ولجاس بەكتەنوۆ توراعالىق ەتكەن ۇكىمەت وتىرىسىندا ترانسشەكارالىق حابتاردىڭ دامۋى تۋرالى ساۋدا جانە ينتەگراتسيا ءمينيسترى ارمان شاكقاليەۆ باياندادى.

ول مەملەكەت باسشىسىنىڭ قازاقستاندا ورتالىق ازيادا جانە كاسپي وڭىرىندە تولىققاندى كولىكتىك-لوگيستيكالىق حابتاردى قالىپتاستىرۋ جونىندەگى تاپسىرماسىن ورىنداۋ شەڭبەرىندە ەلىمىزدىڭ اينالاسىندا جۇكتەردى وڭدەۋ جونىندەگى وپەراتسيالاردىڭ بارلىق كەشەنىن ورىندايتىن وندىرىستىك الاڭدار مەن ساۋدا ورتالىقتارى قۇرىلاتىنىن حابارلادى. ولار قىتاي، قىرعىزستان، وزبەكستان، رەسەي شەكاراسىندا جانە كاسپي جاعالاۋىندا ورنالاسقان. ورتالىقتاردىڭ قۇرىلىسى شەكارا ماڭىنداعى ەلدەرمەن ساۋدا ءوزارا ءىس-قيمىلىن جەدەلدەتەدى، شيكىزاتتىق ەمەس ەكسپورتتىڭ ءوسىمىن 30%-عا ارتتىرادى، بيزنەس ءۇشىن لوگيستيكالىق راسىمدەردى جەڭىلدەتەدى.

ماسەلەن، يندۋستريالىق ساۋدا-لوگيستيكالىق كەشەن قازاقستان تاراپىنان «قاراسۋ» جانە قىرعىزستان تاراپىنان «اق-تىلەك» ترانزيتتىك وتكىزۋ پۋنكتتەرىنىڭ بىرىنە جاقىن ورنالاسقان.

وزبەكستانمەن شەكاراداعى «ورتالىق ازيا» حالىقارالىق ونەركاسىپتىك كووپەراتسيا ورتالىعى جۇك اعىندارىن وڭدەۋ جانە ديستريبۋتسيالاۋ، سونداي-اق «سولتۇستىك–وڭتۇستىك» ءدالىزى شەڭبەرىندەگى وندىرىستىك كووپەراتسيا بويىنشا وڭىردەگى ەڭ ءىرى الاڭعا اينالادى.

«ەۋرازيا» ترانسشەكارالىق ساۋدا ورتالىعى ورىنبور، ساراتوۆ، سامارا قالالارىنا جانە ودان ءارى رەسەي فەدەراتسياسىنىڭ ءىرى فەدەرالدى وكرۋگتەرى مەن شىعىس ەۋروپا ەلدەرىنە شىعاتىن جۇك اعىندارىنىڭ ءتۇيىندى نۇكتەسى سانالاتىن ورال قالاسىنىڭ اۋەجايىنا ىرگەلەس اۋماقتا ورنالاساتىن بولادى.

قورعاس تورابى قازاقستاننىڭ ترانزيتتىك الەۋەتىن كەڭەيتۋدىڭ اجىراماس ەلەمەنتى سانالادى، سونداي-اق قحر-دىڭ «ءبىر بەلدەۋ – ءبىر جول» جاھاندىق تۇجىرىمداماسىنىڭ بولىگى بولىپ تابىلادى، وندا گەوگرافيالىق جاعدايى، ەۋروپا مەن تاياۋ شىعىس ەلدەرىنە شىعاتىن ينفراقۇرىلىمدىق الەۋەتى ەسكەرىلەدى.

كاسپي تورابى 100 ملن-نان استام حالقى بار كاسپي ماڭى ايماعىنىڭ ەلدەرىنە (ازەربايجان، تۇرىكمەنستان، يران، رف) باعىتتالعان. جوبا كونتەينەرلەردى ساقتاۋعا جانە تەمىرجول ۆاگوندارىنان تەڭىز كونتەينەرلەرىنە قايتا تيەۋگە ارنالعان الاڭ سالۋدى، سونداي-اق ولاردى وڭدەۋ بويىنشا ساپالى سەرۆيس ۇسىنۋدى كوزدەيدى.

Abai.kz