11 جىلعا سوتتالعان ەكس-مينيستر ارىستانبەك مۇحامەديۇلىنا تيەسىلى سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى مەملەكەتكە قايتارىلدى، دەپ حابارلايدى Abai.kz.

الماتى قالاسى پروكۋراتۋراسىنىڭ مالىمەتىنشە، الماتى قالاسى جەتىسۋ اۋدانى پروكۋراتۋراسىنىڭ تالاپ-ارىزى بويىنشا قۇنى 1,2 ميلليارد تەڭگە بولاتىن مەملەكەتتىك مۇلىك قايتارىلدى.

"17 شىلدە كۇنى الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبىن ساتۋ جونىندەگى مامىلەنى جارامسىز دەپ تانۋ تۋرالى شەشىمى زاڭدى كۇشىنە ەندى", – دەلىنگەن حابارلامادا.

سوتتا نىساننىڭ نارىقتىق قۇنىن 551 ميلليون تەڭگەگە تومەندەتۋ كورىنىس تاپقان زاڭبۇزۋشىلىقتار راستالدى.

اكىمشىلىك عيماراتتاردىڭ، سپورت زالدارىنىڭ جانە باسقا دا قۇرىلىستاردىڭ 7,6 مىڭ شارشى مەتر، سونىمەن قاتار 4,9 گەكتار جەردى قۇرايتىن مەكتەپتىڭ مۇلكىنە ارىستانبەك مۇحامەديۇلىمەن اففيليرلەنگەن تۇلعالارعا تيەسىلى "Nomad's Land" جشس يەلىك ەتكەن.

سۋرەت: Azattyq Rýhy/ابىلقاسىم ەسەن

Abai.kz