مەملەكەت باسشىسى قاسىم-جومارت توقاەۆا 2024 جىلعى 5 شىلدەدە "ادام ساۋداسىنا قارسى ءىس-قيمىل تۋرالى" قازاقستان رەسپۋبليكاسىنىڭ زاڭىنا قول قويدى. زاڭ بويىنشا ول العاشقى رەسمي جاريالانعان كۇننەن كەيىن 60 كۇنتىزبەلىك كۇن وتكەن سوڭ، ياعني، 2024 جىلعى 5 قىركۇيەكتە كۇشىنە ەنەدى.

زاڭعا سايكەس ادام ساۋداسىمەن بايلانىستى قىلمىستاردىڭ جاڭا قۇرامى قىلمىستىق جاۋاپكەرشىلىككە تارتىلادى.

"ادام ساۋداسىنا قاتىستى قىلمىستار بويىنشا تاتۋلاسۋعا بايلانىستى قىلمىستىق جاۋاپتىلىقتان بوساتۋ الىنىپ تاستالادى.​ قىلمىستىق-پروتسەستىك كودەكستە جابىرلەنۋشىنىڭ ارناۋلى الەۋمەتتىك قىزمەتتەر الۋعا قۇقىعى كوزدەلدى. اكىمشىلىك قۇقىق بۇزۋشىلىق تۋرالى كودەكسكە مەديتسينالىق ۇيىمداردىڭ جانە جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان ۇيىمداردىڭ لاۋازىمدى ادامدارىنىڭ جاڭا تۋعان نارەستەنى تاستاپ كەتۋ فاكتىسى تۋرالى حابارلاماعانى ءۇشىن اكىمشىلىك جاۋاپكەرشىلىك ەنگىزىلدى", – دەلىنگەن حابارلامادا. 

زاڭ شەڭبەرىندە قىلمىستىق كودەكسكە قىلمىستاردىڭ جاڭا ساناتى — ادام ساۋداسىنا بايلانىستى قىلمىستار ەنگىزىلەدى جانە "سەكسۋالدىق سيپاتتاعى وزگە دە قىزمەتتەر" دەگەن جاڭا ۇعىم ەنگىزىلمەك. سونىمەن قاتار قىلمىستىق جاۋاپكەرشىلىك ەنگىزىلەدى:

• ادامداردى، ونىڭ ىشىندە كامەلەتكە تولماعانداردى جىنىستىق سيپاتتاعى وزگە دە قىزمەتتەر كورسەتۋگە تارتۋ، سول سياقتى وسى ماقساتتار ءۇشىن جەڭگەتاي بولۋ; ​
• وسى قىزمەتكە تارتۋ ماقساتىندا، سول سياقتى جەڭگەتايلىق ماقساتتا جەزوكشەلىكتى، جىنىستىق سيپاتتاعى وزگە دە قىزمەتتەردى ناسيحاتتاۋ جانە (نەمەسە) جارنامالاۋ;
• تەلەكوممۋنيكاتسيا جەلىلەرىن، ونىڭ ىشىندە ينتەرنەتتى پايدالانۋ ارقىلى جەزوكشەلىكپەن اينالىسۋ، سەكسۋالدىق سيپاتتاعى وزگە دە قىزمەتتەر كورسەتۋ جانە جەڭگەتايلىق ءۇشىن پريتونداردى ۇيىمداستىرۋ نەمەسە ۇستاۋ.

قك-ءنىڭ 134, 308 جانە 309 جانە قر اقبتك-ءنىڭ 450-باپتارى بويىنشا ۇيىمداستىرۋشىلار جاۋاپكەرشىلىككە تارتىلادى. سونىمەن قاتار زاڭدا جەزوكشەلىك قىزمەتىن، كامەلەتكە تولماعان ادامنىڭ كورىنەۋ كورسەتەتىن وزگە دە جىنىستىق سيپاتتاعى قىزمەتتى العانى ءۇشىن قىلمىستىق جاۋاپتىلىق قاراستىرىلادى. بۇل قر قك-ءنىڭ 122-بابى بويىنشا جاۋاپكەرشىلىككە تارتۋعا مۇمكىندىك بەرەدى.​

Abai.kz