ال، كىمنىڭ قانداي ءدىن ۇستاناتىنىندا جۇمىسىم جوق!

سوڭعى كەزدە قازاق اراسىندا ءبىر سەنىمدى جوعارى قويىپ، باسقا سەنىمدەردى تومەندەتىپ، ءتىپتى بىلاپىت ءسوز جازۋ، قارعاۋ ۇدەپ بارا جاتىر.

ءبىر جازبانى وقىدىم. وندا وركەنيەتتى شەتەلدەگى مۇسىلمان سپورتسمەندەردى سەنىمىنە بولا ەشكىم بولەكتەپ "بۋللينگ جاساپ جاتقان جوق" دەيدى جازباگەر. ال، قازاقستاندا، سپورستمەندەردى سەنىمىنە بولا سىناپ جاتىر، بۇل دۇرىس ەمەس دەپ جازىپتى.

بىراق، جازباگەر قازاقستاندا نەگە بۇلاي بولىپ جاتقانىنىڭ سەبەبىن بىلۋگە تالپىنىس تانىتپايدى.

مەنىمشە شەتەلدە تۇراتىن مۇسىلماندار وزدەرى تۇراتىن ەلددەرىڭ سالتتارىن جوققا شىعارىپ جاتقان جوق. ول ەلدىڭ ۇلتتىق مۋزىكالىق اسپابىن حارام دەمەيدى. ءوز تىلدەرىڭدە امانداسپاڭدار، اراپشا "اسالاۋماعالەيكۋم" دەپ امانداسىڭدار دەمەيدى. سەندەردىڭ - فرانتسۋز، نەمىس، اعىلشىن، يتاليان، يسپان ۇلتتارىڭنان ءدىن بيىك تۇر دەمەيدى. اتا-انالارىڭ دىنگە مويىسۇنباسا ولاردى سىيلاماڭدار دەمەيدى. يسلام دىنىنە سەنبەيتىندەردى "قالماقسىڭدار، تاڭىريتسىڭدەر" دەمەيدى. ءتىپتى ول جاقتىڭ مۇسىلماندارى "اعىلشىننىڭ، نەمىستىڭ، فرانتسۋزدىڭ باتىر بابالارى وتان ءۇشىن ەمەس يسلام ءدىنى ءۇشىن سوعىستى" دەپ كوپشىلىككە جار سالمايدى... تاعىسىن تاعىلار.

ال قازاقستاندا بۇنداي "اقىل ۇيرەتۋلەر" ءجيى-ءجيى ايتىلادى. مەنىڭشە قارسىلىق وسىنداي كەرتارتپالىقتارعا قارسىلىق رەتىندە كورسەتىلىپ جاتىر. قارسى جاق تا وزىنشە "سەندەر ساتقىنسىڭدار، اراپقۇلسىڭدار" دەپ ت.ب. جاۋاپ بەرۋدە.

مەنىڭشە ءبىر-بىرىمەن سەنىم تاقىرىبى بويىنشا پىكىرتالاس جاساپ جاتقاندار قازاقستان رەسپۋبليكاسىنىڭ اتا زاڭىنداعى بارلىق سەنىم تەڭ دەگەن ەرەجەنى مىقتاپ ۇستانۋى ءتيىس. ولاي بولماعان كۇندە بۇل جاعداي ودان ارى ۋشىعا بەرەرى ءسوزسىز.

قازاقستانداعى بارلىق سەنىم، ءدىن ۇستانۋشىلاردىڭ ءبارىن ۇستامدى بولۋعا شاقىرامىن.

ارقايسىڭىز ءوز سەنىم، دىندەرىڭىزبەن بولىپ باسقا سەنىم مەن دىندەرگە ارالاسپاڭىزدار.

جانە دە قازاق ۇلتىنىڭ رۋحاني قۇندىلىقتارى بولىپ تابىلاتىن اتا-انانى سىيلاۋ، بايىرعى زاماننان قالىپتاسىپ قازاقتى ۇلت ەتىپ ۇيىستىرىپ وتىرعان سالتتارىمىزعا، مۋزىكالىق اسپاپتارىمىزعا، ءان-كۇيلەرىمىزگە قول تيگىزبەڭىزدەر.

سوناۋ ساق زامانىنان بۇگىنگە دەيىن وسىنشاما كەڭ دالامىزدى بىلەكتىڭ كۇشىمەن، نايزانىڭ ۇشىمەن، قىلىشتىڭ جۇزىمەن ساقتاپ قالعان بابالارىمىزدىڭ ەرلىگىن جوققا شىعارماڭىزدار.

وسىنداي باعا جەتپەس ۇلتتىق رۋحاني قۇندىلىقتارىمىز جوعالسا ۇلتىمىز دا جوعالادى. ۇلتىمىز جوعالسا ەلىمىزدىڭ ەگەمەندىگىنە قاۋىپ تونەتىنىن بارىڭىزدە تۇسىنەسىزدەر دەپ بىلەمىن.

بەردالى وسپاننىڭ جەلىدەگى جازباسى

Abai.kz