اقوردادا سۋ تاسقىنىمەن كۇرەسكە بەلسەنە اتسالىسقان ازاماتتاردى سالتاناتتى تۇردە ماراپاتتاۋ ءراسىمى ءوتتى.

مەملەكەت باسشىسى سۋ تاسقىنىمەن كۇرەس شارالارىنا بەلسەنە اتسالىسقان ەل ازاماتتارىن ماراپاتتاۋ راسىمىندە ءسوز سويلەدى.

پرەزيدەنت، ەڭ الدىمەن، بۇل بۇرىن ەشقاشان بولماعان ەڭ جويقىن تابيعي اپات ەكەنىن اتاپ ءوتتى. قازاقستاننىڭ 10 ايماعىندا توتەنشە جاعداي جاريالاندى. جالپى، ەل كولەمىندە 19 مىڭنان استام تۇرعىن ءۇيدى سۋ باستى.

– سىن ساعاتتا ەلىمىز ىرىستى ىنتىماعىن تانىتتى. ءبىز تابيعي اپات كەزىندە جۇرت بولىپ جۇمىلدىق. ءبىرتۇتاس ەل ەكەنىمىزدى كورسەتتىك. قۇتقارۋشىلار، اسكەريلەر، ىشكى ىستەر ورگاندارى مەن اكىمدىك قىزمەتكەرلەرى تاۋلىك بويى جۇمىس ىستەدى. ولار وتان الدىنداعى پارىزىن ءمىنسىز اتقاردى. ءبىر سوزبەن، انتقا ادال بولدى، – دەدى مەملەكەت باسشىسى.

قاسىم-جومارت توقاەۆ توپان سۋمەن كۇرەسكە كۇشتىك قۇرىلىمداردىڭ 63 مىڭنان استام قىزمەتكەرى اتسالىسقانىنا نازار اۋداردى. قۇتقارۋ وپەراتسياسى بارىسىندا 120 مىڭنان استام ادام، ونىڭ ىشىندە 40 مىڭ بالا قاۋىپسىز جەرگە كوشىرىلدى.

– بۇل – قۇتقارۋشىلار مەن ۇشقىشتاردىڭ قاجىرلى ەڭبەگىنىڭ ناتيجەسى. ءابىش كەكىلباەۆ «ەلىن سۇيگەن ازاماتقا ەڭ ۇلكەن قايعى – ءوز حالقىنىڭ تاعدىرىنان تىس قالۋ» دەپ ايتقان. ۇلتتىق ەرىكتىلەر جەلىسى تابيعي اپات بولعان ساتتەن باستاپ ەرەكشە بەلسەندى بولدى. 50 مىڭنان استام ۆولونتەر كومەك كەرۋەندەرىن ۇيىمداستىردى. ولار اپات ايماقتارىنا ازىق-تۇلىك جانە باسقا دا قاجەتتى زاتتاردى جەتكىزۋگە اتسالىستى. قازاقستان حالقى اسسامبلەياسىنىڭ «جۇرەكتەن جۇرەككە» اكتسياسى ورتاق ىسكە مول سەپتىگىن تيگىزدى، – دەدى پرەزيدەنت.

بۇگىن مەملەكەت باسشىسىنىڭ قولىنان ماراپات العان ازاماتتاردىڭ ءبىرى - 99250 اسكەري ءبولىمىنىڭ كومانديرى، پولكوۆنيك راسۋل زاكيروۆ. 

باتىس قازاقستان وبلىسىندا قازاقستان رەسپۋبليكاسى قارۋلى كۇشتەرى اۋماقتىق قورعانىس بريگاداسىنىڭ جەكە قۇرامى سۋ تاسقىنىنا قارسى كۇرەسكە تارتىلدى. تەمپەراتۋرانىڭ كۇرت كوتەرىلۋىمەن قاردىڭ قارقىندى ەرۋى ەرىگەن قار سۋىنىڭ ورال–سامارا جول توسەمىنەن اسىپ كەتۋىنە جانە وبلىس ورتالىعىنىڭ زاچاگانسك شاعىن اۋدانىنداعى بىرنەشە ءۇيدى سۋ باسۋىنا سەبەپ بولدى.

بولىمشە قالاعا ەرىگەن سۋعا توسقاۋىل قويۋدا كومەك كورسەتۋ قاجەتتىلىگى تۋرالى حابارلاماعا جەدەل دەن قويدى، - دەپ ءتۇسىندىردى 99250 اسكەري ءبولىمىنىڭ كومانديرى پولكوۆنيك راسۋل زاكيروۆ.

جەكە قۇرام تجم بولىمشەلەرىمەن جانە «جايىق تازا قالا» جشس ماماندارىمەن تىعىز بايلانىستا جۇمىس ىستەدى. 2,5 مىڭنان استام قاپ قۇم دايىندالدى.

Abai.kz