«نازارباەۆ زياتكەرلىك مەكتەپتەرى» وتكىزگەن ساتىپ الۋلار بويىنشا 10,5 ملرد تەڭگەنىڭ زاڭ بۇزۋشىلىقتارى انىقتالدى، دەپ حابارلايدى جوعارى اۋديتورلىق پالاتانىڭ ءباسپاسوز قىزمەتى.

جوعارى اۋديتورلىق پالاتا وتىرىسىندا 2019-2023 جىلدارداعى «نازارباەۆ زياتكەرلىك مەكتەپتەرى»  دەربەس ءبىلىم بەرۋ ۇيىمىندا (نزم) بيۋدجەت قاراجاتىنىڭ پايدالانىلۋ تيىمدىلىگىنە جۇرگىزىلگەن مەملەكەتتىك اۋديت ناتيجەلەرى قارالدى.

جالپى ەسەپتى كەزەڭدە نازارباەۆ زياتكەرلىك مەكتەپتەرى جۇمىسىنا بيۋدجەتتەن 250 ملرد تەڭگە بولىنگەن، سونىڭ ىشىندە 22 ملرد تەڭگەدەن استامى تاجىريبەنى تاراتۋعا قارالعان. دەگەنمەن بۇگىنگى تاڭدا مەملەكەتتىك جوسپارلاۋ جۇيەسىندە نزم ءرولى ناقتى ايقىندالماعان. اتاپ ايتقاندا، باعدارلامالاردا، ۇلتتىق جوبالار مەن تۇجىرىمدامالاردا تاجىريبەنى تاراتۋ ناتيجەسىنە قاتىستى ناقتى مىندەتتەر، فۋنكتسيالار مەن كورسەتكىشتەر بەلگىلەنبەگەن.

مۇنىڭ ماڭىزدى بولىگى – جالپى ءبىلىم بەرەتىن مەكتەپتەرگە نزم ازىرلەگەن وقۋلىقتاردى ەنگىزۋ. بىراق سالالىق مينيسترلىك ماقۇلداعان ءبىلىم بەرۋ پروتسەسىنە ارنالعان 3 مىڭنان استام وقۋلىقتىڭ نەبارى 67 نەمەسە 2% عانا نزم ۇلەسىنە تيەسىلى. وسىلايشا، ۇيىمنىڭ ورتا ءبىلىم بەرۋ جۇيەسىن دامىتۋ الەۋەتى تولىق پايدالانىلماي وتىر.

وتىرىس بارىسىندا جوعارى اۋديتورلىق پالاتا توراعاسى ءاليحان سمايىلوۆ بۇل باعىتتاعى ناتيجەنىڭ بولىنەتىن قارجىلاندىرۋ كولەمىنە سايكەس كەلمەيتىنىنە نازار اۋداردى.

«ۇلىتاۋ وبلىسىنىڭ بارلىق بيۋدجەتى كولەمىندەگى قاراجات وسى بەس جىلدان از ۋاقىت ىشىندە نازارباەۆ زياتكەرلىك مەكتەپتەرىنە بولىنگەن. ونىڭ ىشىندە 22 ملرد تەڭگەدەن استام قاراجات تاجىريبەنى تاراتۋعا قارالعان. ستاتيستيكانى قالاي قاراساق تا، وكىنىشكە قاراي، ايتارلىقتاي وزگەرىس جوق. ونىڭ ۇستىنە، بۇل ءتىپتى مەملەكەتتىك جوسپارلاۋ جۇيەسى شەڭبەرىندە دە قامتىلماعان»، — دەدى ءاليحان سمايىلوۆ.

جالپى مەملەكەتتىك اۋديت بارىسىندا:

- 274,4 ملن تەڭگەگە قارجىلىق بۇزۋشىلىقتار;

- 8,3 ملرد تەڭگەگە قاراجاتتى ءتيىمسىز جوسپارلاۋ;

- شامامەن 6 ملرد تەڭگەنى ءتيىمسىز پايدالانۋ;

- 134 راسىمدىك بۇزۋشىلىق پەن 30 جۇيەلىك كەمشىلىك انىقتالدى.

تەكسەرۋ ءىس-شارالارىنىڭ قورىتىندىسى بويىنشا 1 ماتەريال قۇقىق قورعاۋ ورگاندارىنا، اكىمشىلىك قۇقىق بۇزۋشىلىق بەلگىلەرى بار تاعى 10 فاكتى بويىنشا ماتەريال اكىمشىلىك ءىس جۇرگىزۋدى قوزعاۋ ءۇشىن ۋاكىلەتتى ورگاندارعا جىبەرىلدى.

Abai.kz