بۇگىن پالاتا سپيكەرى ەرلان قوشانوۆتىڭ توراعالىعىمەن وتكەن ءماجىلىستىڭ جالپى وتىرىسىندا دەپۋتاتتار تاۋار بيرجالارى ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى.

دەپۋتاتتار باستاماشى بولعان زاڭ جوباسىن جۇمىس توبىنىڭ جەتەكشىسى ەكاتەرينا سمىشلياەۆا تانىستىردى. ول بۇل جوبا مەملەكەت باسشىسىنىڭ بيرجالىق تاۋارلارعا اشىق باعا بەلگىلەۋدى قالىپتاستىرۋ جانە «قالتا» بيرجالارىن نارىقتان شىعارۋ جونىندەگى تاپسىرماسىن ورىنداۋ ماقساتىمەن ازىرلەنگەنىن اتاپ ءوتتى.

– بۇل زاڭ جوباسى بىرقاتار ناقتى پروبلەمالىق ماسەلەنى شەشەدى. تاۋار بيرجالارى شاعىن كاسىپكەرلىك، ونىڭ ىشىندە ميكروكاسىپكەرلىك سۋبەكتىلەرى رەتىندە الىنىپ تاستالادى. بروكەرلەر مەن كليرينگتىك ورتالىقتاردى ليتسەنزيالاۋ جانە ولاردى قارجى مونيتورينگى سۋبەكتىلەرى ساناتىنا قوسۋ قاراستىرىلادى. ستاندارتتى اۋكتسيون جانە ستاندارتتالماعان تاۋارلار بيرجالىق ساۋدادان شىعارىلىپ، ستاندارتتالماعان تاۋارلارمەن ساۋدا ەلەكتروندى ساۋدا الاڭدارىنا اۋىستىرىلادى، – دەدى ە. سمىشلياەۆا.

دەپۋتاتتىڭ ايتۋىنشا، مۇنىڭ ناتيجەسىندە وتاندىق تاۋار وندىرۋشىلەر جەر قويناۋىن پايدالانۋشىلاردىڭ ساتىپ الىمدارىنا كەدەرگىسىز قول جەتكىزە الادى. وسىلايشا وسى كاسىپورىنداردىڭ توڭىرەگىندە وتاندىق وندىرۋشىلەردىڭ بەلدەۋى قالىپتاستىرىلادى.

مۇنىڭ بارلىعى قارجىلىق تۇراقتىلىق پەن تاۋار بيرجالارى جۇمىسىنىڭ اشىقتىعىنا قويىلاتىن تالاپتاردى قاتاڭداتىپ، مەملەكەتتىك باقىلاۋدى كۇشەيتەدى. مەملەكەتتىك باقىلاۋدى باسەكەلەستىكتى قورعاۋ جانە دامىتۋ اگەنتتىگى دە كەڭەيتەدى. ول بيرجالىق ساۋداعا جوسىقسىز قاتىسۋشىلاردىڭ ءتىزىلىمىن جۇرگىزىپ، تاۋار بيرجالارىن ليتسەنزيادان ايىرۋعا جانە ولاردى توقتاتۋعا مۇمكىندىك الادى.

بۇل رەتتە ۇكىمەت كونكۋرستىق نەگىزدە الەۋمەتتىك ماڭىزى بار بيرجا تاۋارلارىنىڭ ساۋداسى جۇزەگە اسىرىلاتىن تاۋار بيرجالارىنىڭ تىزبەسىن ايقىندايدى. تاۋار بيرجالارىنىڭ تىزبەسىن ساۋدا جانە ينتەگراتسيا مينيسترلىگى بەكىتەدى، وعان كومىر، بيداي، مۇناي جانە بىرقاتار ازىق-تۇلىك ونىمدەرى كىرەدى.

باياندامانى تىڭداعان دەپۋتاتتار زاڭ جوباسىن ازىرلەۋشىلەر مەن جاۋاپتى ۇكىمەت مۇشەلەرىنە زاڭ جوباسىنىڭ نورمالارىنا قاتىستى سۇراقتارىن قويدى. تالقىلاۋ ناتيجەسىندە تۇزەتۋلەردى ءبىرىنشى وقىلىمدا ماقۇلداۋ تۋرالى شەشىم قابىلداندى.

Abai.kz