مەملەكەت باسشىسى قاسىم-جومارت توقاەۆتىڭ تاپسىرماسىمەن ەلىمىزدە «تازا قازاقستان» ەكولوگيالىق اكتسياسى باستالعان بولاتىن. 5 اپتاعا سوزىلاتىن بۇل ناۋقاننىڭ ءبىرىنشى اپتاسى «تازا ولكە» دەپ اتالادى. بۇل باستامانى تۇركىستان وبلىسىنىڭ تابيعات جاناشىرلارى قۋانىشپەن قابىلداپ، جۇمىستى باستاپ كەتتى.

ءوڭىر باسشىسى دارحان ساتىبالدى «بەلسەندى دەمالىس» ساياباعىنا اعاش وتىرعىزىپ، «تازا قازاقستان» شاراسىنا قولداۋ ءبىلدىردى. جاڭا اكتسيانى قولداۋ جونىندە ءوز ۇندەۋىن جاريالادى. ەكولوگيالىق اكتسياعا قاتىسقان جاستارمەن جۇزدەسىپ، پىكىر الماستى. وتانشىلدىق – تازالىقتان باستالاتىنىن ايتىپ، اعاش ەگىپ، تۋعان جەردىڭ تازالىعىن ساقتاۋ، تابيعاتىن قورعاۋ ءاربىر ادامنىڭ مىندەتى ەكەنىن جەتكىزدى.

«بۇگىن ءبىز قوعام ءۇشىن ماڭىزدى ەكولوگيالىق ءىس-شارادا كەزدەسىپ تۇرمىز! مەملەكەت باسشىسى قاسىم-جومارت كەمەلۇلىنىڭ باستاماسىمەن ەلىمىزدە «تازا قازاقستان» ەكولوگيالىق اكتسياسى باستالدى. بۇل باستامانى تۇركىستان وبلىسىنىڭ تابيعات جاناشىرلارى قۋانىشپەن قابىلدادى. ويتكەنى، وڭىرىمىزدە بەلسەندى، وتانشىل ازاماتتار وتە كوپ. تۇركىستان وبلىسىندا «تازا ولكە – تۇركىستان» اكتسياسىن باستادىق. وسىعان بايلانىستى وتكەن اپتادان بەرى اۋدان، قالالاردا تازالىق، كوگالداندىرۋ جۇمىستارى باستالىپ كەتتى. بۇل – ءبىر ايلىق ناۋقان ەمەس. ماقساتىمىز – تازالىق ساقتاۋ، اعاش، گۇل ەگۋدى ومىرلىك داعدىعا اينالدىرۋ. وسى سالاعا جاۋاپتى باسقارمالارعا، اۋدان، قالا اكىمدەرىنە، كوممۋنالدىق مەكەمەلەرگە ناقتى تاپسىرمالار بەرىلدى. ارنايى تەحنيكالار، رەسۋرستار ءبولىندى. ءبىز «تازا قازاقستان» اكتسياسى اياسىندا تۇركىستانىمىزدى ودان سايىن تۇرلەندىرە تۇسەمىز! وعان مۇمكىندىگىمىز جەتەدى»، – دەدى وبلىس اكىمى دارحان ساتىبالدى.

سۋرەت: تۇركىستان وبلىسى اكىمدىگى سايتىنان الىندى

رەسپۋبليكالىق اكتسيانىڭ ماقساتى – ەكولوگيالىق مادەنيەتتى قالىپتاستىرۋ، تۇرعىنداردىڭ، جاستاردىڭ تابيعاتقا دەگەن سۇيىسپەنشىلىگىن وياتۋ.

«تابيعات — ەل بايلىعى» دەمەكشى، مەملەكەت دامۋى ءۇشىن تابيعاتقا دەگەن قۇرمەت بولۋى ءتيىس. قورشاعان ورتانى قورعاۋ ارقىلى وتانعا دەگەن پاتريوتتىق سەزىم ويانادى. سوندىقتان، ءبىز ءوز ورتامىزدى، كوشەمىزدى، اۋىلىمىزدى، قالامىزدى تازا ۇستاۋىمىز كەرەك. ارىقتاردى تازالاپ، بۇلاق كوزدەرىن اشۋ – مىندەتىمىز! وسى باعىتتا جۇدىرىقتاي جۇمىلىپ جۇمىس ىستەيمىز دەپ سەنەمىن! مەملەكەت باسشىسىنىڭ تاپسىرماسى اياسىندا 2021-2025 جىلدار ارالىعىندا وڭىرىمىزدەگى 800-دەن استام ەلدى مەكەندى كوگالداندىرۋ ءۇشىن 4 ميلليوننان استام كوشەت ەگۋ كوزدەلگەن. قازىر جۇمىستار جۇرۋدە. بيىلدىڭ وزىندە 1 ميلليوننان استام كوشەت ەگىلۋدە. تاۋلار دا، ورماندار دا، وزەن-كولدەر دە، بايتاق دالا دا، اۋىلدار دا، قالالار دا – بىزدىكى. وسى بايلىعىمىزعا جاناشىرلىقپەن قارايىق! كوشەسىنىڭ تازالىعىنا قاراپ، ازاماتىن، حالقىن تانيسىڭ. ەندەشە، بارشا تۇركىستان ءوڭىرىنىڭ تۇرعىندارىن وسى اكتسيانى قولداۋعا شاقىرامىن! بىرلىك پەن ەڭبەكتىڭ ارقاسىندا تۇركىستانىمىزدى جاسىل ايماققا اينالدىرايىق!» دەدى وبلىس اكىمى دارحان ساتىبالدى.

«تازا ولكە» ناۋقانى باستالعالى بەرى وبلىستا 1500 كوشە جانە 33 مىڭنان استام اياقجول تازالانىپ، 850 توننا قوقىس شىعارىلدى. سونداي-اق 140 مىڭنان استام اعاش اكتەلىپ، 138 مىڭعا جۋىق كوشەت وتىرعىزىلدى. بۇدان بولەك 275 ساياباق جانە سكۆەر، 192 دانا بالالار جانە سپورت الاڭشالارى تازالاندى. بۇل ءىس-شارالارعا 279 تەحنيكا جانە 15 مىڭنان استام ادام قاتىستى.

10 ءساۋىر مەن 11 مامىر ارالىعىندا تۇركىستان وبلىسىندا «تازا ولكە – تۇركىستان» ناۋقانى وتەدى. ءار اپتاعا ارنايى ات بەرىلىپ، ءتۇرلى باعىتتا ەكولوگيالىق ءىس-شارالار ۇيىمداستىرىلادى. وبلىستىڭ بارلىق اۋدانىن جانە قالالارىن قامتيتىن ناۋقانعا وبلىستىڭ ءاربىر تۇرعىنى مەن قوناعى قاتىسا الادى.

تۇركىستان وبلىسى اكىمىنىڭ ءباسپاسوز قىزمەتى

Abai.kz