قر ۇلتتىق سپورت قاۋىمداستىعىنىڭ ءباسپاسوز قىزمەتى استانادا وتەتىن V دۇنيەجۇزىلىك كوشپەندىلەر ويىندارى قارساڭىندا كوكپاردان قازاقستان ۇلتتىق قۇراماسى الماتى وبلىسىندا وقۋ-جاتتىعۋ جيىندارىن وتكىزىپ جاتقانىن حابارلادى. 

قۇرامانىڭ باستى قارسىلاستارى – قىرعىزستان جانە وزبەكستاننىڭ كوماندالارى.

باس باپكەر اقىلباي مانكەەۆتىڭ ايتۋىنشا، وسى وقۋ-جاتتىعۋ جيىنى اياسىندا قىركۇيەكتە وتەتىن ويىندارعا قاتىساتىن 40 جىلقىنىڭ ىشىنەن مىقتىلارى ىرىكتەلىپ الىنادى.

"ەكى ايدان بەرى V دۇنيەجۇزىلىك كوشپەندىلەر ويىندارىنا بەلسەندى دايىندالىپ جاتىرمىز. ەلىمىزدىڭ نامىسىن ابىرويمەن قورعايمىز دەپ ۇمىتتەنەمىز. وسىنداي ماڭىزدى سپورتتىق جارىستىڭ ەلىمىزدە ءوتىپ جاتقانى بىزگە ۇلكەن جاۋاپكەرشىلىك جۇكتەيدى. ءبىرىنشى وقۋ-جاتتىعۋ جيىنىندا ءوزىمىزدىڭ كۇش-قايراتىمىزعا باسا ءمان بەرسەك، ەندى جىلقىلاردى دايىنداپ جاتىرمىز", – دەدى كوكپاردان ۇلتتىق قۇراما مۇشەسى ادىلەت مامىت.

سۋرەت: قر ۇلتتىق سپورت قاۋىمداستىعىنىڭ ءباسپاسوز قىزمەتى

Abai.kz