سەنات توراعاسى ماۋلەن اشىمباەۆ باستاعان اەس سالۋدى قولداۋ جونىندەگى حالىقتىق شتابتىڭ مۇشەلەرى بۇگىن الماتى قالاسىندا عالىمدارمەن، جوو وقىتۋشىلارىمەن جانە قازاقستان حالقى اسسامبلەياسىنىڭ وكىلدەرىمەن كەزدەستى. شتاب قۇرامىندا دەپۋتاتتار، ساراپشىلار جانە قوعام قايراتكەرلەرى بار. كەزدەسۋلەردە اەس سالۋعا قاتىستى رەفەرەندۋم اياسىنداعى ماسەلەلەر تالقىلاندى.

ماۋلەن اشىمباەۆ مەملەكەت باسشىسى باستاماشى بولعان اەس سالۋ ماسەلەسىنە قاتىستى رەسپۋبليكالىق رەفەرەندۋم وتكىزۋ «حالىق ۇنىنە قۇلاق اساتىن مەملەكەت» تۇجىرىمداماسىنىڭ نەگىزگى ءمانىن ايقىن كورسەتەتىنىن اتاپ ءوتتى. سونداي-اق بۇل قادام ەلدىڭ ودان ءارى دامۋى ءۇشىن جاڭا مۇمكىندىكتەرگە جول اشاتىنى ايتىلدى.

فوتو: ءالي عالىم

«اتوم ەنەرگەتيكاسىن دامىتۋ جانە اتوم ەلەكتر ستانسالارىن سالۋ ستراتەگيالىق ماڭىزعا يە. ويتكەنى ۋاقىت وتكەن سايىن ەلدە ەلەكتر ەنەرگياسىنا دەگەن سۇرانىس ارتا تۇسەتىنى تۇسىنىكتى. بۇل رەتتە تۇراقتى ەنەرگيا كوزدەرى بولماسا ايتارلىقتاي پروبلەمالارعا تاپ بولۋىمىز مۇمكىن ەكەنىن ەسكەرۋىمىز كەرەك. جالپى ەلەكتر ەنەرگياسىن تۇتىنۋدىڭ ارتۋى – الەمدىك ۇردىسكە اينالىپ وتىر. سوندىقتان اتالعان قۋاتتىڭ جەتىسپەۋشىلىگى ايقىن بايقالۋدا. وسى ورايدا ەلەكتر ەنەرگياسى كوزدەرىن ءارتاراپتاندىرۋدىڭ ماڭىزى زور», – دەدى ماۋلەن اشىمباەۆ.

سونىمەن قاتار شتاب مۇشەلەرى ع.داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتىنىڭ جاس عالىمدارىمەن جانە پروفەسسور-وقىتۋشىلار قۇرامىمەن كەزدەستى. وندا عىلىمي-تەحنيكالىق الەۋەتتى تولىعىمەن نىعايتۋ جانە وندىرىسكە يننوۆاتسيالاردى كەڭىنەن ەنگىزۋ ماسەلەلەرى ءسوز بولدى. ودان بولەك، قاتىسۋشىلار بۇل باعىتتاعى ماڭىزدى مۇمكىندىكتەردىڭ ءبىرى اتوم ەنەرگەتيكاسىن دامىتۋ ەكەنىنە توقتالدى.

فوتو: ءالي عالىم

«اتوم ەنەرگەتيكاسى – عىلىمدى قاجەت ەتەتىن سالا. ول جوعارى بىلىكتى ماماندار دايارلاۋعا جانە بۇكىل ەكونوميكاعا يننوۆاتسيانى ەنگىزىپ، عىلىمنىڭ قولدانىسىن ارتتىرۋعا ىقپال ەتەدى. قازاقستان – ۋران ءوندىرۋ بويىنشا الەمدەگى كوشباسشى ەل. بىزدە وسى سالادا بىرەگەي كاسىپورىندار مەن عىلىمي ورتالىقتار بار. اتالعان باسىمدىقتى ءتيىمدى پايدالانىپ، جەتەكشى جانە تەحنولوگيالىق ەلدەردىڭ بىرىنە اينالۋ اسا ماڭىزدى. سونداي-اق اەس سالۋدىڭ ايتارلىقتاي مۋلتيپليكاتيۆتى اسەرى بار. مىڭداعان جاڭا جۇمىس ورنى اشىلادى. اتوم ەلەكتر ستانساسىنداعى ءاربىر جۇمىس ورنى وزگە سالالاردا 10-عا جۋىق قوسىمشا جۇمىس ورنىن قامتاماسىز ەتەدى», – دەدى ماۋلەن اشىمباەۆ.

فوتو: ءالي عالىم

قازاقستان حالقى اسسامبلەياسىنىڭ وكىلدەرىمەن كەزدەسۋدە شتاب مۇشەلەرى اەس سالۋ ەل دامۋىنا قانشالىقتى تىڭ سەرپىن بەرەتىنىنە جانە رەفەرەندۋمدا ءار قاتىسۋشىسىنىڭ داۋسى ماڭىزدى ەكەنىنە نازار اۋداردى.

حالىقتىق شتابتىڭ ءباسپاسوز قىزمەتى

دايىنداعان:  «Nur Media» جشس.

تاپسىرىس بەرۋشى: وسپانوۆ م.ج.

«AMANAT» پارتياسى» قب قاراجاتىنان تولەندى.

Abai.kz