پاۆلودار – استانا باعىتىنداعى «ۇلى دالا جورىعى» مارافون-بايگەسىنىڭ ءۇشىنشى ماۋسىمى ءوز مارەسىنە جەتتى. «جەتىسۋ» كومانداسى «ۇلى دالا جورىعىنىڭ» ءۇشىنشى ماۋسىمىندا جەڭىمپاز اتاندى. 

استانادا «AMANAT» پارتياسىنىڭ قولداۋىمەن كورنەكتى گەولوگ-عالىم قانىش ساتباەۆتىڭ 125 جىلدىعىنا وراي ۇيىمداستىرىلعان «ۇلى دالا جورىعى» كەڭ اۋقىمدى رەسپۋبليكالىق مارافون-بايگەسىنىڭ ءۇشىنشى ماۋسىمى ءوز مارەسىنە جەتتى. جارىستى «AMANAT» پارتياسىنىڭ قولداۋىمەن قر ۇلتتىق سپورت قاۋىمداستىعى جانە ونىڭ قۇرامىنا كىرەتىن «JORYQ» ات سپورتى فەدەراتسياسى ۇيىمداستىردى.

جەڭىمپازداردى ماراپاتتاۋ راسىمىنە «AMANAT» پارتياسىنىڭ اتقارۋشى حاتشىسى داۋلەت كارىبەك، ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، مارافون-بايگەنىڭ تەڭ ۇيىمداستىرۋشىسى الىبەك الدەنەي، «JORYQ» ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ، ءماجىلىس دەپۋتاتتارى، «AMANAT» پارتياسى فراكتسياسىنىڭ مۇشەلەرى امانجول ءالتاي جانە قازىبەك الىشەۆ قاتىستى.

«AMANAT» پارتياسىنىڭ اتقارۋشى حاتشىسى داۋلەت كارىبەك سوڭعى ۋاقىتتا قوعامنىڭ ۇلتتىق سپورت تۇرلەرىنە دەگەن قىزىعۋشىلىعى ارتا تۇسكەنىن اتاپ ءوتتى.

«وزدەرىڭىزگە ءمالىم، «ۇلى دالا جورىعى» مارافون-بايگەcىن مەملەكەت باسشىسى نازارىندا ۇستاپ، ۇنەمى قولداۋ كورسەتىپ كەلەدى. كۇنى كەشە «AMANAT» پارتياسى فراكتسياسىنىڭ دەپۋتاتتارى كوتەرگەن قازاق جىلقىلارىنىڭ تۇقىمىن ساقتاۋ جانە مولايتۋ تۋرالى زاڭ جوباسى ءبىرىنشى وقىلىمدا ماقۇلداندى. وسى ارقىلى مەملەكەت اسىل تۇقىمدى جىلقىلارىمىزدى قورعاۋ ءۇشىن بار جاعدايدى جاسايتىن بولادى»، – دەدى ول.

سونىمەن، بەس كۇنگە سوزىلعان جارىستىڭ قورىتىندىسى بويىنشا مارە سىزىعىن ءبىرىنشى بولىپ جەتىسۋ وبلىسىنىڭ كومانداسى كەسىپ ءوتتى، جالپى ۋاقىتى 32 ساعات 40 مينۋت 18 سەكۋندتى قۇرادى. ەكىنشى ورىن ماڭعىستاۋ وبلىسىنىڭ شاباندوزدارىنا (33 ساعات 05 مين. 30 سەك.), ءۇشىنشى ورىن الماتى قالاسىنىڭ كومانداسىنا (33 ساعات 31 مين. 08 سەك.) بۇيىردى. ءتورتىنشى ورىندى جامبىل وبلىسىنىڭ قۇراماسى (34 ساعات 22 مين. 03 سەك.), بەسىنشى ورىندى استانا قالاسىنىڭ كومانداسى (37 ساعات 10 مين. 32 سەك) يەلەندى.

ءۇشىنشى ماۋسىمدا 500 شاقىرىمدى ەڭسەرگەن «رەكورد» كومانداسىنىڭ كەلەسى شاباندوزدارى ۇزدىك اتاندى: جەتىسۋ وبلىسىنان ماۋلەتحان ەرالى (32 ساعات 24 مين. 42 سەك), قوستاناي وبلىسىنان مۇحامبەتوۆ ءاليحان (32 ساعات 32 مين. 08 سەك), سونداي-اق شىعىس قازاقستان وبلىسىنىڭ ەكى شاباندوزى - ەترەكوۆ ءابىش (34 ساعات 01 مين. 37 سەك) جانە جۇماشوۆ دۋلات (34 ساعات 53 مين. 37 سەك).

