مادەنيەت جانە اقپارات ءمينيسترى ايدا بالاەۆا اتىشۋلى قۋاندىق بيشىمباەۆتىڭ ىسىنە قاتىستى پىكىر ءبىلدىردى، - دەپ حابارلايدى Dalanews.kz.

ء"بىزدىڭ ەلدە تسەنزۋراعا تىيىم سالىنادى، ال مەديا ويىنشىلار كوبىنە "تىيىم سالىنباعاننىڭ بارىنە رۇقسات ەتىلەدى" قاعيداتى بويىنشا جۇمىس ىستەيدى. ءبىز جاقىندا جۋرناليستىك ەتيكاعا ارنالعان دوڭگەلەك ۇستەل وتكىزدىك جانە سول جەردە ءجۋرناليستىڭ ەتيكاسى ءوز-ءوزىن قاداعالاۋ شەگىندە بولۋى كەرەك دەگەن قورىتىندىعا كەلدىك.

بۇگىندە كورىپ وتىرعانىمىزداي، ءوزىن-ءوزى قاداعالاۋ دەگەن نارسە كوبىنە جۇمىس ىستەمەيدى، اسىرەسە، ويىنشىلاردى "قىزىقتىرۋعا" بولاتىن كەزدە.

ءبىز مەحانيزمدەردى تۇسىنەمىز جانە بيشىمباەۆ ىسىندە بۇگىن بولىپ جاتقان مەديا ناۋقاننىڭ قالپىن كورىپ وتىرمىز. وكىنىشكە قاراي، تەرىس مۇددەنى باسشىلىققا الا وتىرىپ، بارلىق قابىلدانعان جالپىادامزاتتىق نورمالار مەن قاعيدالارعا قايشى، وتىرىك ءارى قوعامدىق سانانى مانيپۋلياتسيالاۋمەن اينالىساتىن ادامدار قوعامنان شەتتەتىلەدى. ويتكەنى قوعام اقىماق ەمەس.

مەن ارقاشان كاسىبي جۋرناليستەر قاۋىمداستىعىن باعالاۋ كەرەك دەپ ايتاتىنمىن. ولار - ويلى، اقىلدى جانە كۇشتى ادامدار", - دەدى مينيستر Tengrinews.kz-كە بەرگەن سۇحباتىندا.

بۇعان دەيىن ايتىسكەر اقىن، ءماجىلىس دەپۋتاتى رينات زايىتوۆ تا ەكس-مينيستر قۋاندىق بيشىمباەۆقا قاتىستى ءجۇرىپ جاتقان وسى اقپاراتتىق ناۋقانعا پىكىر ءبىلدىردى.

زايىتوۆتىڭ سوزىنشە، بيشىمباەۆ تا حالىقتى وڭاي الداۋدى بىلەتىن ەسكى قازاقستاننىڭ، ەسكى جۇيەنىڭ ادامى.

"قۋاندىق بيشىمباەۆ دەگەن ازامات - كەزىندەگى جۇيەدە جۇمىس ىستەپ، قوعامدى قالاي الداۋسىراتۋ كەرەك، قوعامدىق پىكىردى قالاي بۇرۋ كەرەك ەكەنىن وتە جاقسى مەڭگەرگەن ادام.

مەنىڭ ويىم، قازىر نۇكەنوۆا حانىمنىڭ تاراپىنا جاسالىپ جاتقان شابۋىلدار، تاعى ءبىر اقپارات شىقتى، ونىڭ باۋىرىن با تاعى بىرەۋدى قىز زورلاماقشى بولدى دەيدى. ادامنىڭ اۋزى بارمايتىن قىلمىسقا قاتىسى بار دەگەن سياقتى اڭگىمەلەر شىقتى. ونىڭ بارلىعى سول اۋلەتتىڭ قوعامنىڭ اراسىنداعى پىكىردى قالاي بۇرمالاۋعا بولاتىنىن جاقسى مەڭگەرگەنىن كورسەتىپ تۇر", - دەيدى دەپۋتات.

راسىندا دا، الەۋمەتتىك جەلىدە مارقۇم سالتانات نۇكەنوۆانىڭ اعاسى ايتبەك امانگەلدىگە قاتىستى جازبالار پايدا بولدى.

داۋ ەلەنا سەمەنوۆا ەسىمدى جەلى قولدانۋشىسىنىڭ جازباسىنان كەيىن شىقتى.

"...ەڭ باستىسى، نەگە مارقۇمنىڭ اعاسى ايتبەك امانگەلدى، زورلىق-زومبىلىق كورگەن ايەلدەردى قورعايتىن ادال ادام ءوزى تۋرالى بار شىندىقتى ايتپايدى؟ نەلىكتەن ول وزىنە قاتىستى ارىز تۇسكەنى جايلى شىندىقتى ايتپايدى؟ 10 جاستاعى قىزدى، ياعني بۇرىنعى مينيستر بيشىمباەۆتىڭ قىزىن زورلاۋ ارەكەتى تۋرالى راپورت بارىن نەگە ايتپايدى؟

