جۇما, 12 شىلدە 2024
بيلىك 2605 16 پىكىر 26 ءساۋىر, 2024 ساعات 17:49

التىن وردا مەن جوشى حان تۋرالى فيلمدەر تۇسىرىلەدى

سۋرەت: قازتاگ اگەنتتىگىنەن الىندى

قازاقستان رەسپۋبليكاسىنىڭ پرەمەر-ءمينيسترى التىن وردا داۋىرىنە قاتىستى دەپۋتاتتىق ساۋالعا جاۋاپ بەردى، دەپ حابارلايدى قازتاگ ءتىلشىسى.

«جوشى ۇلىسىنىڭ 800 جىلدىعىن وتكىزۋ جونىندەگى 30 ءىس-شارادان تۇراتىن جالپى رەسپۋبليكالىق جوسپار بەكىتىلدى. وندا جوشى تۋرالى تولىقمەتراجدى كوركەم فيلم جانە «التىن وردا» تاريحي سەريالىن ءتۇسىرۋ ماسەلەسىن پىسىقتاۋ، قالالاردا جوشى ەسكەرتكىشىن ورناتۋ شارالارى كوزدەلگەن»، - دەپ جاۋاپ بەردى ولجاس بەكتەنوۆ.

پرەمەردىڭ ايتۋىنشا، جوشىنىڭ ءومىرى، ونىڭ ۇرپاقتارىنىڭ جوشى ۇلىسىندا بيلىك قۇرعان كەزەڭى تۋرالى شاعىن كىتاپتار، كوميكستەر شىعارۋ، عىلىمي-پراكتيكالىق كونفەرەنتسيالار، سەمينارلار، كونگرەسس، «التىن وردا» ەنتسيكلوپەدياسىنىڭ تانىستىرىلىمىن وتكىزۋ، ەكسپەديتسيالار ۇيىمداستىرۋ قاراستىرىلعان.

سونىمەن قاتار ول، ءوز كەزەگىندە التىن وردا تاريحى مەن جوشى حان تۋرالى دەرەكتى جانە كوركەم فيلمدەر، سەريالدار ءتۇسىرۋ، مونۋمەنت تۇرعىزۋ ماسەلەلەرى اتالعان جوسپار شەڭبەرىندە جالعاساتىنىن حابارلادى.

«جوشى حان كەسەنەسىن ۇلىتاۋ ءوڭىرىنىڭ تۋريستىك ورتالىعى دەپ ايتا الامىز. ۇلىتاۋ وبلىسىنا باراتىن تۋريستەرگە بارلىق جاعداي جاسالعان. قازىرگى كەزدە جوشى حان، الاشا حان، دومباۋىل كەسەنەلەرىنە اپاراتىن جولدى سالۋ جۇمىسى اياقتالۋدا. ءوڭىردىڭ ءتۋريزمىن ودان ءارى دامىتۋ ۇلىتاۋ وبلىسىندا ءتۋريزمدى دامىتۋدىڭ 2027 جىلعا دەيىنگى جول كارتاسى نەگىزىندە جۇرگىزىلەدى»، - دەپ مالىمدەدى پرەمەر-مينيستر.

بەكتەنوۆتىڭ مالىمدەۋىنشە، سارايشىق قالاشىعىن دامىتۋدىڭ تۇجىرىمداماسى، ونى جاڭعىرتۋدىڭ جوسپارى ازىرلەندى. سارايشىق قالاشىعىنىڭ تاريحي-مادەني مۇرا وبەكتىلەرىن جاڭعىرتۋ ماقساتىندا عىلىمي، تاريحي دەرەكتەر زەردەلەنۋدە جانە بۇل جۇمىستار بيىل باستالادى.
«سونداي-اق سارايشىق قالاشىعىنىڭ جانىنان ۆيزيت-ورتالىق سالىنىپ، 2023 جىلعى ناۋرىزدا پايدالانۋعا بەرىلدى. ول التىن وردا كەزەڭىنىڭ ارتەفاكتىلەرىمەن تولىقتىرىلدى. ۆيزيت-ورتالىعىنا تۋريستەر مەن كەلۋشىلەردىڭ سانى ارتۋدا (2022 جىلى 18 مىڭ ادام بارسا، 2023 جىلدىڭ قورىتىندىسى بويىنشا 21 مىڭعا جۋىق)»، - دەدى پرەمەر.

