پارلامەنت سەناتى ەكى وقىلىمدا ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى زاڭدى، سونداي-اق اكىمشىلىك قۇقىق بۇزۋشىلىق تۋرالى كودەكسكە تۇزەتۋلەردى ماقۇلدادى, دەپ حابارلايدى Abai.kz ۇلتتىق پورتالى.

زاڭدار مەملەكەتتىك وتباسى ساياساتىنىڭ قۇقىقتىق، الەۋمەتتىك، ينستيتۋتسيونالدىق جانە وزگە دە نەگىزدەرىن جەتىلدىرۋگە، وتباسىلىق-تۇرمىستىق سالاداعى زورلىق-زومبىلىقتىڭ الدىن الۋعا باعىتتالعان.

"مەملەكەت باسشىسى كامەلەتكە تولماعاندارعا قاتىستى زورلىق-زومبىلىقتىڭ كەز كەلگەن ءتۇرى ءۇشىن جازانى قاتاڭداتۋدى، سونداي-اق ءبىلىم بەرۋ مەكەمەلەرىندە پسيحولوگيالىق قولداۋ قىزمەتىن ينستيتۋتسيونالدىق كۇشەيتۋدى، بىرىڭعاي سەنىم تەلەفونىن ۇيىمداستىرۋدى جانە قاراۋعا ۇسىنىلعان زاڭداردا كورىنىس تاپقان زورلىق-زومبىلىق پەن بۋللينگ قۇرباندارىنا كومەك كورسەتۋدىڭ پارمەندى باعدارلاماسىن ازىرلەۋدى تاپسىردى", - دەدى سەنات دەپۋتاتى جاننا اسانوۆا.

"ايەلدەردىڭ قۇقىقتارى مەن بالالاردىڭ قاۋىپسىزدىگىن رەتتەيتىن" زاڭمەن قىلمىستىق كودەكسكە مىناداي وزگەرىستەر ەنگىزىلەدى:

– ادامداردىڭ كامەلەتكە تولماعاندارعا قاتىستى زورلىق-زومبىلىققا بايلانىستى قىلمىستار كەزىندە كودەكستىڭ ەرەكشە بولىگىندە كوزدەلگەننەن نەعۇرلىم جەڭىل جازا تاعايىنداۋعا تىيىم سالۋ;

– تاراپتاردىڭ كامەلەتكە تولماعاندارعا قاتىستى زورلىق-زومبىلىققا بايلانىستى قىلمىستار بويىنشا، سونداي-اق كودەكستىڭ 108-1 ("دەنساۋلىققا قاساقانا جەڭىل زيان كەلتىرۋ") جانە 109-1 ("ۇرىپ-سوعۋ") - باپتارىندا كوزدەلگەن قىلمىستىق قۇقىق بۇزۋشىلىقتار تاتۋلاسقاننان كەيىن ءبىر جىلدان كەيىن قايتالاپ جاسالعان جاعدايلاردا تاتۋلاسۋىنا جول بەرىلمەيدى;

– دەنساۋلىققا قاساقانا اۋىر زيان كەلتىرۋگە، دەنساۋلىعىنا اۋىرلىعى ورتاشا زيان كەلتىرۋگە باعىتتالعان ءىس-ارەكەتتەر ءۇشىن باس بوستاندىعىن شەكتەۋ تۇرىندەگى بالامالى جازا الىنىپ تاستالادى جانە باس بوستاندىعىنان ايىرۋ تۇرىندەگى جازا بەلگىلەنەدى;

– كامەلەتكە تولماعان ادامدى ولتىرگەنى ءۇشىن (قك-ءنىڭ 99-بابى), كامەلەتكە تولماعانعا قاتىستى زورلاۋ جاساعانى ءۇشىن (قك-ءنىڭ 120-بابى) جانە كامەلەتكە تولماعانعا قاتىستى جىنىستىق سيپاتتاعى زورلىق-زومبىلىق ارەكەتتەرى ءۇشىن (قك-ءنىڭ 121-بابى) قك-ءنىڭ قولدانىستاعى نورمالارىندا كوزدەلگەن باسقا بالاما جازالاۋ شارالارىن الىپ تاستاۋ ارقىلى ءومىر بويىنا باس بوستاندىعىنان ايىرۋ تۇرىندەگى جازا بەلگىلەنەدى;

– 16 جاسقا تولماعان ادامدارعا جىنىستىق سيپاتتاعى ءتيىسۋ ءۇشىن جاۋاپكەرشىلىك ەنگىزىلەدى;

– ءوزىن-ءوزى ولتىرۋگە يتەرمەلەۋ نەمەسە كومەكتەسۋ ءۇشىن جازا بەلگىلەيدى;

– قىلمىستىق قۇقىق بۇزۋشىلىق جاساعان ادامنىڭ مىنەز-قۇلقىنا سوت قولداناتىن ەرەكشە تالاپتاردى بەلگىلەيتىن جاڭا باپ ەنگىزىلدى;

– سەنات دەپۋتاتتارى زاڭدى ءبىرىنشى جانە ەكىنشى وقىلىمدا ماقۇلداۋعا داۋىس بەردى. قۇجات پرەزيدەتتىڭ قول قويۋىنا جىبەرىلەدى. ول قول قويىلعاننان كەيىن كۇشىنە ەنەدى.

Abai.kz