ول زورلاۋ تۋرالى ارىز بەرىلگەننەن كەيىن تەرگەۋدەن قالاي قۇتىلدى؟ نەلىكتەن ايبەك امانگەلدىنىڭ جاعدايىندا سوت تورەلىگى ناتيجە بەرمەدى، بۇرىنعى اكىم بولعان اعاسىنىڭ ىقپالى بولدى ما ەكەن؟ نەلىكتەن تەرگەۋ ورگاندارى بىرنەشە ساراپتاما جۇرگىزبەدى؟ ال بيشىمباەۆتىڭ بۇرىنعى جۇبايى ءۇشىن نە وزگەردى، ول ارىز جازىپ، سودان كەيىن ەشتەڭە بولعان جوق دەپ ارىزدى نەگە قايتارىپ الدى؟ قاي كەزدەن باستاپ بىزدە دالەل ەمەس پىكىر ەسكەرىلدى؟ نەلىكتەن قىزدىڭ اناسى قايتىس بولعان ادامدى التىن ادام دەيدى؟ بۇل، ءبىر سوزبەن ايتقاندا، اقشا ءۇشىن بارىنە كوز جۇمۋعا دايىن ەكىجۇزدىلىك دەپ اتالادى!" - دەپ جازدى ول.

كەيىن بيشىمباەۆتىڭ 14 جىل وتاسقان ءبىرىنشى ايەلى نازىم قاحارمان مۇنىڭ ءبارىن جوققا شىعاردى.

ايتىسكەر رينات زايىتوۆ مۇنداي ادام ءولىمى بولعان جەردە قىلمىسكەردى ەشقاشان اقتاۋعا بولمايتىنىن ايتادى. دەگەنمەن قازىر قىزۋ اقپاراتتىق سوعىس ءجۇرىپ جاتقانىن ەشكىم جوققا شىعارمايدى.

"مەنىڭ ويىم، ونداي قىلمىستىق ىستەردە، كىسى ءولىمى بولعان قىلمىستىق ىستەردە، دالەلى بار قىلمىستىق ىستەردە قانداي دا ءبىر اقتالۋدىڭ ورىن الۋى مۇمكىن ەمەس. ونداي اقپاراتتىق سوعىس بولىپ جاتىر.

وكىنىشكە قاراي، جابىرلەنۋشى تاراپ اقپاراتتىق سوعىستا ۇتىلىپ جاتىر دەپ ويلايمىن", - دەدى زايىتوۆ.

ءماجىلىس دەپۋتاتى ەلدەگى سوتتىڭ ادىلدىگىنە دە كۇمان كەلتىردى.

"قازاقستاندا سوڭعى رەت ادىلەتتى سوتتى قاشان كوردىڭىز؟! ءبىزدىڭ سوت جۇيەسى جەكە مەملەكەت سياقتى جۇمىس ىستەيدى. اشقىسى كەلسە اشادى، جاپقىسى كەلسە جابادى. حالىقتىڭ قاتىسۋىمەن اشىق سوت جاساۋ كەرەك دەيتىندەي بيشىمباەۆ دەگەن وپپوزيتسيالىق تۇلعا ما، حالىقتىڭ ءسوزىن سويلەگەن ادام با، جازىقسىز ءجابىر كورىپ سوتتالىپ جاتقان ادام با؟!" - دەپ اشىندى دەپۋتات.

زايىتوۆ ايتىپ وتىرعان اقپاراتتىق سوعىس باستالىپ كەتكەنىنە ءبىراز ۋاقىت بولدى.  بۇعان دەيىن جۋرناليست سىرىم يتقۇلوۆ بۇرىنعى مينيستر ەرمۇحامەت ەرتىسباەۆتى بيشىمباەۆتى قولداۋعا قاتىسى بار ادامداردىڭ ءبىرى ەكەنىن ايتقان ەدى.

"قۋاندىقتىڭ اكەسى ءۋاليحان بيشىمباەۆتىڭ ۇلىن قورعاشتاپ، قوعامداعى پىكىرگە اسەر ەتۋگە تىرىسقان ۆيدەوسى ەستەرىڭىزدە مە؟ ول جۋرناليستەر مەن بلوگەرلەردىڭ ۇسىتنەن ءوزىن، ۇلىن، ولاردىڭ وتباسىن كوپشىلىك الدىندا قورلاعانى ءۇشىن ارىز جازدى.

ال بۇقاراعا ءۇن قاتۋ ءۇشىن وعان نازارباەۆتىڭ بۇلبۇلى - ەرمۇحامەت ەرتىسباەۆتان باسقا ەشكىم مۇمكىندىك بەرگەن جوق.

ءۋاليحان بيشىمباەۆ تا سول سياقتى، ءومىر بويى "ەسكى قازاقستاندىق". ۋنيۆەرسيتەتتى باسقاراتىن قاتارداعى رەكتور رەتىندە ەسەپسىز بايلىق جينادى. ولار قانداي جولدارمەن "تابىلعانى" تۇسىنىكتى، سونىڭ ارقاسىندا جۇبايى ۇزاق جىل بويى تابىستى بيزنەستى باسقاردى.

كوپشىلىك قۋاندىق بيشىمباەۆتىڭ ءوزى دە سىبايلاس جەمقورلىق ءۇشىن وتىرعانىن ۇمىتىپ كەتتى، بىراق تۋىستارىنىڭ ىقپالدى بايلانىستارىنىڭ ارقاسىندا ول مەرزىمىنەن بۇرىن بوستاندىققا شىقتى", - دەدى يتقۇلوۆ.

بالا قۇقىقتارى جونىندەگى ۋاكىل دينارا زاكيەۆا دا وسى ءىس بويىنشا دابىل قاعىپ، بيشىمباەۆتى اقتايتىندارعا تاڭى بار ەكەنىن جازدى.

Abai.kz