نىعماتۋلين زاۋىتىنداعى اپات: بەكتەنوۆ مالىمدەمە جاسادى
![](https://abai.kz/content/uploads/2024/07/karaganda-spetskomissiya.jpg)
ولجاس بەكتەنوۆ قاراعاندى فەرروقورىتپا زاۋىتىنداعى تج سالدارىنان قازا تاپقان جۇمىسشىلاردىڭ وتباسىلارى مەن تۋعان-تۋىستارىنا كوڭىل ايتتى. بۇل تۋرالى ۇكىمەتتىڭ ءباسپاسوز قىزمەتى حابارلادى.
«قاراعاندى فەرروقورىتپا زاۋىتىنداعى قايعىلى وقيعا سالدارىنان ادامداردىڭ قايتىس بولعانى تۋرالى سۋىت حاباردى تەرەڭ كۇيزەلىسپەن قابىلدادىم. قازا تاپقانداردىڭ وتباسىلارى مەن جاقىندارىنا ورنى تولماس قايعىلارىنا ورتاقتاسىپ، كوڭىل ايتامىن.
وقيعانىڭ سەبەپتەرىن انىقتاۋ مەنىڭ جەكە باقىلاۋىمدا. قازا تاپقانداردىڭ وتباسىنا بارلىق قاجەتتى قولداۋ كورسەتىلەدى»، - دەدى ولجاس بەكتەنوۆ.
بۇگىنگى تاڭدا قاراعاندى فەرروقورىتپا زاۋىتىندا تج سالدارىنان بولعان اپاتتىڭ سەبەپتەرىن تەرگەۋ جونىندەگى ارنايى كوميسسيا جۇمىس ىستەپ جاتىر.
انىقتاما:
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، بالالارى بار قازا تاپقانداردىڭ وتباسىنا اسىراۋشىسىنان ايىرىلۋ جاعدايىنا بايلانىستى رەسپۋبليكالىق بيۋدجەتتەن جاردەماقى جانە ماسق-تان الەۋمەتتىك تولەمدەر تاعايىندالادى.
قازا تاپقانداردىڭ وتباسى ساقتاندىرۋ ۇيىمىنان تولەمدەر جانە بجزق-دان جەرلەۋگە بىرجولعى تولەم الادى.
سونىمەن قاتار جۇمىس بەرۋشى كومپانيا جەرلەۋ ءراسىمىنىڭ بارلىق شىعىنىن، سونداي-اق كەلەسىدەي مىندەتتەمەلەردى:
➤ قازا تاپقان قىزمەتكەرلەردىڭ وتباسىنا 10 جىلدىق جالاقى مولشەرىندە بىرجولعى تولەم بەرۋدى;
➤ قازا تاپقاندار مەن زارداپ شەككەندەردىڭ وتباسىلارىنىڭ تۇرعىن ءۇي جاعدايىن جاقسارتۋعا كومەكتەسۋدى;
➤ قازا تاپقان قىزمەتكەرلەردىڭ وتباسى مۇشەلەرىنىڭ بارلىق نەسيەسىن تولىق وتەۋدى ءوز موينىنا الدى.
Abai.kz