قاسىم-جومارت توكاەۆقا ۇلتتىق كومپانيانىڭ بيىلعى 9 ايدا اتقارعان جۇمىسىنىڭ قورىتىندىسى تۋرالى ەسەپ بەرىلدى.

پرەزيدەنتكە ءىرى ينۆەستيتسيالىق جوبالاردى جۇزەگە اسىرۋ جانە ترانزيتتىك الەۋەتتى دامىتۋ بويىنشا بۇعان دەيىن بەرىلگەن تاپسىرمالارىنىڭ ورىندالۋ بارىسى باياندالدى.

سانجار جاركەشوۆ «الماتى – بايسەركە – تالعار» گاز قۇبىرىنىڭ ەكىنشى جەلىسىن سالۋ، سونداي-اق الماتىداعى ەكىنشى جانە ءۇشىنشى جىلۋ ەلەكتر ورتالىقتارىنىڭ گازعا ارنالعان ينفراقۇرىلىمىن جاساقتاۋ جۇمىستارى اياقتالعانىن ايتتى. بۇدان بولەك، «تالدىقورعان – ءۇشارال» ماگيسترالدى گاز قۇبىرى سالىنا باستادى. وزبەكستانعا گاز تاسىمالداۋ كولەمىن ۇلعايتۋ ءۇشىن «ورتا ازيا – ورتالىق» جۇيەسىن جاڭعىرتۋ بويىنشا دايىندىق جۇمىستارى ءجۇرىپ جاتىر.

مەملەكەت باسشىسىنا رەسۋرستىق بازانى كەڭەيتۋ شارالارى جونىندە مالىمەت بەرىلدى. «QazaqGaz» ۇك» اق باسقارما توراعاسى ەل ەكونوميكاسىنداعى تاۋارلى گازدى تۇتىنۋ كولەمىنىڭ ەسەلەپ ارتۋىن ەسكەرە وتىرىپ، اتالعان سالانىڭ گەولوگيالىق بارلاۋ جوبالارىن جۇزەگە اسىرۋعا شەتەلدەن ينۆەستيتسيا تارتىلعانىن ايتتى. Chevron كومپانياسىمەن اقتوبە وبلىسىندا گەولوگيالىق بارلاۋ جۇمىستارىن جۇرگىزۋ تۋرالى كەلىسىمگە قول قويىلعان. جوبا تولىعىمەن ينۆەستوردىڭ ءوز قارجىسى ەسەبىنەن جۇرگىزىلەدى.

سونىمەن قاتار قاسىم-جومارت توقاەۆقا ەنەرگەتيكا، ۇلتتىق ەكونوميكا مينيسترلىكتەرىمەن بىرلەسە جۇرگىزىلىپ جاتقان باستامالار تۋرالى باياندالدى. بۇل شارالار مەملەكەت باسشىسى جولداۋىندا ايتقان گاز سالاسىنىڭ ينۆەستيتسيالىق تارتىمدىلىعىن ارتتىرۋعا، كوگىلدىر وتىننىڭ لايىقتى ءتاريفى مەن كوتەرمە باعاسىن بەلگىلەۋگە قاتىستى تاپسىرمالارىن ورىنداۋ ماقساتىندا قابىلدانىپ جاتىر.

كەزدەسۋ سوڭىندا پرەزيدەنت جىلىتۋ ماۋسىمىندا حالىقتى جانە ەكونوميكانى گازبەن تۇراقتى قامتاماسىز ەتۋ، سالانى رەفورمالاۋدى جالعاستىرۋ، گاز تاسىمالداۋ جۇيەسىنىڭ قۋاتتىلىعىن ارتتىرۋ بويىنشا بىرقاتار تاپسىرما بەردى.

Abai.kz