كادر تاپشىلىعى بار وڭىرلەرگە ۇزدىك پەداگوگتەردى تارتۋدىڭ ارنايى باعدارلاماسىنا قاتىسۋعا قۇجات قابىلداۋدىڭ ءبىرىنشى كەزەڭى اياقتالدى، دەپ حابارلايدى قر وقۋ-اعارتۋ مينيسترلىگىنىڭ ورتا ءبىلىم كوميتەتى.

باعدارلاما تۇركىستان، اتىراۋ، ماڭعىستاۋ جانە الماتى وبلىستارىندا جۇزەگە اسىرىلۋدا. اتالعان وڭىرلەرگە ماتەماتيكا، فيزيكا، حيميا، ورىس ءتىلى مەن ادەبيەتى، شەت ءتىلى مۇعالىمدەرى قاجەت ەتىلەدى. باعدارلامادا پەداگوگتەردى قولداۋدىڭ بىرقاتار شارالارى قاراستىرىلعان: 150%-عا دەيىنگى مولشەردە ىنتالاندىرۋشى قوسىمشا اقى تولەۋ، سونداي-اق ارنايى باعدارلاماعا قاتىسۋشى جوو تۇلەكتەرىنە «پەداگوگ-مودەراتور»، ال «پەداگوگ-ساراپشى» مەن «پەداگوگ-زەرتتەۋشىگە» ءبىر ساتى جوعارى بىلىكتىلىك ساناتىن بەرۋ.

«كونكۋرسقا ءتيىستى بەيىنى بويىنشا جوعارى پەداگوگيكالىق، جوعارى كاسىپتىك ءبىلىمى بار پەداگوگتەر، بىلىكتىلىك ساناتتارى بار پەداگوگتەر، سونداي-اق وقۋ ۇلگەرiمi جاقسى جوعارى وقۋ ورىندارىنىڭ پەداگوگيكالىق ماماندىقتارىنىڭ تۇلەكتەرi تۇرعىلىقتى جەرىنە قاراماستان قاتىسا الادى. بايقاۋدان ىرىكتەلىپ، ءتورت وبلىستىڭ بىرىنە قونىس اۋدارعان مۇعالىمدەردىڭ بالالارى بالاباقشادا، ورتا مەكتەپتە ورىنمەن قامتىلادى جانە ولارمەن ەڭبەك شارتى 5 جىلعا جاسالادى»، - دەيدى وقۋ-اعارتۋ مينيسترلىگى ورتا ءبىلىم كوميتەتىنىڭ توراعاسى قانىبەك جۇماشەۆ.

بايقاۋ ەكى كەزەڭنەن تۇرادى: كومپيۋتەرلىك تەستىلەۋ، ەسسە جازۋ، سونداي-اق اڭگىمەلەسۋدەن ءوتۋ. تەستىلەۋ مەن ەسسە جازۋ ونلاين فورماتتا ەلىمىزدىڭ 17 وڭىرىندە نزم بازاسىندا قاتىسۋشىنىڭ تاڭداۋى بويىنشا قازاق، ورىس نەمەسە اعىلشىن تىلىندە وتەدى. مۇعالىمدەردى بوس لاۋازىمدارعا تارتۋ ءۇشىن ءتيىستى وڭىرلەردىڭ وبلىستىق ءبىلىم باسقارمالارى جانىنان ۇيلەستىرۋ كەڭەستەرى، سونداي-اق مينيسترلىك جانىنان كونكۋرستىق كوميسسيا قۇرىلادى. ءبىرىنشى كەزەڭنىڭ ناتيجەسى بويىنشا 45 ادام قۇجات تاپسىردى.

Abai.kz