جىلى ەلىمىزدىڭ بارلىق وڭىرىندە 200 مىڭ ادام قاراجاتقا جاۋاپكەرشىلىكپەن قاراپ، تابىستى ارتتىرۋدىڭ ءادىس-ءتاسىلىن ۇيرەنەدى. بۇعان قوسا، مەكتەپ، كوللەدج جانە جوعارى وقۋ ورنىنا ارنالعان وقۋ قۇرالدارى ازىرلەنەدى. بۇل قادام 100 مىڭعا جۋىق ستۋدەنت پەن 450 مىڭ جوعارى سىنىپ وقۋشىلارىنىڭ ساۋاتىن ارتتىرۋعا مۇمكىندىك بەرەدى. وسىلايشا، جوبا اياسىندا 750 مىڭ ادام قامتىلادى.

«AMANAT» پارتياسى «قارىزسىز قوعام» جوباسىن ۇنەمى جەتىلدىرىپ كەلەدى. جوباعا قاتىسۋشىلاردىڭ 75%-ى – ايەلدەر. ونىڭ جارتىسىنان كوبىسى – كوپبالالى انالار. پارتيا ولارعا جاعدايدى جاقسارتۋدىڭ جاڭا قۇرالىن ۇسىندى. اتاپ ايتقاندا، وقۋدان وتكەن ايەلدەر جەكە كاسىبىن باستاۋ ءۇشىن قايتارىمدى گرانت پەن ليزينگكە قۇرال-جابدىق ساتىپ الا الادى. باستاما اياسىندا جىل سوڭىنا دەيىن 3500 ايەلدى قامتۋ جوسپارلانۋدا.

«بۇل رەتتە، ءبىز بۇگىنگى كەزدەسۋگە قاتىسىپ وتىرعان كاسىپكەر ايەلدەردىڭ تاجىريبەسىنە سۇيەنگىمىز كەلەدى. سىزدەردىڭ مىندەتتەرىڭىز – جوبا تالىمگەرلەرىمەن بىرلەسىپ، ايەلدەردى وقىتۋ جانە ولاردى تۇراقتى تابىس تاباتىن دەڭگەيگە جەتكىزۋ. ولار وزدەرىڭىزگە قاراپ بوي تۇزەيدى. سىزدەر ۇلگى بولۋلارىڭىز كەرەك. بۇل – «قارىزسىز قوعام» جوباسىن جۇزەگە اسىرۋدىڭ جاڭا كەزەڭى»، – دەدى ەرلان قوشانوۆ.

فوتو: ءالي عالىم

بۇدان سوڭ، «قارىزسىز قوعام» جوباسىنا قاتىسۋشىلار ءسوز الدى. ماسەلەن، تۇركىستان وبلىسىنان كەلگەن ءتورت بالانىڭ اناسى اينۇر ەسەنوۆا العاشىندا «قارىزسىز قوعام» جوباسىنا سەنىمسىزدىكپەن قاراعانىن مويىندادى. الايدا، وقىتۋ كۋرسى اياقتالعاننان كەيىن، ول وتباسىلىق بيۋدجەتتى دۇرىس باسقارۋدى ۇيرەنىپ قانا قويماي، تابىستى ارتتىرۋدىڭ جولىن تاپتى.

«اۋىلداستارىمنان ءسۇت جيناپ، ودان كۇرت-ماي جاساپ ساتامىن. قازىر ءۇي تۇرعىزىپ جاتىرمىز. قۇرىلىس جۇمىسى ءالى اياقتالعان جوق. ەسەسىنە، جاڭا تەرەزە مەن باتارەيا الۋعا قاجەت قاراجات تاپتىم. سونىمەن قاتار، «اۋىل اماناتى» جوباسى اياسىندا جەڭىلدىكپەن 4,2 ملن تەڭگە نەسيە الىپ، وعان 8 باس مال ساتىپ الدىم. اي سايىن 250 مىڭ تەڭگە كولەمىندە تۇراقتى تابىس تاۋىپ وتىرمىن»، – دەدى ول.

فوتو: ءالي عالىم

ال ماڭعىستاۋ وبلىسىنىڭ قاتىسۋشىسى اسىلتاس قۋاتباەۆا جوباعا قاتىسقانعا دەيىن جالاقىسىنىڭ جارتىسىن قارىز قايتارۋعا جۇمساپ كەلدى. جۇبايى جۇمىسىنان ايىرىلعان سوڭ، كوپبالالى وتباسىنىڭ قارجىلىق جاعدايى ناشارلاپ كەتتى.

«قارىزسىز قوعام» جوباسىنىڭ ساراپشىلارى ءوتىنىم رەسىمدەۋگە كومەكتەسىپ، سول ارقىلى مەملەكەتتەن ءوز ءىسىمىزدى باستاۋعا مۇمكىندىك بەرگەن گرانت الدىق. ناتيجەسىندە، قۇس ەتىنەن شۇجىق ونىمدەرىن وندىرەتىن كاسىپورىن اشتىق. قازىر كاسىبىمىزدى ارى قاراي دامىتىپ جاتىرمىز. وتباسىلىق تابىسىمىز 650 مىڭ تەڭگەدەن اسىپ، قارىزىمىزدىڭ كوپ بولىگىنەن قۇتىلدىق»، – دەدى ول.

ايتا كەتەيىك، بيىل جوبانى جۇزەگە اسىرۋعا 9 كوممەرتسيالىق بانك پەن 11 مەملەكەتتىك ورگان قاتىسۋدا. جوباعا قاتىسۋعا نيەت بىلدىرۋشىلەرگە ىڭعايلى بولۋ ءۇشىن qogamfin.kz. ونلاين-پلاتفورماسى ازىرلەندى. سايت ارقىلى وقىتۋ كۋرسىنا جازىلىپ، پايدالى ماتەريالدار مەن بەينە ساباقتاردى جۇكتەپ الۋعا بولادى.

ءىس-شارا بارىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ, Halyk bank-تىڭ باسقارما توراعاسى ءۇمىت شاياحمەتوۆا, «قارىزسىز قوعام» جوباسىنىڭ جەتەكشىسى اقمارال بەكمۇرزاەۆا جانە وڭىرلەردەن كەلگەن جوبا تۇلەكتەرى ءسوز سويلەدى.

Abai.kz