بۇگىن، 1 شىلدە كۇنى باس پروكۋراتۋرادا 2024 جىلدىڭ ءبىرىنشى جارتىجىلدىعىنىڭ جۇمىس قورىتىندىسى بويىنشا كەڭەيتىلگەن القا وتىرىسى ءوتتى. 

جيىندا اكتيۆتەردى قايتارۋ بويىنشا مەملەكەتكە 312 ملرد تەڭگە، ونىڭ ىشىندە شەتەلدەن – 63 ملرد تەڭگە قايتارىلعانى ايتىلدى. 50 ملرد تەڭگەگە 513 مىڭ گەكتار وليگوپوليا جەرى تاركىلەنگەن.

«جالپى الەۋمەتتىك-ەكونوميكالىق سالادا پروكۋرورلاردىڭ اكتىلەرى بويىنشا 2,5 ملن ادامنىڭ قۇقىقتارى قالپىنا كەلتىرىلدى. بيۋدجەتكە 41 ملرد تەڭگە كولەمىندە كەلتىرىلگەن زالال وتەلدى. 167 قىلمىستىق ءىس قوزعالدى، 75 ادام سوتتالدى»، - دەلىنگەن حابارلامادا.

باس پروكۋراتۋرانىڭ مالىمەتىنشە، بيىل زاڭسىز ۇستالعان 708 ادام بوساتىلعان.

«تەرگەۋ بارىسىندا زاڭدىلىقتى قامتاماسىز ەتۋ شەڭبەرىندە پروكۋرورلار 800-دەن استام ازاماتتى قىلمىستىق ورتاعا نەگىزسىز تارتۋدىڭ جولىن كەستى. كونستيتۋتسيالىق قۇقىقتاردىڭ بۇزىلۋى ءۇش ەسەدەن استام تومەندەدى. پروكۋرورلاردىڭ نارازىلىقتارى مەن وتىنىشتەرى بويىنشا 34 سوتتالۋشىنىڭ جاعدايى جاقساردى، 2 ادام اقتالدى. 708 زاڭسىز ۇستالعان ادام بوساتىلدى.

سونداي-اق بيىل ارنايى پروكۋرورلار بىرقاتار رەزونانستىق ىستەر بويىنشا  تەرگەپ-تەكسەرۋدى اياقتادى جانە ولاردى سوتقا جىبەردى. كونستيتۋتسيالىق سوتتا 10 ءىس جۇرگىزۋ بويىنشا قۇقىقتىق قورىتىندىلار بەرىلدى. كونستيتۋتسيالىق سوت باس پروكۋروردىڭ 2 جولدانىمى بويىنشا وڭ شەشىمدەر شىعاردى»، - دەپ جازدى باس پروكۋراتۋرانىڭ ءباسپاسوز قىزمەتى.

Abai.kz