بۇگىن ماجىلىستە قارجى مينيسترلىگى 2025-2027 جىلدارعا ارنالعان رەسپۋبليكالىق بيۋدجەت جوباسىن تانىستىرىپ كەلدى. دەپۋتاتتار ءار سالاعا بولىنگەن اقشانىڭ تيىنىنا دەيىن ساناپ، پىكىرتالاس تۋدىرىپ جاتىر، دەپ حابارلايدى  Abai.kz a Azattyq-ruhy.kz-كە سىلتەمە جاساپ.

ماسەلەن، ەرمۇرات باپي بيۋدجەتتەگى تاپشىلىققا قىنجىلا كەلە، بۇل قاراجات كەپكەن تۋلاق سياقتى، تالاسقا سالىنىپ جاتقانىن ايتتى.

«تاپشىلىق! كەپكەن تۋلاق سياقتى دۇنيە عوي. ەشكىنىڭ كەپكەن تەرىسى سياقتى، بىلاي تارتساڭ، بىلاي جەتپەيدى، بىلاي تارتساڭ، بىلاي جەتپەيدى. ەكى جاققا تارتساڭ جىرتىلىپ، ايىرىلىپ كەتۋى مۇمكىن. دەگەنمەن، ەگەر  بىز گەوساياسي تاۋەكەلدەردى ەسەپكە الساق، وسى تاپشىلىقتىڭ ءبارى تۇككە تۇرماي قالادى. سوندىقتان، مەن ۇلتتىق ەكونوميكا مينيسترلىگىنەن سۇرايىن دەگەنىم – قورعانىس سالاسىنا بولىنگەن سوما تۋرالى. جالپى ىشكى ءونىمنىڭ قانشا بولىگىن قورعانىس مينيسترلىگىنە ءبولىپ وتىرسىزدار؟ – دەپ سۇرادى باپي.

بۇعان دەيىن رەسپۋبليكالىق بيۋدجەتتىڭ بولجامىن تانىستىرعان قارجى ۆيتسە-ءمينيسترى ابزال بەيسەنبەكۇلى 2025 جىلعا ارنالعان كۇش قۇرىلىمدارىنىڭ شىعىستارى 109 ملرد تەڭگەگە ۇلعايىپ، 2,7 ترلن. تەڭگە كولەمىندە جوسپارلانىپ وتىرعانىن ايتقان ەدى.

«بيىل بيۋدجەتتىڭ 0,8 پايىزى، كەلەسى 0,4 پايىزى بولىنەدى دەيسىز. قارجىلاندىرۋدىڭ ءتۇرى وسى ما؟ ءبىزدىڭ مامانداردىڭ بولجامى بويىنشا 2030 جىلى سوعىس بولادى. سونداي تاۋەكەل بار. وسىنداي جاعدايدا ءبىزدىڭ قورعانىس سالاسىنا نەبارى 0,4 پايىز ءبولۋ دەگەنىمىزدى قالاي تۇسىنەمىز؟  كەلىسىپ العانسىزدار ما؟ قايدان شىققان ەسەپ بۇل؟ ءبىز بۇل ماسەلەنى جايىنا قالدىرمايمىز»، – دەيدى ەرمۇرات باپي.

Abai.kz