پرەزيدەنتكە 2024 جىلدىڭ قاڭتار-شىلدە ايلارىندا قىسقا مەرزىمدى ەكونوميكالىق ينديكاتور 112,4 پايىزدى قۇراعانى باياندالدى. وبلىسقا 188,2 ميلليارد تەڭگە ينۆەستيتسيا تارتىلدى، سونىڭ ىشىندە جەكە ينۆەستيتسيانىڭ مولشەرى 136,7 ميلليارد تەڭگەگە جەتتى.

بەيبىت يساباەۆتىڭ ايتۋىنشا، ايماق ەكونوميكاسىنىڭ اگرارلىق سالاعا نەگىزدەلگەنىن ەسكەرە وتىرىپ، پايدالانىلماعان جەرلەردى قايتارۋ جانە اينالىمعا ەنگىزۋ شارالارىنا، «اۋىل اماناتى» باعدارلاماسىن جۇزەگە اسىرۋ، قانت ءوندىرىسىن دامىتۋ ماسەلەلەرىنە باسا ءمان بەرىلگەن.

مەملەكەت باسشىسىنا ونەركاسىپ ءوندىرىسىن وركەندەتۋ، وڭىرگە ينۆەستيتسيا تارتۋ جايىندا مالىمەت بەرىلدى. اتاپ ايتقاندا، بىرقاتار پەرسپەكتيۆتى ينۆەستيتسيالىق جوبا ىسكە اسىرىلىپ جاتىر. ولاردىڭ قاتارىندا كەربۇلاق اۋدانىنداعى مەتاللۋرگيا كومبيناتى، «قورعاس – شىعىس قاقپاسى» ارنايى ەكونوميكالىق ايماعىنداعى «قازاقستان-قىتاي حالىقارالىق ونەركاسىپ قالاسى» يندۋستريالدى پاركى، جوڭعار قاقپاسى اۋماعىنداعى قۋاتى 1 گۆت بولاتىن جەل ەلەكتر ستانتسياسى سياقتى ءىرى جوبالار بار. ءوڭىردىڭ كولىك-لوگيستيكالىق جانە ترانزيتتىك الەۋەتىن ارتتىرۋ ءۇشىن جۇيەلى جۇمىستار قولعا الىنعان.

قاسىم-جومارت توقاەۆقا تۇرعىن ءۇي-كوممۋنالدىق شارۋاشىلىق سالاسىنىڭ جاي-كۇيى تۋرالى ايتىلدى. وبلىس اكىمىنىڭ سوزىنشە، جىل سوڭىنا دەيىن ءوڭىردى گازبەن قامتۋ دەڭگەيى 56,5 پايىزعا جەتەدى. 2028 جىلعا قاراي جەتىسۋ وبلىسى كوگىلدىر وتىنمەن تولىق قامتىلادى دەپ كۇتىلىپ وتىر. سوڭعى 2 جىلدا وبلىستا 86 الەۋمەتتىك ينفراقۇرىلىم نىسانى سالىنىپ، جوندەۋدەن وتكەن.

پرەزيدەنتكە تۇرعىن ءۇي جانە جول قۇرىلىسى، ءتۋريزمدى دامىتۋ جايىندا اقپارات بەرىلدى. جالپى جەتىسۋدىڭ تۋريستىك باعىتى الاكول، بالقاش كولدەرى، «التىنەمەل»، «جوڭعار الاتاۋى» ۇلتتىق پاركتەرى، جوڭعار الاتاۋىنىڭ تاۋ ماسسيۆتەرى سەكىلدى حالىق ءجيى باراتىن ورىنداردىڭ الەۋەتىنە يەك ارتادى. ەكولوگيالىق ءتۋريزمدى دامىتۋ ماقساتىندا بۇرحانبۇلاق سارقىراماسى مەن جاسىلكولگە اپاراتىن جول سالۋ جوسپارلانعان.

كەزدەسۋ سوڭىندا مەملەكەت باسشىسى ءوڭىردى الەۋمەتتىك-ەكونوميكالىق تۇرعىدان دامىتۋ جانە حالىقتىڭ ءال-اۋقاتىن جاقسارتۋ باعىتىنداعى جۇمىستاردى ودان ءارى جالعاستىرۋدى تاپسىردى.

Abai.kz