«AMANAT» پارتياسىنىڭ «قارىزسىز قوعام» جوباسىن جۇزەگە اسىرۋ جۇمىسى جالعاسۋدا. ونىڭ نەگىزگى ماقساتى – ازاماتتاردىڭ قارجىلىق ساۋاتىن ارتتىرۋ. جوبا بىلتىر ءساۋىر ايىندا باستاۋ العاننان بەرى 100 مىڭنان استام ادام وقۋدان ءوتتى. ەندى پارتيالىقتار جەكە قوسالقى شارۋاشىلىقتاردى اگرارلىق كووپەراتيۆتەرگە بىرىكتىرۋ ارقىلى «قارىزسىز قوعام» جوباسى تۇلەكتەرىنىڭ تابىسىن ارتتىرۋعا كومەكتەسۋگە نيەتتى.

سۋرەت: امانات پارتياسى ءباسپاسوز قىزمەتىنەن الىندى

وسى ماقساتتا «AMANAT» پارتياسى قر قارجى نارىعىن رەتتەۋ جانە دامىتۋ اگەنتتىگىنىڭ، «Halyk Bank»-تىڭ جانە «بانك تسەنتر كرەديتتىڭ» قولداۋىمەن «قامقورشى AMANAT» قورى قۇرىلعانى تۋرالى حابارلايدى. ءتيىستى مەموراندۋمعا بۇگىن «AMANAT» پارتياسىنىڭ اتقارۋشى حاتشىسى داۋلەت كارىبەك, قر قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى نۇرلان ءابدىراحمانوۆ, «Halyk Bank» باسقارما توراعاسىنىڭ ورىنباسارى ەرتاي ساليموۆ جانە «بانك تسەنتر كرەديت» ۆيتسە-پرەزيدەنتى اناستاسيا وۆسياننيكوۆا قول قويدى.

سۋرەت: امانات پارتياسى ءباسپاسوز قىزمەتىنەن الىندى

داۋلەت كارىبەك «قارىزسىز قوعام» جوباسىنا قاتىسۋشىلاردىڭ ۇشتەن ءبىر بولىگىندە ەكى جانە ودان دا كوپ نەسيەسى بار ەكەنىن اتاپ ءوتتى. سونداي-اق بالالارى مەن نەمەرەلەرىنىڭ قارىزىن وتەۋگە ءماجبۇر زەينەتكەرلەر دە كەزدەسەدى. جوبا اياسىندا بارلىعى 100 مىڭنان استام ادام قارجىلىق ساۋاتىن ارتتىردى. ەندى ولاردىڭ تابىسىن جوعارىلاتۋ مىندەتى تۇر.

«پارتيانىڭ «قارىزسىز قوعام» جوباسى نەسيە قامتىن كيىپ، مۇقتاجدىققا تاپ بولعان ازاماتتارىمىزعا تىكەلەي ءارى ناقتى قولداۋ كورسەتۋ ءۇشىن قولعا الىنىپ وتىر. مەملەكەت باسشىسىنىڭ تاپسىرماسىمەن بيىل ەلىمىزدىڭ بارلىق وڭىرىندە جوبانىڭ ەكىنشى كەزەڭى باستالادى. نەگىزگى ماقساتىمىز – حالقىمىزدىڭ قارجىلىق ساۋاتىن بارىنشا ارتتىرۋ، سول ارقىلى ازاماتتاردى قارىزدىڭ تۇزاعىنان قۇتقارۋ»، – دەدى ول.

سۋرەت: امانات پارتياسى ءباسپاسوز قىزمەتىنەن الىندى

«قامقورشى AMANAT» قورى وقۋ-ادىستەمەلىك ورتالىقتاردىڭ قارجىلاندىرۋ كوزىنە اينالادى. اتالعان ورتالىقتاردا تىلەك بىلدىرۋشىلەر تەوريالىق ءبىلىم الىپ قانا قويماي، اۋىل شارۋاشىلىعىنىڭ ءتۇرلى باعىتى بويىنشا تاجىريبەلىك داعدىلاردى يگەرە الادى. قاتىسۋشىلار ءۇشىن تاجىريبەلى زەرتحانالار مەن جوبالاردى تولىق جۇزەگە اسىرۋعا قاجەت بارلىق قۇرال قولجەتىمدى بولماق. بۇعان قوسا، قۇرىلىپ جاتقان كووپەراتيۆتەرگە ليزينگكە وندىرىستىك جابدىقتار ۇسىنىلىپ، قايتارىمدى گرانتتار بەرىلەدى.

