4 ماۋسىم - قازاقستان رەسپۋبليكاسىنىڭ مەملەكەتتىك رامىزدەر كۇنى. بيىل بۇل ايتۋلى داتاعا 32 جىل تولادى. بىلە-بىلگەن ادامعا ەلەۋلى كۇن. مەملەكەتتىك ءرامىز ەلدىگىڭنىڭ بەلگىسى، تاۋەلسىزدىگىڭنىڭ نىشانى. تۋدى، ءانۇراندى، ەلتاڭبانى قاستەرلەۋ كىم-كىمنىڭ دە بورىشى ەكەنى ايتپاساق تا تۇسىنىكتى. 

مەرەكەگە وراي مەملەكەت باسشىسى استاناداعى «اتامەكەن» ەتنو-مەموريال كەشەنىندە وتكەن مەملەكەتتىك تۋ كوتەرۋ راسىمىنە قاتىسىپ، باستى ەلدىك نىشاندار سىن ساعاتتا دا، جەڭىستى كۇندەردە دە بارشا ازاماتتى بىرىكتىرەتىنىن ايتتى.

قۇرمەت قاراۋىلى روتاسىنىڭ باستىعى سالتاناتتى شاراعا دايىندىعى جونىندە مەملەكەت باسشىسىنا راپورت بەردى. سودان كەيىن ەلىمىزدىڭ ءانۇرانى شىرقالىپ، كوك بايراعىمىز كوتەرىلدى. قاسىم-جومارت توقاەۆ جينالعان جۇرتشىلىقتى مەملەكەتتىك رامىزدەر كۇنىمەن قۇتتىقتاپ، بۇل ەلدىگىمىزدى نىعايتا تۇسەتىن مەرەيلى مەرەكە ەكەنىنە نازار اۋداردى.

 “وسى مەرەكەگە وراي ءبىز جاڭا عانا ەلىمىزدىڭ باس بايراعىن كوتەردىك. كوك تۋىمىز ءاردايىم بيىكتە جەلبىرەي بەرسىن! تۋىمىزدى تىك ۇستاۋ – ءار ازاماتتىڭ پەرزەنتتىك پارىزى. اسپان تۇستەس كوك بايراعىمىز – ءبىزدىڭ ماقتانىشىمىز. سپورتشىلارىمىز تۋىمىزدى تالاي رەت جەڭىس تۇعىرىنا كوتەردى. جاقىندا قازاقتىڭ قايسار قىزدارى ەۆەرەستكە شىقتى. تۋىمىز الەمنىڭ ەڭ بيىك شىڭىندا تاعى دا جەلبىرەدى. الدا وليمپيادا ويىندارى كەلە جاتىر. نامىستى ورەندەرىمىز پاريج تورىندە تۋىمىزدى تىك ۇستايدى دەپ سەنەمىن”، – دەدى پرەزيدەنت.

Abai.kz