ۇكىمەت باسشىسى اتىراۋ وبلىسىنىڭ ءتۋريزمدى دامىتۋدىڭ 2027 جىلعا دەيىنگى جول كارتاسى اياسىندا 2024-2025 جىلدارى سارايشىق اۋىلىنان سارايشىق قالاشىعىنا دەيىنگى 10 كم جول سالۋ (2023 جىلى جەرگىلىكتى بيۋدجەتتەن ت300 ملن بولىنگەن، اعىمداعى جىلى ت996 ملن قاراجات ءبولىندى), سارايشىق قالاشىعىندا تۋريستىك كەمپينگتىك ايماق قۇرۋ جوبالارى قاراستىرىلاتىنىن (ىسكە اسىرۋ مەرزىمى 2025 جىل) ايتتى.

«قىزىل وبا قورىمى بويىنشا جۇمىستار سولتۇستىك قازاقستان وبلىسىندا ءتۋريزمدى دامىتۋدىڭ 2027 جىلعا دەيىنگى جول كارتاسىنىڭ نەگىزىندە جۇرگىزىلۋدە. 2024-2025 جىلدار كەزەڭىندە اكىمدىك تۋريستىك وبەكتىلەرگە باراتىن جولداردى جابدىقتاۋ جۇمىستارىن جوسپارلاعان»، - دەپ حابارلادى بەكتەنوۆ.

پرەمەر سونىمەن قاتار، وتاندىق جانە شەتەلدىك تۋريستەردى اقپاراتتاندىرۋ ماقساتىندا «Kazakhstan.travel» ۇلتتىق تۋريستىك پورتالى قۇرىلعانىن اتاپ ءوتتى.

پرەمەر-ءمينيستردىڭ حابارلاۋىنشا، پرەزيدەنتتىڭ تاپسىرماسىمەن عىلىم جانە جوعارى ءبىلىم مينيسترلىگى شەتەلدىك، وتاندىق ارحيۆتەر مەن كىتاپحانالاردا جاڭادان انىقتالعان دەرەككوزدەردى پايدالانىپ، «قازاقستاننىڭ ەجەلگى زاماننان بۇگىنگى كۇنگە دەيىنگى تاريحى» اتتى جەتى تومدىق اكادەميالىق باسىلىم دايىنداۋدا. سونىڭ نەگىزىندە «قازاقستان تاريحى» مەن «دۇنيەجۇزى تاريحى» پاندەرى بويىنشا وقۋلىقتار ازىرلەنەدى.

ونىڭ اياسىندا وقۋ ورىندارىندا التىن وردا ءداۋىرى بۇگىنگى كۇن تالابىنا ساي وقىتىلادى.

ايتا كەتسەك، ءماجىلىس دەپۋتاتتارىنىڭ التىن وردا داۋىرىنە قاتىستى ۇكىمەت باسشىسىنا جولداعان ۇسىنىستارى:

1. التىن وردا تاريحى، جوشى حاننىڭ ەرەكشە تۇلعاسى تۋرالى دەرەكتى جانە كوركەم فيلمدەر، سەريالدار مەن انيماتسيالىق تۋىندىلار ءتۇسىرۋ كەرەك.
2. التىن وردا ءداۋىرىنىڭ تاريحي ەسكەرتكىشتەرى جوشى حان كەسەنەسى، سارايشىق قالاشىعى جانە «قىزىل وبا» قورىمىن تۋريستتىك ورتالىقتارعا اينالدىرۋ كەرەك. تۋريستىك ينفراقۇرىلىمدى زامان تالابىنا لايىقتاۋ قاجەت.
3. استانادا التىن وردا ءداۋىرىنىڭ ۇلى مۇراسىن ايشىقتايتىن اسقاقتاعان الىپ مونۋمەنت تۇرعىزۋ كەرەك.
4. ادەبيەتىمىز بەن مادەنيەتىمىزدە، بەينەلەۋ ونەرىندە دە جوشى حان مەن التىن وردا تاريحى تاۋەلسىز ەلدىڭ ۇستانىمىمەن بەينەلەنۋى كەرەك.
5. مەكتەپ پەن جوعارى وقۋ ورىندارىندا التىن وردا ءداۋىرى بۇگىنگى كۇن تالابىمەن وقىلۋى ءتيىس.

Abai.kz

16 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1156
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 1787
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 1858