5-ءشى دۇنيەجۇزىلىك كوشپەندىلەر ويىندارى قارساڭىندا قۇسبەگىلەر اقمولا وبلىسىندا وقۋ-جاتتىعۋ جيىندارىن وتكىزىپ جاتىر.

قۇسبەگىلىك (ساياتشىلىق) فەدەراتسياسىنىڭ اتقارۋشى ديرەكتورى بازاربەك كۇنتۋعاننىڭ ايتۋىنشا ەلىمىزدىڭ ۇزدىك قۇسبەگىلەرى كوشپەندىلەر ويىندارىنا دەگەن دايىندىقتارىن قىزدىرا تۇسكەن.

«ششۋچينسك قالاسىندا تامىزدىڭ 12-ءسى مەن 25-ءسى ارالىعىندا وتەتىن وقۋ-جاتتىعۋ جيىنىمىزدا 9 سپورتشى بۇركىت، قارشىعا جانە يتەلگى قۇستارىمەن جاتتىعىپ جاتىر. كەلەسى وقۋ-جاتتىعۋ جيىنىمىز استانا قالاسىندا، 27-ءشى تامىز بەن 7-ءشى قىركۇيەك ارالىعىندا بولادى», - دەپ اتاپ ءوتتى ب. كۇنتۋعان.

قۇسبەگىلىكتەن ۇلتتىق قۇراما مۇشەلەرى دايىندىق بارىسى جايىندا ايتىپ بەردى.

«5-ءشى دۇنيەجۇزىلىك كوشپەندىلەر ويىندارىنا دايىندالىپ جاتىرمىز. بار بىلگەنىمىزدى، مۇمكىنشىلىگىمىزدى پايدالانامىز. ەۋروپادان، موڭعوليا، قىرعىزستاننان مىقتى قارسىلاستار كەلەدى. ولار دا بارىن سالارى انىق»، - دەيدى قۇسبەگىلىكتەن ۇلتتىق قۇراما مۇشەسى يبراگيم بازارباەۆ.

«ششۋچينسك قالاسىندا كوشپەندىلەر ويىندارىنا دايىندىق ۇستىندەمىز. قازىر الداعى سايىستاعى ءۇش سانات بويىنشا قاتىساتىن ءۇش بۇركىت، ءۇش يتەلگى، ءۇش قارشىعانى باپتاپ جاتىرمىز. ولار جاز بويى تۇلەكتە بولدى. ەندى ەتىن تارتىپ، جىلدامدىققا دايىندايمىز. ال ءوزىم دوداعا العىر اتتى بۇركىتپەن قاتىسامىن»، - دەپ اتاپ ءوتتى قۇسبەگىلىكتەن ۇلتتىق قۇراما مۇشەسى سەرىكبەك كۇنتۋعانۇلى.

كوشپەندىلەر ويىندارى اياسىندا قۇسبەگىلىكتەن (ساياتشىلىقتان) بولاتىن سايىس قىركۇيەكتىڭ 12-13 ارالىعىندا، ەتنواۋىل اۋماعىندا وتەدى.

ەسكە سالا كەتەيىك، رەسپۋبليكالىق «قۇسبەگىلىك» فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى.  قاۋىمداستىق قۇرامىندا بۇدان وزگە «بايگە»، «ساداق اتۋ»، «تەڭگە ءىلۋ»، «اۋدارىسپاق»، «جامبى اتۋ»، «كوكپار»، «اسىق اتۋ»، «JORYQ» ات سپورتى جانە ت.ب. فەدەراتسيالار بار. قر ۇلتتىق سپورت قاۋىمداستىعىن يسلامبەك سالجانوۆ باسقارادى.

اتاپ وتەيىك، 8-13 قىركۇيەكتە استانا قالاسىندا 5-ءشى دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانۋدا. 5-ءشى دۇنيەجۇزىلىك كوشپەندىلەر ويىندارىنىڭ باس دەمەۋشىسى - ALAGEUM ELECTRIC, ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.

ۇلتتىق سپورت قاۋىمداستىعىنىڭ ءباسپاسوز قىزمەتى

Abai.kz