ءماجىلىس تۇركى مەملەكەتتەرى ۇيىمىنا مۇشە ەلدەردىڭ ۇكىمەتتەرى اراسىنداعى جۇك تاسىمالدارى تۋرالى كەلىسىمدى راتيفيكاتسيالادى. بۇل تۋرالى Abai.kz حابارلايدى.

- كەلىسىمگە سايكەس تۇركى مەملەكەتتەرى ۇيىمىنا مۇشە ەلدەر اراسىندا تەمىرجول، سۋ جانە اۆتوموبيل كولىگىمەن جاسالاتىن جۇك تاسىمالى كولەمى ۇلعايتىلادى. تاراپتار ءوزارا ىنتىماقتاسىپ، جۇك تاسىمالداۋدى ىلگەرىلەتۋدە قولداۋ كورسەتەدى. وسى ماقساتتا مۇددەلى مەملەكەتتىك ورگاندار مەن ۇيىمداردىڭ وكىلدەرىنەن ءتيىستى ماسەلەلەردى تالقىلاپ، شەشۋگە جاۋاپتى بىرلەسكەن كوميتەت قۇرىلادى، - دەلىنگەن حابارلامادا.

ۇكىمەتتىڭ ءباسپاسوز قىزمەتى بۇل كەلىسىمنىڭ 2022 جىلى 11 قاراشادا سامارقاند قالاسىندا جاسالعانىن حابارلادى. ول قازاقستان، ءازىربايجان، قىرعىزستان، تۇركيا جانە وزبەكستان اراسىنداعى كولىك-ترانزيت الەۋەتىن جانە ساۋدا-ەكونوميكالىق قاتىناستى ودان ءارى دامىتۋعا باعىتتالعان.

كەلىسىم راتيفيكاتسيالانعاننان كەيىن تاراپتار ترانزيتتىك تاسىمالدارعا قاتىستى تسيفرلىق تەحنولوگيالاردى ەنگىزۋ جانە جۇكتەردى "جىكسىز" مۋلتيمودالدى تاسىمالداۋدى قامتاماسىز ەتۋ بويىنشا شارالار قابىلداي الادى.

Abai.kz