ەلدەگى بولىپ جاتقان سوڭعى  جاعدايلاردان بىرنەشە وڭىردە سۋ تاسىپ، ونداعان اۋداندا توتەنشە جاعداي جاريالاندى. وسىعان بايلانىستى، مەملەكەت باسشىسى قاسىم-جومارت توقاەۆ قوستاناي وبلىسىنا جۇمىس ساپارى بارىسىندا سۋ تاسقىنى سالدارىن ەڭسەرۋگە جاردەمدەسكەن بيزنەس وكىلدەرىمەن جانە ەرىكتىلەرمەن جۇزدەستى.بۇل تۋرالى Abai.kz حابارلايدى.

– مەن سىزدەرگە ريزاشىلىعىمدى بىلدىرەمىن. بۇل – سىزدەردىڭ جۇرەك قالاۋلارىڭىز، ازاماتتىق جاۋاپكەرشىلىكتەرىڭىزدىڭ كورىنىسى. مۇنىڭ ءبارىن ماراپات ءۇشىن ەمەس، شىنايى نيەتپەن جاسالعان يگى ءىس دەپ بىلەمىن، – دەگەن پرەزيدەنت. 

 مەملەكەت باسشىسى سۋ تاسقىنىنان زارداپ شەككەن حالىققا ناقتى كومەك كورسەتۋ ىسىندە بيزنەسمەندەردىڭ ءرولى زور ەكەنىنە ايرىقشا نازار اۋدارعان.

– ءبىزدىڭ ەلىمىزدە Forbes تىزىمىنە كىرەتىن ءىرى كاسىپكەرلەر بار. ولارمەن ارنايى كەزدەسەمىز. ولار ءار وبلىسقا، اۋدانعا، ەلدى مەكەنگە بەكىتىلەدى جانە ناقتى جاۋاپكەرشىلىك جۇكتەلەدى. بۇل ءبىر جاعىنان كاسىپكەرلەردىڭ مۇددەسىنە ساي كەلەدى. ويتكەنى ولار وزدەرىنىڭ قوسقان ۇلەسىنىڭ ناقتى ناتيجەسىن كورەتىن بولادى. حالقىنا قايىرىمدىلىق جاساعان ازامات رەتىندە سىزدەردىڭ دە ەسىمدەرىڭىز مەملەكەت تاراپىنان ەلەۋسىز قالمايدى دەپ ويلايمىن، – دەدى قاسىم-جومارت توقاەۆ. 

Abai.kz