سۋرەت: امانات پارتياسى ءباسپاسوز قىزمەتىنەن الىندى

«جامبىل وبلىسى مەركى اۋدانىندا «اگروساۋات» اتتى العاشقى ورتالىق اشىلدى. اۋداندا اۋىل شارۋاشىلىعىن دامىتۋ الەۋەتى جوعارى. تۇرعىنداردىڭ باسىم كوپشىلىگىندە شامامەن 10 سوتىق جەر بار. كوبىسى باقشا ەگەدى، مال وسىرەدى. الايدا تەك 1%-ى عانا اۋىل شارۋاشىلىعى ونىمدەرىن ساتادى. «قامقورشى AMANAT» قورى جەكە-قوسالقى شارۋاشىلىقتاردى كووپەراتيۆتەرگە بىرىكتىرىپ قانا قويماي، مالدى، تۇقىمدى بىرىڭعاي ساتىپ الۋعا، ماشينا-تراكتور ستانسالارىن ۇيىمداستىرۋعا، ءونىمدى سەرتيفيكاتتاۋعا جانە وتكىزۋگە كومەك كورسەتەتىن، قايتا وڭدەۋ جوبالارىن دامىتاتىن، ءونىم ساقتاۋ قويمالارىن سالۋعا ىقپال ەتەتىن جانە وزگە دە جۇمىستار جۇرگىزىلەتىن تۇتاس ەكوجۇيە قۇرۋعا مۇمكىندىك بەرەدى»، – دەدى «قارىزسىز قوعام» جوباسىنىڭ جەتەكشىسى اقمارال بەكمۇرزاەۆا.

سونداي-اق وقۋ-ادىستەمەلىك ورتالىقتار جەكە-قوسالقى شارۋاشىلىقتاردىڭ جانە كووپەراتيۆتەردىڭ قانداي تاۋارلار ءوندىرۋى كەرەك ەكەنىن انىقتاۋ ءۇشىن ءار اۋداننىڭ جانە ناقتى اۋىلدىڭ ماماندانۋىن انىقتاۋعا مۇمكىندىك بەرەدى.

ايتا كەتەيىك، «قارىزسىز قوعام» جوباسى بىلتىر 2 مامىردا Halyk Bank-تىڭ قولداۋىمەن قاناتقاقتى رەجيمدە باستاۋ الدى. ساراپشىلاردىڭ دارىسىنەن بولەك، جوباعا قاتىسۋشىلار enbek.kz پورتالىنا تىركەلۋ جانە جك اشۋدان باستاپ، سوتتان تىس بانكروتتىقتى سۇيەمەلدەۋ جانە بەرەشەكتى وتەۋ كەستەسىن ازىرلەۋگە دەيىنگى ءتۇرلى سۇراقتار بويىنشا كەڭەس الادى. سونداي-اق، وقىتۋ بارىسىندا قاتىسۋشىلارعا زاڭگەر كومەگىنە كەپىلدىك بەرىلەدى. ولار ءار قارىز الۋشىنىڭ نەسيە تاريحىن جەكە زەرتتەپ، قارىز جۇكتەمەسىن جەڭىلدەتۋ بويىنشا كەڭەس بەرەدى.

كۋرسقا جازىلۋ ءۇشىن qogamfin.kz. سايتىنداعى نىساندى تولتىرۋ قاجەت. جوباعا قاتىسۋشىلار كۇندىزگى فورماتتا ساۋاتىن ارتتىرىپ، ءبىر توپتا 50 ادامعا دەيىن وقىتىلادى. ءدارىستىڭ ۇزاقتىعى – 5 جۇمىس كۇنى.

Abai.kz