بيىل پاۆلودار – استانا باعىتىنداعى مارافون-بايگەگە بارلىعى 19 كوماندا قاتىسقانىمەن، ولاردىڭ تەك 11-ءى عانا جارىس قاشىقتىعىن تولىپ ءجۇرىپ وتە الدى.

«بۇگىندە «ۇلى دالا جورىعى» مارافون-بايگەسى تەك ءدۇبىرلى دوداعا عانا ەمەس، سونىمەن قاتار كوشپەندىلەر مادەنيەتىن ىلگەرىلەتۋدىڭ بىرەگەي جوباسىنا اينالدى. قىركۇيەك ايىندا شاباندوزدارىمىزدى جاڭا جارىس كۇتىپ تۇر. ولار V دۇنيەجۇزىلىك كوشپەندىلەر ويىندارى قارساڭىندا حالىقارالىق مارافونعا قاتىسادى. بۇل – بۇكىل الەمگە شاباندوزدارىمىزدىڭ ەپتىلىگى مەن شەبەرلىگىن، سونداي-اق قازاق جىلقىلارىنىڭ توزىمدىلىگىن كورسەتۋدىڭ تاماشا مۇمكىندىگى»، – دەدى قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.

العاشقى ءۇش جۇلدەگەر كوماندا 2-7 قىركۇيەك ارالىعىندا وتەتىن «ۇلى دالا جورىعى» كۇزگى حالىقارالىق مارافونىنا ليتسەنزيا الادى.

«ۇلى دالا جورىعىنىڭ» باس سەرىكتەسى – قر ۇلتتىق سپورت تۇرلەرى قاۋىمداستىعى. سونداي-اق جارىسقا «AMANAT» پارتياسى، پاۆلودار جانە اقمولا وبلىستارىنىڭ اكىمدىكتەرى، قر تۋريزم جانە سپورت مينيسترلىگى قولداۋ كورسەتتى.

جەڭىمپازداردىڭ ماراپاتى: العاشقى ءۇش جەڭىمپاز 5-ءشى دۇنيەجۇزىلىك كوشپەندىلەر ويىندارى الدىندا 3-7 قىركۇيەك ارالىعىندا وتەتىن  حالىقارالىق مارافون-بايگەگە قاتىسۋعا ليتسەنزيا الادى. حالىقارالىق كەزەڭگە شەت مەملەكەتتەردەن كەمىندە 10 كوماندا قاتىسادى دەپ كۇتىلۋدە (تۇركيا، ساۋد ارابياسى، موڭعوليا، ۆەنگريا، تۇرىكمەنستان، يران، وزبەكستان جانە ت.ب.).

ساراپتامالىق قورىتىندى: مارافون جۇمىسىنا 2 حالىقارالىق جانە 3 قازاقستاندىق سۋديا، سونداي-اق 2 حالىقارالىق جانە 3 قازاقستاندىق مال دارىگەرى قاتىسىپ، جوعارى ستاندارتتاردى ساقتاۋ مەن جىلقىلاردىڭ دەنساۋلىعىنا قامقورلىق جاساۋعا كەپىلدىك بەردى.

اقپاراتتىق سەرىكتەستەر: «قازاقستان»، «حابار»، «استانا» تەلەارنالارى.

«ۇلى دالا جورىعى» – جىلقى بالاسىنىڭ ەڭ مىقتى ءارى ءتوزىمدى تۇقىمى انىقتالاتىن دالالىق لابوراتورياسى.

مارافون جاڭالىقتارىن www.joryq.kz رەسمي سايتىندا، الەۋمەتتىك جەلىلەردە باقىلاڭىز: fb - JORYQ, Instagram - joryqofficial, Tik-Tok - JORYQ, youtube - JORYQ.

باق-پەن ىنتىماقتاستىق جانە ءوزارا ءىس-قيمىل ماسەلەلەرى بويىنشا + 7 777-214-01-71 ءنومىرى بويىنشا راۋان ەسقاليمەن حابارلاسۋلارىڭىزدى سۇرايمىز.

قۇرمەتپەن، «ۇلى دالا جورىعىنىڭ» ۇيىمداستىرۋ كوميتەتى

Abai.kz