قازاقستانعا جوزەپ بوررەل كەلدى
قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەلمەن كەلىسسوزدەر جۇرگىزدى.
«جوزەپ بوررەلل مىرزانىڭ بۇگىنگى ساپارىنا ەرەكشە ءمان بەرەمىز، العاش 2022 جىلى استاناعا ساپارمەن كەلگەن ەدى. ءوزىم بىلتىر مامىردا بريۋسسەلدە بولدىم. بۇگىنگى كەزدەسۋ ءبىزدىڭ ءتورتىنشى تولىققاندى باسقوسۋىمىز. ەكى جاقتى بايلانىس قازاقستان مەن ەۋرووداق اراسىنداعى ىنتىماقتاستىقتىڭ جوعارى دەڭگەيىنىڭ تاعى ءبىر كورسەتكىشى ەكەنىن تولىق سەنىممەن ايتا الامىز. سوڭعى جىلدارى قازاقستان مەن ەۋرووداق ءوزارا سەنىمگە، سىيلاستىق پەن ورتاق باسىمدىقتارعا نەگىزدەلگەن بەرىك قاتىناستاردى ءبىرىزدى دامىتۋدا»، - دەدى مۇرات نۇرتىلەۋ كەزدەسۋدى قورىتىندىلاي كەلە باق وكىلدەرى الدىندا.
سونداي-اق، مينيستر ەۋرووداق وكىلىمەن كەلىسسوزدىڭ اشىق ءارى كونسترۋكتيۆتى سيپاتتا وتكەنىن ايتتى.
«ءبىزدىڭ ماقسات – قازاقستان مەن ەۋرووداق اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمدى ودان ءارى جۇزەگە اسىرۋ جولدارىن قاراستىرىپ، ءوزارا ءتيىمدى شەشىمدەر قابىلداۋ. قول جەتكىزگەن ۋاعدالاستىقتار جان-جاقتى بايلانىستارىمىزدى ودان ءارى تەرەڭدەتۋگە جاڭا لەپ بەرەرىنە سەنىمدىمىن»، - دەيدى ول.
ايتا كەتەيىك، بۇگىن استاناعا ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى، ەۋروكوميسسيانىڭ ۆيتسە-پرەزيدەنتى جوزەپ بوررەلل رەسمي ساپارمەن كەلدى.
Abai.kz
