الماتى تاسىمالداۋشىلارى جول ءجۇرۋ ءتاريفىنىڭ تومەندىگى جۇرگىزۋشىلەردىڭ تاپشىلىعىنا اسەر ەتەدى دەپ ەسەپتەيدى.

جولاۋشىلار تاسىمالى كاسىپورىندارى قاۋىمداستىعىنىڭ مالىمەتتەرى بويىنشا، الماتى تاسىمالداۋشىلارىنا كاسىبي جۇرگىزۋشىلەر تاپشى. بۇگىنگى تاڭدا جەتىسپەۋشىلىك شامامەن 1000 ادامدى قۇرايدى. مۇنىڭ ءبىر سەبەبى-قوعامدىق كولىكتە جول ءجۇرۋ اقىسىنىڭ تومەن بولۋى.

«دۋمان ترانس KZ» جشس اۆتوبۋس پاركىنىڭ ديرەكتورى تالعات يساباەۆتىڭ ايتۋىنشا، ونىڭ ونىڭ اۆتوپاركىندە 40-قا جۋىق جۇرگىزۋشى جەتىسپەيدى.

«الماتى-ەلىمىزدىڭ ەڭ ءىرى مەگاپوليسى. جولاۋشىلاردى قاۋىپسىز تاسىمالداۋدى قامتاماسىز ەتۋ ءاربىر قالالىق اۆتوبۋس تاسىمالداۋشىسى ءۇشىن باستى مىندەت. بۇل رەتتە جۇرگىزۋشى قۇرامىنىڭ جەتىسپەۋشىلىگى بايقالادى. ءبىز ادامداردىڭ وسى ماماندىققا دەگەن قىزىعۋشىلىعىنىڭ تومەندەگەنىن بايقايمىز. بۇل، ەڭ الدىمەن، جالاقى دەڭگەيىنە، سونداي-اق جۇكتەلگەن جۇمىس كەستەسىنە بايلانىستى. جۇرگىزۋشىلەردى تارتۋ ءۇشىن تاسىمالداۋشىلار ۇنەمى جالاقىنى كوتەرۋگە ۇمتىلادى، الايدا قولدانىستاعى تاريفپەن بۇل وتە قيىن»، - دەپ اتاپ ءوتتى تالعات يساباەۆ.

ءوز كەزەگىندە «مادينا» جشس اۆتوبۋس پاركىنىڭ ديرەكتورى بەكەجان تىنىشىقباي 2015 جىلدان باستاپ جۇرگىزۋشىلەردىڭ جالاقىسى 150 مىڭ تەڭگەدەن 450 تەڭگەگە دەيىن وسكەنىن، ال جول ءجۇرۋ ءتاريفى وزگەرىسسىز قالعانىن اتاپ ءوتتى.

«بىراق بۇل جالاقى ەندى باسەكەگە قابىلەتتى ەمەس. جالپى جۇرگىزۋشىلەردىڭ تاپشىلىعىن ەسكەرە وتىرىپ، ءبىز ءىس جۇزىندە قوعامدىق كولىكتىڭ جۇمىسىن توقتاتپاۋ ءۇشىن قاراجات ىزدەۋگە جانە ولارعا قوسىمشا اقى تولەۋگە ءماجبۇرمىز. قالا تۇرعىندارى دا، اكىمدىك تە جولاۋشىلاردىڭ قاۋىپسىزدىگى جۇرگىزۋشىلەردىڭ كاسىبيلىگىنە، ولار جۇمىس ىستەيتىن جانە دەمالاتىن جاعدايلارعا بايلانىستى ەكەنىن ءتۇسىنۋى كەرەك. سوندىقتان اۆتوپاركتەر جۇرگىزۋشىلەرگە نەعۇرلىم تارتىمدى جاعدايلار ۇسىنا الاتىنداي اعىمداعى ءتاريفتى قايتا قاراۋ قاجەت دەپ سانايمىز»، - دەپ ەسەپتەيدى اۆتوپارك باسشىسى.

ەسكە سالساق، بۇگىندە جول ءجۇرۋ قۇنى قولما-قول اقشاسىز تولەم كەزىندە 100 تەڭگەنى جانە قولما-قول اقشامەن 200 تەڭگەنى قۇرايدى. وتكەن جىلى تاريف 11 جىلدا العاش رەت 20 تەڭگەگە كوتەرىلدى.

سۋرەت: جولاۋشىلار تاسىمالى كاسىپورىندارىنىڭ قاۋىمداستىعى

Abai.kz