ىستانبۇلداعى زەيتىنبۇرنى اۋدانىندا 10 تامىز اباي قۇنانبايۇلىنىڭ ەسكەرتكىشىنە گۇل شوقتارىن قويۋ ءراسىمى وتكىزىلدى. ونى ۇيىمداستىرعان ىستانبۇلداعى باس كونسۋل نۇريدين امانقۇل مىرزا اباي اتاعا تاعزىم ەتۋ شاراسىن جاسادى.

گۇل قويۋ سالتاناتىنا تۇركياداعى قازاق دياسپوراسىنىڭ كورنەكتى وكىلدەرىدە قاتىستى. ولپاردىڭ اراسىندا گەرمانيادا تۇراتىن ابدۋراحمان چەتين، تۇركيا قازاعى مانسۇر تايجى (التايدان تۇركياعا كوشتى باستاپ كەلگەن حۇسەين ءتايجىنىڭ ۇلى), پاريجدە تۇراتىن حاليفا التايدىڭ ۇلى ابدۋسامەت التاي، بەلگىلى قازاق كاسىپكەرلەرى; تۇركياداعى JS Holding پرەزيدەنتى، مادەنيەت جانە ساۋدا ورتالىعىنىڭ توراعاسى عانيبەت عايسا، قازاق تەرى كومپانياسىنىڭ باسشىسى ەركان جۇلدىز، كاسىپكەر جاعىپپار ۇشار، يسميلكوي قاۋىمداستىعىنىڭ باسشىسى مەحمەت ءالىم، قازاق-تۇرىك قوعامىنان ابدۋللا گۇلەر، فرانتسيادا جانە اۆستريادا تۇراتىن قازاق باۋىرلارىمىز نەجيدەت تۇنجىر جانە قىزىربەك مىرزا، اۋعان قازاقتارى قورقىت اتا قوعامىنىڭ جاۋاپتى حاتشىسى فايەز جارقىن جانە مۇرات تەمىز، قازاقستان تەلەارناسىنىڭ تۇركياداعى مەنشىكتى ءتىلشىسى ايدوس ءاشىم جانە جەرگىلىكتى تۇرعىندار بار.

ونان سوڭ باس كونسۋلدىڭ باسشىلىعىندا ەمەن-ەركىن وتىرىس بولىپ نۇريدين امانقۇل قازاقستان مەن تۇركيا اراسىنداعى بايلانىستىڭ 33 جىلدا اتقارعان جۇمىسىنا توتالدى. ابايعا قۇرمەت بۇكىل تۇركى دۇنيەسىنە قۇرمەت. باس قوسۋدى ىستانبۇلداعى قازاقستان مادەنيەت جانە ساۋدا ورتالىعىنىڭ باسشىسى، قازاق قاۋىمداستىعىنىڭ وكىلى ەرجان ءۋايىس جۇرگىزىپ وتىردى. زەيتىنبۇرنى اۋدانىندا اباي ەسكەرتكىشى، اباي الاڭى، اباي كوشەسى، اباي اتىنداعى مەكتەپ ليتسەيى بار. اباي مەكتەبىندە دومبىرا ۇيىرمەسى جۇمىس جاسايدى. وسىنداي مادەني شارالاردى وسى اباي ەسكەرتكىشى الاڭىندا وتكىزۋگە باستاماشى بولىپ وتىرعان باس كونسۋل نۇريدين امانقۇلعا العىس ايتتى. دومبىرا كۇنىنىڭدە وتكىزىلگەنى سونىڭ ايعاعى.

قوعام قايراتكەرى مانسۇر تايجى ءوز سوزىندە التايدان تۇركياعا كوشكەن قازاقتاردىڭ كوشىن ماقتانىشپەن باياندادى. سول كەزدەگى تۇرىك حالقىنا قامقورشىلىعى ءۇشىن ريزاشىلىعىن ءبىلدىردى. پاريجدەگى قازاق قاۋىمداستىعىنىڭ قۇرمەتتى توراعاسى ابدۋسامەت التاي اكەسى ءدىن جاناشىرى حاليفا التايدىڭ اباي تۋرالى ماقالاسىن وقىپ بەردى. KATIAD قوعامدىق قورىنىڭ باسشىسى ەرول جولشى، «قازاق ەلى» جۋرنالىنىڭ رەداكتورى نۇرگۇل بەرىكبول جۋرنالدىڭ ءبىر سانى ابايعا ارنالعان نۇسقاسىن كەلگەن قوناقتارعا تارقاتتى. ىستانبۇلداعى يەديتەپە ۋنيۆەرسيتەتىنە «بولاشاق» باعدارلاماسى بويىنشا ءىس-تاجىريبەدەن وتۋگە كەلگەن PhD دوكتور كونرباەۆ نۋرجان; ابايدى العاش زەرتتەگەن ءاليحان بوكەيحان مەن احمەت بايتۇرسىنۇلىنىڭ ەڭبەكتەرىنە جانە مۇحتار اۋەزوۆتىڭ عىلىمي مۇراسىنا توقتالىپ ءوتىپ، ءبىرشاما دەرەكتەر كەلتىردى.

اباي اتانىڭ قۇرمەتىنە جايىلعان اق داستارحانعا باتانى 90 جاستاعى ابىز اقساقال ابدۋراحمان چەتين بەردى. جەرگىلىكتى قازاق مولدالارى بەرەكەت پەن مەسۋت قۇران باعىشتادى. انكارادا اباي كۇنىنە ارنالعان شارالارعا تۇركياداعى قازاق ەلشىسى ەركەبۇلان ساپيەۆ قاتىستى. اباي دەسە قازاق، قازاق دەسە اباي دەگەندەي ابايدىڭ ەسىمى ماڭگى جاسايدى. قازىرگى تاڭدا قازاقستاندا ءبىر وبلىستىڭ اتى، بىرنەشە اۋدان مەن كوپتەگەن مەكتەپتەرگە جانە اۋىلدارعا ابايدىڭ ەسىمى بەرىلگەن. سونىمەن قاتار، ەلىمىزدە اباي ەسىمى قويىلعان 18 452 ادام تۇرادى. اباي اتامىز ايتپاقشى «ءولدى دەۋگە بولا ما، ويلاڭدارشى، ولمەيتۇعىن ارتىنا ءسوز قالدىرعان» دەمەكشى. اباي اتامىز ارتىندا ولمەيتىن ءسوز قالدىرىپ، 18 مىڭنان استام ادامعا اباي ەسىمى بەرىلگەن. الەمنىڭ بىرنەشە ەلدەرىندە ابايدىڭ ەسكەرتكىشى مەن اباي اتىنداعى كوشەلەر بار.