پرەزيدەنتكە ەلىمىزدەگى زاڭ ۇستەمدىگىنىڭ جاي-كۇيى جانە قاداعالاۋ ورگاندارىنىڭ باسىم باعىتتارى بويىنشا اتقارعان جۇمىس قورىتىندىلارى تۋرالى باياندالدى.

قاسىم-جومارت توقاەۆقا كريمينوگەندىك جاعداي جانە قىلمىستىق-قۇقىقتىق سالاداعى ازاماتتاردىڭ كونستيتۋتسيالىق قاقىن قامتاماسىز ەتۋگە باعىتتالعان شارالار جونىندە ەسەپ بەرىلدى. پروكۋراتۋرا ورگاندارى سوتقا دەيىنگى تەرگەۋ ساتىسىندا 32 مىڭنان استام زاڭسىز شەشىمدى توقتاتتى، بۇل ىستەر قىلمىستىق-پروتسەستىك كودەكسكە ساي كەلمەيدى. 4 مىڭ ازاماتتىڭ قىلمىستىق ىسكە نەگىزسىز تارتىلۋىنا جول بەرمەدى. سونىمەن قاتار زاڭسىز ۇستالعان 1,5 مىڭنان اسا ادام بوساتىلدى. باس پروكۋروردىڭ قارسىلىعى نەگىزىندە جوعارعى سوت 150 تۇلعاعا قاتىستى ءىستىڭ ءمان-جايىن وڭ باعىتقا وزگەرتىپ، سونىڭ ىشىندە 10 ادام تولىق اقتالدى.

بەرىك اسىلوۆتىڭ حابارلاۋىنشا، الەۋمەتتىك-ەكونوميكالىق سالادا 81 مىڭ كاسىپكەردىڭ، 979 مىڭ زەينەتكەردىڭ، حالىقتىڭ الەۋمەتتىك تۇرعىدان از قامتىلعان توپتارىنىڭ جانە باسقا دا ازاماتتاردىڭ بۇزىلعان قۇقىقتارى قالپىنا كەلتىرىلگەن. 123 مىڭ جۇمىسشىنىڭ ەڭبەك قۇقىعىن بۇزۋعا جول بەرىلمەگەن. جالپى سوماسى 4,5 ميلليارد تەڭگە بولاتىن اليمەنت بويىنشا قارىز وندىرىلگەن.

پرەزيدەنتكە بىلتىر مەملەكەت پايداسىنا 627 ميلليارد تەڭگەدەن اساتىن وتەماقى قايتارىلعانى جونىندە ايتىلدى.

ەكونوميكاعا 12 تريلليون تەڭگەدەن استام قارجى قۇيعان 800 ينۆەستورعا پروكۋرورلىق كومەك بەرىلدى. پروكۋراتۋرا اكتىسى بويىنشا 136 لاۋازىمدى تۇلعا جاۋاپقا تارتىلدى. پروكۋرورلار ينۆەستورلارعا قاتىستى مەملەكەتتىك ورگانداردىڭ 712 شەشىمىنە كەلىسىم بەرمەدى. ينۆەستيتسيالىق جوبالارعا قولداۋ كورسەتۋ بارىسىندا «پروكۋرورلىق سۇزگىنى» پايدالانۋ ءوز تيىمدىلىگىن كورسەتتى. جالپىۇلتتىق پۋلعا ەنگەن جوبالاردىڭ جۇزەگە اسىرىلۋىن قاداعالاۋعا مۇمكىندىك بەرەتىن تسيفرلى ينۆەستيتسيالىق پلاتفورما بەلسەندى قىزمەت اتقارىپ كەلەدى.

مەملەكەت باسشىسىنا قوعام نازارىن اۋدارعان بىرقاتار قىلمىستىق ءىستى تەرگەۋ بارىسى جونىندە مالىمەت بەرىلدى.

باس پروكۋرور قىلمىسقا قارسى كۇرەستە تسيفرلىق تەحنولوگيالاردى جاپپاي ەنگىزۋ جونىندە باياندادى. اتاپ ايتقاندا، ىزدەۋدە جۇرگەن ازاماتتاردى «اقىلدى» بەينەكامەرانىڭ كومەگىمەن تابۋ (ىزدەۋدە جۇرگەندەر سانى 9,4 پايىزعا ازايدى) ءتاسىلى جولعا قويىلدى.

قاسىم-جومارت توقاەۆ «زاڭ جانە ءتارتىپ» قاعيداسىن ىسكە اسىرۋ، بارلىق سالادا زاڭنامانىڭ ساقتالۋىن قامتاماسىز ەتۋ جۇمىستارىن جالعاستىرۋدى تاپسىردى. سونداي-اق الاياقتىققا قارسى ءىس-قيمىل، ەسىرتكى بيزنەسىمەن كۇرەس، قوعامدىق ورىنداردا قۇقىقبۇزۋشىلىقتىڭ الدىن الۋ بويىنشا قۇقىق قورعاۋ مەن باسقا دا مەملەكەتتىك ورگانداردىڭ قىزمەتىن ۇيلەستىرۋدىڭ ماڭىزىن اتاپ ءوتتى.

Abai.kz