قوستاناي وبلىسىنىڭ باس يمامى باحىتبەك تاجىمبەتتى ءتارتىپ ساقشىلارى بۋرابايداعى «رەگيون» تۇنگى كلۋبىنىڭ جانىندا «حايلاندر» كولىگىمەن كەتىپ بارا جاتقاندا قولعا تۇسىرگەن. اقمولا وبلىسىنىڭ سوتى يمامنىڭ ارەكەتىنە قاتىستى شەشىم شىعاردى.

«سوت قاۋلىسىمەن تاجىمبەت باحىتبەك نۇرعابىلۇلى قر اقبتك-ءنىڭ 608- بابىنىڭ 1 -بولىگىمەن كىنالى دەپ تانىلدى. وعان وسى باپ بويىنشا 15 تاۋلىككە قاماۋعا الۋ جانە 7 جىلعا كولىك قۇرالىن باسقارۋ قۇقىعىنان ايىرۋ جازاسى تاعايىندالدى»، - دەلىنگەن وبلىستىق سوتتىڭ ءباسپاسوز قىزمەتى تاراتقان اقپاراتتا.

سونداي-اق، ءوڭىر سوتى يمام جازاسىن بۋراباي اۋدانىندا وتەپ جاتقانىن حابارلادى.

ەسكە سالساق، 25 شىلدەدە بۋرابايدا ماساڭ كۇيدە كولىك جۇرگىزگەن قوستانايدىڭ باس يمامى ۇستالعانىن جازعان بولاتىنبىز. پوليتسيا ءوڭىردىڭ باس يمامىنا قاتىستى اكىمشىلىك حاتتاما تولتىرعان.

Abai.kz