ۋتيلالىمدى توقتاتۋ تۋرالى ءوتىنىشتى ارنايى كوميسسيا قارايتىن بولدى. بۇل تۋرالى Qaz365.kz سايتى جازدى.

بۇگىن ۇكىمەت وتىرىسىنان كەيىن وتكەن بريفينگتە يندۋستريا جانە قۇرىلىس ءمينيسترى قانات شارلاپاەۆ ۋتيلالىمعا قاتىستى جينالعان پەتيتسياعا قاتىستى تىلشىلەردىڭ ساۋالىنا جاۋاپ بەردى.

قازىردىڭ وزىندە ۋتيلالىمدى توقتاتۋ كەرەك دەگەن پەتيتسياعا 50 مىڭنان استام ادامنىڭ قولى جينالعان.

مينيستر ءوتىنىشتى قاراۋ پروتسەسى قالاي وتەتىنىن ءتۇسىندىردى.

«بۇل ماسەلە بويىنشا ايتار بولساق، وزدەرىڭىز بىلەتىندەي، پروتسەسس وتە جاقىن ارادا جۇزەگە اسادى. الدىمەن كوميسسيا قۇرىلادى، ولار ايماقتارعا بارادى، كەڭەستەر جۇرگىزەدى. مۇمكىن بىرنەشە ءوندىرىس ورىندارىن ارالايدى. سوسىن قورىتىندى جاسالادى. بۇدان كەيىن قوعامدىق تىڭداۋلار 24 مامىردان 5 شىلدەگە دەيىن جالعاسادى. ەگەر بىزدە بالاما پەتيتسيالار بولسا، ولار دا قارالادى. مەن سىزدەرگە قوعامدىق تىڭداۋدىڭ ناتيجەسى قانداي بولاتىنىن ايتا المايمىن، ءبىز وتىرىستى بارىنشا اشىق وتكىزۋگە، ءوتىنىش جازعانداردىڭ پىكىرىن تىڭداۋعا تىرىسامىز. سونداي-اق بالاما پىكىرلەر بار، ونى دا ەسكەرۋىمىز كەرەك. ويتكەنى بالاما پىكىرلەر دە جاقسى داۋىس جيناپ جاتىر. مەملەكەت ونى دا زاڭدا بەلگىلەنگەن تارتىپپەن قارايدى»، - دەدى مينيستر.

Abai.kz